NU SI NUWƆWƆWO ATE ŊU AFIA MÍ

Ne wodzi ɖevi aɖe la, miniti 60 gbãtɔ nyea ɣeyiɣi vevi aɖe si vidzĩa kple dadaa atsɔ atrɔ ɖe nuwo ŋu. Nu ka tae? Elabena ne wodzi ɖevi aɖe la, le ɣeyiɣi vevi sia me la, ele be nɔa naxɔ vidzĩa, esia kpena ɖe vidzĩa ŋu be wòate ŋu atsi nyuie. *

Nu kae ʋãa vidada wòléa be na vidzĩa? Nufialagã Jeannette Crenshaw gblɔ le agbalẽ aɖe (The Journal of Perinatal Education) me be lãmetsi si nye oxytocin dzina ɖe edzi ne “vidadaa ka asi vidzĩa ŋu, ne ele ekpɔm eye wòle no namee; eye esia nana wòlɔ̃nɛ geɖe wu.” Lãmetsi bubu aɖe hã si wɔa dɔ le ɣeyiɣi sia me la “kpena ɖe vidadaa ŋu eƒe susu nɔa vidzĩa ŋu” eye esia wɔnɛ be kadodo si le vidadaa kple vidzĩa dome gasẽna ɖe edzi. Nu ka tae esia ɖe dzesi?

Mía Wɔla lɔ̃ame Yehowa Mawue wɔe be kadodo kplikplikpli sia nɔa vidada kple vidzĩ dome. * Fia David kafu Mawu be wòna yedo “tso vidzidɔ me” eye wòna yenɔ dedie le ye dada ƒe akɔnu. Edo gbe ɖa be: “Wotsɔm de asi na wò tso esime wodzim; wòe nye nye Mawu tso danye ƒe dɔ me ke.”—Psalmo 22:9, 10.

BU NYA SIAWO ŊU KPƆ: Ne Mawue wɔ ɖoɖo wɔnuku sia ale be vidada si nye amegbetɔ nate ŋu alé ŋku ɖe via ŋu akpɔ vidzĩa ƒe hiahiãwo gbɔ lɔlɔ̃tɔe alea la, ekema ɖe susu mele eme be Mawu hã tsɔa ɖe le eme na mí “Mawu ƒe viwo” dometɔ ɖe sia ɖe oa?—Dɔwɔwɔwo 17:29.

NU SI BIBLIA FIA MÍ TSO ALE SI MAWU LÉA BE NA MÍ ŊU

Yesu Kristo, ame si nya Wɔlaa wu ame bubu ɖe sia ɖe la fia nu be: “Ðe womedzraa atsutsrɔe eve xɔa gaku ɖeka, si ƒe home le sue ŋutɔ oa? Gake wo dometɔ ɖeka pɛ hã mage adze anyigba le mia Fofo ƒe manyamanya me o. Ke woxlẽ miaƒe taɖawo katã gɔ̃ hã. Eya ta migavɔ̃ o; miexɔ asi sãsãsã wu atsutsrɔe geɖewo.”—Mateo 10:29-31.

Mía dometɔ geɖe meléa ŋku ɖe xevi suewo ŋu o, ʋuu keke wòahanye be ‘wo dometɔ aɖe ge dze anyigba.’ Gake mía Fofo si le dziƒo la kpɔa wo dometɔ ɖe sia ɖe! Eye xeviwo, ne wosɔ gbɔ gɔ̃ hã, womele vevie nɛ wu amegbetɔ o. Eya ta nufiamea me kɔ be: Mele be ‘nàvɔ̃’ be Mawu menya ye o. Ke boŋ etsɔa ɖe le eme na wò vevie!

Mawu di be eme nanyo na mí eye wòléa ŋku ɖe mía ŋu lɔlɔ̃tɔe

 Biblia ka ɖe edzi na mí be

  • “Yehowa ƒe ŋku le afi sia afi, eléa ŋku ɖe ame vlowo kple ame nyuiwo siaa ŋu.”​—LODODOWO 15:3.

  • “Yehowa ƒe ŋkuwo le ame dzɔdzɔewo ŋu, eye eƒe towo le woƒe ɣlidodowo ŋu.”​—PSALMO 34:15.

  • “Matso aseye le wò lɔlɔ̃ si nu metsina o la ta, elabena wò ŋku le nye fukpekpewo ŋu; ènya nye nuxaxawo nyuie.”​—PSALMO 31:7.

“MESE LE ÐOKUINYE ME BE YEHOWA MELƆ̃M O”

Ne míeva nya be Mawu tsɔa ɖe le eme na mí vevie eye eƒe ŋkuwo nɔa mía ŋu lɔlɔ̃tɔe la, ɖe esia akpe ɖe mía ŋua? Ɛ̃, nenemae Hannah, * si le England la gblɔ. Egblɔ be:

“Zi geɖe la, mesena le ɖokuinye me be Yehowa melɔ̃m o eye meɖoa nye gbedodoɖawo ŋu nam o. Mebui be esi xɔse mele asinye o tae. Mesusu be ɖe wònɔ to hem nam alo be nyemeɖi naneke o. Mekpɔe be Mawu metsɔ ɖeke le eme nam o.”

Ke hã fifia Hannah va ka ɖe edzi be Yehowa lɔ̃ ye. Nu kae na ale si wònɔ sesem le eɖokui me tsã la trɔ? Egblɔ be: “Ðe nuwo nɔ tɔtrɔm vivivi. Meɖo ŋku Biblia me nuƒo aɖe si ku ɖe Yesu ƒe tafevɔsaa ŋu ƒe gbogbo aɖewoe nye esi va yi la dzi, ekpɔ ŋusẽ ɖe dzinye ŋutɔ, eye wòkpe ɖe ŋunye megaka ɖe edzi be Yehowa lɔ̃m. Aɖatsi lólona ɖe nye ŋkuwo dzi ne woɖo nye gbedodoɖawo ŋu nam, elabe enana mekpɔnɛ be sigbeɖe Yehowa lɔ̃m. Azɔ hã Biblia sɔsrɔ̃ kple Kristotɔwo ƒe kpekpeawo dede na mesrɔ̃ nu geɖe tso Yehowa, eƒe nɔnɔmewo kple ale si wòsena le eɖokui me tso mía ŋu la ŋu. Fifia eme kɔ nam keŋ be Yehowa le megbe na mí eye wòlɔ̃ mí hele didim be yeakpɔ mía dometɔ ɖe sia ɖe ƒe nuhiahiãwo gbɔ.”

Nya si Hannah gblɔ la, de dzi ƒo ŋutɔ. Gake aleke nàte ŋu aka ɖe edzi be Mawu ɖoa ŋku dziwò eye wòsea ale si nèsena le ɖokuiwò me la gɔme? Nyati si kplɔ esia ɖo la aɖo biabia ma ŋu.

^ mm. 3 Esesẽna na vidada aɖewo siwo vidzidzi megbe blanuiléledɔ ɖea fu na la be woana ƒomedodo sia nanɔ wo kple wo via dome. Ke hã mele be woase le wo ɖokui me be yewo gbɔe wòtso o. Dɔwɔƒe si kpɔa tagbɔdɔlélewo gbɔ le Amerika gblɔ be vidzidzi megbe blanuiléledɔ “anya tso ametia kple seselelãmekuxi aɖewo gbɔ . . . gake metsoa nu si vidadaa wɔ alo mewɔ nyuie o gbɔ o.” Àte ŋu axlẽ nu geɖe tso nya sia ŋu le August 8, 2002 ƒe Nyɔ! me le tanya si nye “Meɖu Vidzidzi Megbe Blanuiléle Dzi” te.

^ mm. 5 Biblia na míenya be Mawu ƒe ŋkɔe nye Yehowa.—Psalmo 83:18.

^ mm. 15 Míetrɔ ŋkɔ aɖewo le nyati sia kple esiwo akplɔe ɖo la me.