Míeƒo nu tso xotutu aɖe si me afakala aɖe si nɔ Delphi la ble Croesus si na Persia-fia ɖu edzi la ŋu va yi. Gake nyagblɔɖi vavã siwo ku ɖe Persia-fia ŋu eye wova eme tsitotsitso ye le Biblia ya me.

Anɔ ƒe 200 do ŋgɔ hafi woava dzi fia ma la, Hebritɔwo ƒe nyagblɔɖila Yesaya yɔ Kores ŋkɔ kaŋ be eyae ava xɔ Babilontɔwo ƒe dugã la eye wògblɔ ale si wòawɔe hã.

Yesaya 44:24, 27, 28: “Ale Yehowa, . . . gblɔe nye esi, ame si gblɔ na tɔ goglo la be: ‘Mie, eye mana wò tɔsisiwo katã namie’; ame si gblɔ le Kores ŋu be: ‘Nye lãkplɔvi wònye, awɔ nye didiwo katã dzi ade goe’; ame si gblɔ le Yerusalem ŋu be, ‘Woagbugbɔe atso,’ eye wògblɔ le gbedoxɔ la ŋu be, ‘Woaɖo egɔme anyi.’”

Helatɔ ŋutinyaŋlɔla Herodotus gblɔ be, Kores ƒe asrafowo trɔ mɔ na Frat-tɔsisi si sina to Babilon-dua me la ƒe tsiwo to teƒe bubu. Esia na Kores ƒe asrafowo zɔ to tɔʋua me ge ɖe dua me. Esi Kores xɔ dua megbe la, eɖe asi le Yudatɔ siwo nɔ aboyo me le Babilon la ŋu eye wòɖe mɔ na wo be woatrɔ ayi Yerusalem agbugbɔ du si wotsrɔ̃ ƒe 70 va yi la atso.

Yesaya 45:1: “Ale Yehowa gblɔ na Kores, eƒe amesiamina, ame si ƒe nuɖusi melé, ne mabɔbɔ dukɔwo ɖe anyi le eŋkume, ne maxɔ aʋawɔnuwo le fiawo si, ne maʋu ʋɔtru agaveewo le eŋkume, ale be agboawo natsi madomado” lae nye esi.

Persiatɔawo to ʋɔtru gã agave siwo nɔ gli si woɖo ɖe dua ŋu, siwo woʋu gblẽ ɖi ɖekematsɔlemetɔe la nu ge ɖe dua me. Ne ɖe Babilontɔwo nya nu si Kores ɖo be yeawɔ la, anye ne wotu agbo siwo katã nɔ tɔsisia dzi. Gake abe ale si wòdzɔe ene la, dua tsi nuvo.

Nyagblɔɖi vevi sia nye nyagblɔɖi geɖe siwo le Biblia me siwo va eme pɛpɛpɛ la dometɔ ɖeka ko. * Biblia me nyagblɔɖiwo mele abe nya siwo amewo gblɔna be yewoƒe alakpamawuwo gbɔe wotso la ene o, Biblia me nyagblɔɖiwo ya tso Ame si gblɔ be yenye: “Ame si gblɔa nu si ava dzɔ la tso gɔmedzedzea me ke, kple nu siwo womewɔ haɖe o la fiana tso gbe aɖe gbe ke” la gbɔ.—Yesaya 46:10.

Mawu vavã ɖeka kolia, si ŋkɔe nye Yehowa koe ate ŋu agblɔ nya siawo. Ŋkɔ ma gɔmee nye “Enana Wòvaa Eme.” Esia ɖe ŋutete si le Yehowa si be  wòanya etsɔme eye wòana nu siwo ava dzɔ le etsɔme hã nawɔ ɖeka kple eƒe lɔlɔ̃nu la fia. Eƒe ŋkɔa na míeka ɖe edzi be ana nu siwo katã ƒe ŋugbe wòdo la nava eme godoo.

NYAGBLƆÐI SIWO LE EME VAM EGBEA

Àdi be yeanya nu siwo Biblia gblɔ ɖi ku ɖe ŋkeke siwo me míele la ŋua? Biblia gblɔ ƒe 2,000 aɖewoe nye esia be, “ɣeyiɣi sesẽ siwo me nɔnɔ asesẽ” la ava le “ŋkeke mamlɛawo me.” Nu ka ƒe ŋkeke mamlɛawoe? Manye ŋkeke mamlɛawo na anyigbaa alo amegbetɔwo o, ke boŋ anye ŋkeke mamlɛawo na dzrehehe, ameteteɖeanyi kple fukpekpe siwo me amegbetɔwo to ƒe akpe geɖee nye esia la. Na míadzro nyagblɔɖi siawo dometɔ ʋɛ aɖewo siwo ku ɖe “ŋkeke mamlɛawo” ŋu la me kpɔ.

2 Timoteo 3:1-5: “Le ŋkeke mamlɛawo me la . . . , amewo anye ɖokuilɔ̃lawo, galɔ̃lawo, adegbeƒolawo, dadalawo, busunyagblɔlawo, ame maɖoto dzilawo, ame madakpewo, ame mawɔnuteƒewo, ame siwo melɔ̃a ame ƒe nya o, ame siwo melɔ̃na ɖe ɖoɖo aɖeke dzi o, ameŋugblẽlawo, ame siwo meɖua wo ɖokuiwo dzi o, ame wɔadãwo, ame siwo melɔ̃a nu nyui o, yomemɔfialawo, totrilawo, ame siwo doa wo ɖokuiwo ɖe dzi glodzoo, ame siwo lɔ̃a dzidzɔkpɔkpɔ wu esi woalɔ̃ Mawu, ame siwo ŋu ɖokuitsɔtsɔ na Mawu ƒe nɔnɔme dzena le, gake womenana wòkpɔa ŋusẽ ɖe woƒe agbe dzi o.”

Ðe màlɔ̃ ɖe edzi be aleae amewo ƒe nɔnɔme le egbea oa? Ède dzesii be ame siwo nye ɖokuilɔ̃lawo, galɔ̃lawo kple ame siwo me dada yɔ fũu domee míele egbea? Mèkpɔe be amewo va le wo ɖokuitɔ dim eye womegale didim be yewoalɔ̃ ɖe amewo ƒe susu dzi oa? Nyateƒee àde dzesii be ɖevi geɖe megaɖoa to wo dzilawo o eye amewo lɔ̃ dzidzɔkpɔkpɔ wu esi woalɔ̃ Mawu. Azɔ hã gbegblẽm koe nuwo le ɖe edzi.

Mateo 24:6, 7: “Miase aʋawɔwɔwo kple aʋawɔwɔwo ŋu nyawo. . . . Dukɔ atso ɖe dukɔ ŋu, eye fiaɖuƒe ɖe fiaɖuƒe ŋu.”

Akɔntabubuwo ɖee fia be aʋawɔwɔ gãwo kple suesuesue siwo dzɔ tso ƒe 1914 me la wu ame siwo wu miliɔn 100, agbɔsɔsɔ sia sɔ gbɔ wu ame siwo le dukɔ aɖewo me ƒe xexlẽme kura. Kpɔ ale si gbegbe aɖatsi ayɔ mo na amewo, woanɔ nu xam ahanɔ fu kpem le ame gbogbo siawo ƒe ku ta ɖa. Ðe dukɔwo srɔ̃ nane tso esia me eye wodzudzɔ aʋawɔwɔa?

Mateo 24:7: “Nuɖuɖu ave.”

Xexea Me Ƒe Nuɖunyawo Gbɔkpɔha gblɔ be: “Togbɔ be nuɖuɖu si ade ame sia ame nu le xexea si hã la, ame miliɔn 815 siwo nye ame ɖeka le asieke me tsia dɔ gbe sia gbe. Esi gavlo wue nye be ame ɖeka le etɔ̃ ɖe sia ɖe me mekpɔa nu nyui ɖuna o.” Wobu akɔnta be ɖevi miliɔn etɔ̃ ye kuna ƒe sia ƒe le dɔwuame ta.

Luka 21:11: “Anyigba aʋuʋu ŋɔdzitɔe le teƒeteƒewo.”

Anyigbaʋuʋu suesuesue 50,000 ye dzɔna ƒe sia ƒe. Wo dometɔ 100 gbãa xɔwo eye anyigbaʋuʋu sesẽ ɖeka ya teti dzɔna ƒe sia ƒe. Akɔntabubu aɖe gblɔ be, tso ƒe 1975 va ɖo ƒe 2000 me la, anyigbaʋuʋu na ame 471,000 ku.

Mateo 24:14: “Woaɖe gbeƒã Fiaɖuƒe ŋuti nya nyui sia le anyigba blibo la katã dzi be wòanye ɖaseɖiɖi na dukɔwo katã, eye ekema nuwuwu la ava.”

Yehowa Ðasefo siwo ƒe xexlẽme wu miliɔn enyi la le gbeƒã ɖem eye wole ɖase ɖim tso Mawu Fiaɖuƒe ŋuti nya nyuia ŋu le dukɔ 240 me le xexea me godoo. Wole nya nyuia gblɔm le dugãwo kple kɔƒewo me, le avewo me kple towo dzi. Nyagblɔɖia gblɔ be ne wowu dɔ sia nu pɛpɛpɛ abe ale si Mawu dii ene la, “nuwuwu la ava.” Nu kae nya ma fia? Efia be amegbetɔwo ƒe dziɖuɖuwo ava nuwuwu eye dziɖuɖu si nye Mawu Fiaɖuƒea adze dziɖuɖu gɔme. Ŋugbedodo kawoe ava eme ne Mawu Fiaɖuƒea le dzi ɖum? Míeɖe kuku yi nuxexlẽa dzi ne nàde dzesii.