Biblia to vovo sãsãsã na subɔsubɔgbalẽ bubuwo. Ƒe akpe geɖe ye nye esia Biblia le ŋusẽ kpɔm ɖe ame geɖe ƒe dzixɔsewo dzi le xexea me godoo; agbalẽ bubu aɖeke mede enu le go sia me o. Gake eya kee nye agbalẽ si me amewo dzro tsitotsito wu kple esi ŋu woƒo nu tsi tsitre ɖo wu.

Le kpɔɖeŋu me, agbalẽnyala aɖewo gblɔna be Biblia siwo li egbea la me nyawo mesɔ kple ŋɔŋlɔ gbãtɔawo me nyawo o. Mawusubɔsubɔ ŋuti nufialagã aɖe gblɔ be: “Mímate ŋu aka ɖe edzi gbeɖe be nya siwo nɔ ŋɔŋlɔ gbãtɔawo me la tututue le esiwo míegbugbɔ ŋlɔ la me o. Vodadawo sɔŋ koe le wo me, eye ƒe alafa geɖe tso wo dometɔ akpa gãtɔ kple ŋɔŋlɔ gbãtɔawo dome eye woto vovo, edze ƒãa be woto vovo le mɔ akpe nanewo nu.”

Le ame aɖewo gome la, subɔsubɔha si me wodzi wo ɖo lae wɔe be womekana ɖe edzi be Biblia me nyawo de pɛpɛpɛ o. Le kpɔɖeŋu me, Faizal, si ƒe ƒometɔwo menye Kristotɔwo o la fiae be Biblia nye agbalẽ kɔkɔe gake wotrɔ emenyawo. Egblɔ be: “Esia wɔe be, ne ame aɖe va le nu ƒom nam tso Biblia ŋu la, mekea ɖi eƒe nyawo. Elabena menye Biblia gbãtɔa ye le esi o. Wotrɔ emenyawo!”

Gake ne wotrɔ Biblia me nyawo alo wometrɔ wo o la, ɖe esia le veviea? Azɔ, de ŋugble le biabia siawo hã ŋu kpɔ: Ðe nàte ŋu axɔ Biblia me ŋugbedodo fakɔname siwo ku ɖe etsɔme ŋu la dzi se ne mènya nenye be ŋugbedodo mawo nɔ ŋɔŋlɔ gbãtɔawo me oa? (Romatɔwo 15:4) Ne Biblia siwo li egbea la nye gbãtɔawo siwo amewo gbugbɔ ŋlɔ, siwo me vodadawo bɔ ɖo la, ɖe nàtsɔ mɔfiame siwo le wo me la awɔ dɔe ne dɔwɔɖui, ƒome, alo mawusubɔsubɔ ŋuti nyametsotso veviwo dze ŋgɔ wòa?

Togbɔ be Biblia-gbalẽ siwo woŋlɔ gbã la megali egbea míakpɔ o hã la, míate ŋu alé ŋku ɖe esiwo wogbugbɔ ŋlɔ le blema, siwo dome Biblia ƒe asinuŋɔŋlɔgbalẽ akpe geɖe le la ŋu. Aleke wòdzɔe be asinuŋɔŋlɔgbalẽ mawo gakpɔtɔ li togbɔ be woate ŋu anyunyɔ hafi, amewo di be yewoatsrɔ̃ wo ɖa, eye wodze agbagba be yewoatrɔ wo me nyawo hã? Aleke nyateƒe si wònye be wogakpɔtɔ li egbea ate ŋu ana nàka ɖe edzi be Biblia siwo li egbea la me nyawo de pɛpɛpɛ? Azɔ, xlẽ nyati siwo kplɔe ɖo be nàkpɔ ale si woɖo biabia mawo ŋui ku ɖe nu siwo gbegbe me Biblia to hafi gakpɔtɔ li ŋu.