ÀTE ŋu axlẽ Hebrigbe gbãtɔ si wotsɔ ŋlɔ Biblia? Ðewohĩ màte ŋui o. Anɔ eme be mèkpɔ Hebri Biblia mawo dometɔ aɖeke kpɔ gɔ̃ hã o. Gake anɔ eme be nu siwo nàsrɔ̃ tso Elias Hutter si nye agbalẽnyala si nɔ anyi le ƒe alafa 16 lia me gbɔ kple eƒe Hebri Biblia eveawo me, ana nàgade asixɔxɔ Ŋɔŋlɔ Kɔkɔe si le asiwò la ŋu geɖe wu.

Wodzi Elias Hutter le ƒe 1553 me le Görlitz, si nye du sue aɖe le egbegbe Germany ƒe akpa si do liƒo kple Poland kpakple Czech Republic la me. Hutter srɔ̃ Tititna Ɣedzeƒetɔwo ƒe gbewo le Lutheran Yunivɛsiti le Jena. Esi wòxɔ ƒe 24 la, wotiae be wòanye Hebri nufialagã le Leipzig. Esi wònye ɖɔɖɔɖowɔla le agbalẽsrɔ̃nyawo me ta la, eɖo suku aɖe le Nuremberg ale be yeƒe sukuviwo nate ŋu asrɔ̃ Hebrigbe, Helagbe, Latingbe kple Germanygbe le ƒe ene pɛ ko me. Suku alo yunivɛsiti aɖeke mete ŋu wɔ esia ɣemaɣi o.

“NU SI ÐE DZESI LE BIBLIA SIA ŊU”

Hutter ƒe Hebri Biblia si wòta le ƒe 1587 ƒe axa si etala ƒe ŋkɔ dze le

Le ƒe 1587 me la, Hutter ta Biblia si ame geɖe yɔna be Nubabla Xoxoa ɖe Hebrigbe me. Biblia sia ƒe ŋkɔe nye Derekh ha-Kodesh, eye Yesaya 35:8 mee wòɖe ŋkɔ ma si gɔmee nye “Kɔkɔenyenye ƒe Mɔ” la tsoe. Ŋɔŋlɔdzesi nyakpɔ siwo wòzã ɖee fia be “nu sia nu ɖe dzesi le Biblia sia ŋu.” Gake nu si na asixɔxɔ geɖe wu le Biblia sia ŋue nye be sukuviwo ate ŋu azãe atsɔ asrɔ̃ Hebrigbe bɔbɔe.

Be míase nu si tae Hutter ƒe Hebri Biblia ɖe vi nenema gbegbe gɔme la, na míabu nu siwo ɖea fu na gbesrɔ̃la ne ele agbagba dzem be yeaxlẽ Biblia le Hebrigbe me ŋu kpɔ. Gbãa, alfabetawo to vovo eye gbesrɔ̃laa mese wo gɔme o, evelia, nya siwo woŋlɔ tsiã ɖe nya aɖe ŋu le ŋgɔ alo megbe nana wòsesẽna be wòade dzesi nyagbe si ŋu woŋlɔ nyaa tsiã ɖo. Le kpɔɖeŋu me, Bu Hebri nyagbe נפשׁ (si gɔme woɖena be ne’phesh), si gɔmee nye “luʋɔ” ŋu kpɔ. Le Ezekiel 18:4 la, woŋlɔ nya ה (ha), si gɔmee nye “la,” do ŋgɔ tsiã ɖe nyaa ŋu, si na be wòva zu nya eve si wotsiã הנפשׁ (han·ne’phesh), alo “luʋɔ la.” Le ame si menya gbea o gome la, nya, הנפשׁ (han·ne’phesh) ate ŋu adze nya bubu kura si to vovo na נפשׁ (ne’phesh).

Esi Hutter di be yeakpe ɖe yeƒe sukuviwo ŋu ta la, ezã agbalẽtataɖaŋu aɖe—etsaka Hebri ŋɔŋlɔdzesi gã siwo woŋlɔ wòtò kple esiwo metò o la. Ezãa ŋɔŋlɔdzesi gã siwo woŋlɔ wòtò tsɔ ŋlɔa nyagbea ŋutɔ. Eye wòzãa esiwo metò o na nya siwo woŋlɔ tsiã ɖe nya aɖe ŋu le ŋgɔ alo megbe la. Mɔnu sia na wònɔ bɔbɔe na sukuviawo be woade dzesi Hebri nyagbea,  eye esia kpena ɖe wo ŋu ne wole gbea srɔ̃m. Wozã mɔnu sia tɔgbi le Ŋɔŋlɔ Kɔkɔeawo—Xexe Yeye Gɔmeɖeɖe si ŋu numeɖeɖewo kpe ɖo ƒe etenuŋɔŋlɔwo me. * Woŋlɔa nyagbea ŋutɔ si ŋu wotrɔ asi le la kple nuŋlɔtsi si tò, eye wòzãa nuŋlɔtsi si metò o la na nya siwo woŋlɔ tsiã ɖe nyaa ŋu le ŋgɔ alo megbe la. Nuŋɔŋlɔ lolotɔ siwo dze le fotoa me na míekpɔ ŋɔŋlɔdzesi siwo Hutter zã le eƒe Hebri Biblia me le Ezekiel 18:4 kple esi Xexe Yeye Gɔmeɖeɖe si ŋu numeɖeɖewo kpe ɖo zã le eƒe etenuŋɔŋlɔ me le kpukpui ma ke me.

“NUBABLA YEYE” ƑE HEBRIGBE ME BIBLIA YEYE AÐE

Hutter ta Biblia si ame geɖe yɔna be Nubabla Yeye la me nyawo ɖe gbegbɔgblɔ 12 me. Woɖe Biblia sia ɖe go le Nuremberg le ƒe 1599 me eye woyɔnɛ zi geɖe be Nuremberg Polyglot. Hutter di be yeaɖe Kristotɔwo Ƒe Hela Ŋɔŋlɔawo hã gɔme ɖe Hebrigbe me akpe ɖe eŋu. Gake egblɔ be ne “yelɔ̃ be yeade ga gbogbo eme” aɖe Hebrigbea gɔme hãa, anye dagbadagba ɖe yame. * Eya ta eɖoe be yeaɖe Nubabla Yeye si le Helagbe me gɔme ɖe Hebrigbe me. Ne míeɖe nu bubu siwo katã Hutter wɔ le emea, ewu dɔa nu le ƒe ɖeka pɛ ko me!

Aleke gbegbe Kristotɔwo Ƒe Hela Ŋɔŋlɔawo si gɔme Hutter ɖe la ɖe vii? Hebritɔwo ƒe agbalẽnyala aɖe si ŋkɔe nye Franz Delitzsch, si nɔ anyi le ƒe alafa 19 lia me gblɔ be: “Hebrigbe si gɔme wòɖe la mebɔ kura o, evɔ egɔmesese le bɔbɔe na Kristotɔ siwo nɔ anyi ɣemaɣi eye wogadoa ta ɖe Biblia gɔmeɖeɖe ma gbɔ kokoko, elabe kpeɖodzi geɖewo fia be ezã nya siwo sɔ wu la le go geɖe me.”

ANƆ VI ÐEM ÐAA

Hutter ƒe dɔa mena wòzu gatɔ o; ɖewohĩ amewo meƒle eƒe Biblia boo o. Ke hã, nu siwo do tso eƒe dɔa me nye nu vevi aɖe eye anɔ anyi ɖaa. Le kpɔɖeŋu me, William Robertson gbugbɔ to Nubabla Yeye si gɔme Hutter ɖe ɖe Hebrigbe me la me eye wòtae le ƒe 1661 me, emegbe Richard Caddick hã gato eme eye wòtae le ƒe 1798 me. Esi Hutter nɔ gbea gɔme ɖem tso Helagbe gbãtɔ me la, eɖe dzesideŋkɔ siwo nye Kyʹri·os (Aƒetɔ) kple The·osʹ (Mawu) gɔme pɛpɛpɛ be “Yehowa” (יהוה, YHWH) nenye be Hebri Ŋɔŋlɔawo mee woyɔ nyaa tsoe alo ne wòkpɔe be Yehowa ŋue wòku ɖo. Esia ɖe dzesi elabe togbɔ be ame geɖe siwo ɖe Nubabla Yeye la gɔme mezã Mawu ƒe ŋkɔ ŋutɔŋutɔ o hã, Hutter ƒe gɔmeɖeɖea ya zãe eye wòna kpeɖodzi va le susu si tae wòle be woagbugbɔ Mawu ƒe ŋkɔ ade Kristotɔwo Ƒe Hela Ŋɔŋlɔawo me la ŋu.

Eya ta ne ègakpɔ Mawu ƒe ŋkɔ, Yehowa le Kristotɔwo Ƒe Hela Ŋɔŋlɔawo me alo nèkpɔ Xexe Yeye Gɔmeɖeɖe si ŋu numeɖeɖewo kpe ɖo ƒe etenuŋɔŋlɔ aɖe la, ekema ɖo ŋku Elias Hutter kple eƒe Hebri Biblia ɖedzesiawo dzi.

^ mm. 7 Kpɔ etenuŋɔŋlɔ evelia le Ezekiel 18:4 kple Megbenyawo 3B le Xexe Yeye Gɔmeɖeɖe si ŋu numeɖeɖewo kpe ɖo la me.

^ mm. 9 Edze abe do ŋgɔa agbalẽnyalawo ɖe Hebrigbe me Nubabla Yeye la gɔme ene. Ame siawo dometɔ ɖekae nye Simon Atoumanos, Byzantium saɖeagaxɔmenɔla; eɖe egɔme le ƒe 1360 me. Ame bubue nye Germanytɔ agbalẽnyala, Oswald Schreckenfuchs; eɖe egɔme le ƒe 1565 me. Gake womeɖe agbalẽ siawo ɖe go gbeɖe o, eye fifia wobu.