Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ  |  No. 3 2017

Hadede kple ɖevi siwo le hamea me doa dzidzɔ nam

 BIBLIA LE AMEWO ƑE AGBENƆNƆ TRƆM

Melɔ̃ Bezbɔlƒoƒo Wu Nu Sia Nu!

Melɔ̃ Bezbɔlƒoƒo Wu Nu Sia Nu!
  • ƑE SI ME WODZII: 1928

  • DUKƆ SI ME WÒTSO: COSTA RICA

  • AME SI WÒNYE TSÃ: MEƑO ÐOKUINYE ÐE BƆLƑOƑO KPLE TSATSADADA ME VĨI

NYE ŊUTINYA

Ƒutadu Puerto Limón, si nye melidzeƒe le Costa Rica ƒe ɣedzeƒe mee menɔ tsi. Vi enyi ye nɔ dzinyelawo si, eye nyee nye vi adrelia. Fofonye ku esi mexɔ ƒe enyi. Tso ɣemaɣia, mía nɔ si nye dzila ɖekɛ ye nyi mí.

Bezbɔlƒoƒo ɖom abe axɔ̃ ene. Mesea vivi nɛ tso nye ɖevime ke. Esi menye sɔhɛ la, mege ɖe nutoa me bɔlƒoha aɖe me. Esi menɔ bɔl ƒom na nutoa me bɔlƒohaa le nye ƒe 20-awo me la, ŋutsu aɖe si dia bɔlƒolawo na bɔlƒohawo la, bia tso asinye be mava ƒo bɔl na bɔlƒoha aɖe si axe fe nam le Nicaragua. Gake esi nɔnye ƒe lãme menɔ kɔkɔm o eye menɔ edzi kpɔm ta la, nyemelɔ̃ be manɔ Nicaragua o. Eya ta megbe. Emegbe ame bubu aɖe si dia bɔlƒolawo na bɔlƒohawo la bia tso asinye be mava ƒo bɔl na Costa Rica dukɔa ƒe bɔlƒohaa, si me tɔwo wotia tso nuto vovovowo ƒe bɔlƒohawo me. Fifia ya melɔ̃. Meƒo bɔl na dukɔa tso ƒe 1949 va ɖo 1952 eye meƒo bɔl le teƒe vovovo siwo nye Cuba, Mexico kple Nicaragua. Medzea agbagba le bezbɔl la ƒoƒo me ŋutɔ, eye mekpɔ gome le hoʋiʋli 17 sɔŋ me tsiã ɖe enu, gake nyemewɔ vodada aɖeke o. Ne amewo le ɣli dom le nye ŋkɔ yɔm hoo la nye ta koe tena!

Nublanuitɔea, menɔ agbe manyomanyo aɖewo hã. Togbɔ be ahiãvi ɖeka koe nɔ asinye hãa, zi geɖe la mezɔna kple nyɔnu bubuwo. Menoa ahatsu hã. Gbe ɖekaa, memu aha ale gbegbe be esi mefɔ le aba dzi le ŋufɔkea, nyemenya ale si mewɔ va ɖo aƒe me o! Medaa tsatsa kple loto.

Esi menɔ agbe sia dzia, nɔnye va zu Yehowa Ðasefo. Edi be masrɔ̃ nu tso yeƒe dzixɔsea ŋu, gake medze edzi o elabe menyrɔ ɖokuinye ɖe bɔlƒoƒoa me vĩi. Ne mele hehe xɔm, eye nuɖuɣi ɖo gɔ̃ hã la, nyemesea dɔwuame o! Bɔl la ŋu koe nye susu katã nɔna. Melɔ̃ bezbɔlƒoƒo wu nu sia nu!

Ke hã, esi mexɔ ƒe 29 la, mexɔ abi vevie esi medi be malé bɔl le hoʋiʋli aɖe me. Esi mehayaa, nyemegaƒoa bɔl woxea fe nam o. Ke hã, menaa hehe bezbɔlƒoha aɖe ƒe bɔlƒolawo le teƒe aɖe si gogo nye aƒe.

 ALE SI BIBLIA TRƆ NYE AGBENƆNƆ

Le ƒe 1957 me la, wokpem be mava Yehowa Ðasefowo ƒe takpekpe aɖe si woawɔ le bɔlƒoƒe si meƒoa bɔl le tsã. Esi menɔ ameawo dome la, mekpɔ be wowɔa nu ɖe ɖoɖo nu hedea bubu ame ŋu eye esia to vovo kura na hoowɔwɔ kple tɔtɔ si yia edzi ne wole bɔl ƒom. Nu si mekpɔ le takpekpea me ʋãm mena Ðasefowo dze Biblia sɔsrɔ̃ gɔme kplim eye medea woƒe kpekpewo.

Nu siwo mesrɔ̃ le Biblia me wɔ dɔ ɖe dzinye ale gbegbe. Le kpɔɖeŋu me, Yesu gblɔ ɖi be le ŋkeke mamlɛawo me la yeƒe nusrɔ̃lawo aɖe gbeƒã Mawu Fiaɖuƒe ŋuti nya nyuia le xexea me godoo. (Mateo 24:14) Mesrɔ̃e hã be menye ga tae Kristotɔ vavãwo wɔa woƒe subɔsubɔdɔa ɖo o. Yesu gblɔ be: “Faa miexɔe, faa minae.”—Mateo 10:8.

Esi menɔ Biblia srɔ̃m la, metsɔa nya si Biblia gblɔ la sɔna kple nu siwo mekpɔna le Yehowa Ðasefoawo dome. Mekpɔa dzidzɔ ɖe kutri si wokuna ɖea gbeƒã Mawu Fiaɖuƒea ŋuti nya nyuia le xexea me godoo la ŋu ŋutɔ. Mekpɔe be wotsɔa wo ɖokuiwo saa vɔe abe ale si Yesu de se na eyomedzelawo be woawɔe ene. Eya ta esi mexlẽ Marko 10:21 eye mekpɔ Yesu ƒe amekpekpe be, ‘Va dze yonyeme’ la, medi be mava zu Ðasefo.

Ke hã, exɔ ɣeyiɣi hafi mete ŋu tso nya me nyuie. Le kpɔɖeŋu me, medaa nɔmba si ‘mesusu’ be eyae age le kwasiɖa sia kwasiɖa ƒe lotoa me. Ke hã, meva srɔ̃e le Biblia me be Mawu lé fu ame siwo subɔa “Aklama” kple ŋuklẽlawo siaa. (Yesaya 65:11; Kolosetɔwo 3:5) Eya ta metso nya me be madzudzɔ tsatsadada. Le Kwasiɖa gbãtɔ si medzudzɔ lotodada me la, nɔmba si ‘mesusu’ be eyae age la ge! Amewo kom elabe nyemedae kwasiɖa ma o, eye woƒoe ɖe nunye be madae le kwasiɖa si kplɔe ɖo me, gake nyemedae o. Medzudzɔ tsatsadada.

Gbe si gbe wonyrɔm ɖe tsi me le Yehowa Ðasefowo ƒe takpekpe aɖe me la, meto tetekpɔ aɖe si do nye “amenyenye yeye” kpɔ la me. (Efesotɔwo 4:24) Metrɔ yi amedzrodzeƒea le fiẽ ma, eye medo go nye ahiãvi xoxoa wònɔ lalam le nye ʋɔtrua nu. Egblɔ nam be, “Sammy, wòe ma, va míaɖu agbe vie!” Gake meɖo eŋu enumake be, “Kpao!” Mena wònya be mele agbe nɔm ɖe Biblia ƒe agbe nyui nɔnɔ ƒe nudidiwo nu fifia. (1 Korintotɔwo 6:18) Edo ɣli be, “Nu ka?” Ebu Biblia ƒe susu le nya sia ŋu nu tsɛe eye wòte tɔ ɖe edzi be míanɔ anyi abe tsã ene. Ke hã, ɖeko mege ɖe nye xɔ me kpoo eye metu ʋɔa. Egbea, enye dzidzɔ nam be magblɔ be tso esime meva zu Ðasefo le ƒe 1958 me la, meyi edzi lé tɔtrɔ siwo mewɔ la me ɖe asi nuteƒewɔwɔtɔe.

VIÐE SIWO MEKPƆ

Ewɔna nam be maŋlɔ agbalẽ tso viɖe siwo mekpɔ esi mele wɔwɔm ɖe Biblia ƒe mɔfiamewo dzi ŋu! Viɖe siawo dometɔ aɖewoe nye be xɔlɔ̃ vavãwo le asinye, tameɖoɖo vavã va le nye agbe ŋu eye mele dzidzɔ vavãtɔ kpɔm fifia.

Bezbɔlƒoƒo gadzɔa dzi nam kokoko, gake nye taɖodzinuwo trɔ. Mexɔ ŋkɔ eye mekpɔ ga le bɔlƒoƒo me, ke hã nu siawo menɔ anyi didi o. Gake ƒomedodo si le nye kple Mawu dome kpakple nɔviwo ƒe habɔbɔ si me mele ya anɔ anyi tegbee. Biblia gblɔ be: “Xexea kple eƒe nudzodzrowo nu va yina, ke ame si wɔa Mawu ƒe lɔlɔ̃nu la nɔa anyi yi ɖe mavɔmavɔ me.” (1 Yohanes 2:17) Fifiaa, melɔ̃ Yehowa Mawu kple eƒe amewo wu nu sia nu!