Aleke wowɔa agbalẽ xatsaxatsawo le Biblia-ŋlɔɣiwo, eye aleke wozãa woe?

Lãgbalẽ kple pɛpa titri ƒe agbalẽ xatsaxatsa siwo dzi woŋlɔ Biblia-gbalẽ si nye Esta me nyawo ɖo emegbe le ƒe alafa 18 lia me

Woŋlɔ ɖe Luka ƒe Nyanyuigbalẽa me be Yesu ʋu Yesaya ƒe agbalẽ xatsaxatsaa eye wòxlẽe, eyome eŋlɔ́ agbalẽa. Le Yohanes ƒe Nyanyuigbalẽa ƒe nuwuwu la, Yohanes hã ƒo nu tso agbalẽ xatsaxatsa ŋu esi wògblɔ be, Yesu gawɔ dzesi bubu geɖewo, gake yemate ŋu aŋlɔ wo katã ɖe yeƒe agbalẽ xatsaxatsaa me o.—Luka 4:16-20; Yohanes 20:30; 21:25.

Aleke wowɔa agbalẽ xatsaxatsawoe? Wotsɔa aƒlagbalẽ alo lãgbalẽ ɖeɖiwo trena ɖe wo nɔewo nu wòzua agbalẽ lɔbɔɔ ɖeka. Wotea ŋu xatsaa eƒe axa emetɔ si dzi woŋlɔ nu ɖo la ɖe ati lɛɛ ŋu. Nuŋɔŋlɔa tsoa dzigbe vaa anyime eye enɔa agbakpuiwo me. Ne agbalẽa didi lɔbɔɔ la, woxatsaa eƒe gɔmedzeƒe kple nuwuƒe ɖe ati vovovo eve ŋu, eye nuxlẽlaa nɔa ekem kple asi ɖeka henɔa eŋlɔ́m kple asi kemɛ va se ɖe esime wòake ɖe akpa si dim wòle ŋu.

Nyagɔmeɖegbalẽ aɖe gblɔ be: “Nu si dea ame dzi le agbalẽ xatsaxatsa gomee nye be togbɔ be etea ŋu didina lɔbɔɔ (abe meta 10 ene zi geɖe) ale be agbalẽ blibo me nyawo nayi edzi hã la, wotea ŋu ŋlɔ́nɛ kpokploe.” (The Anchor Bible Dictionary) Le kpɔɖeŋu me, wobu akɔnta be Luka ƒe Nyanyuigbalẽa me nyawo katã anɔ agbalẽ xatsaxatsa si ƒe didime ade meta 9 kple afã dzi. Le agbalẽ xatsaxatsa aɖewo gome la, woɖea togawo ŋu keŋ eye wotsɔa afɔklɔkpe zrɔ̃a wo hedea ama wo.

Woƒo nu tso “nunɔlawo ƒe tatɔwo” ŋu le Kristotɔwo Ƒe Hela Ŋɔŋlɔawo me. Ame kawoe woanya nye?

Esi woɖo nunɔlawo ƒe dɔa anyi le Israel la, ame ɖeka koe nyea nunɔlagã, eye enɔa ɖoƒe sia va se ɖe eƒe kugbe. (4 Mose 35:25) Aron ye nye nunɔlagã gbãtɔ. Tso ema dzi yina la, viŋutsu tsitsitɔ ye xɔna ɖe fofoa teƒe le bubunɔƒe ma le ɖoɖoa nu. (2 Mose 29:9) Aron ƒe dzidzimevi siwo nye ŋutsuwo la dometɔ geɖewo zu nunɔlawo, gake wo dometɔ ʋɛ aɖewo koe nye nunɔlagãwo.

Esi dukɔ bubuwo va nɔ Israel-viwo dzi ɖum la, dziɖula siwo menye Israel-viwo o la ɖoa nunɔlagãwo alo xɔa dɔ le wo si ale si dze wo ŋu. Gake edze abe ɣesiaɣi kloe la, ƒome ʋɛ aɖewo siwo ŋu bubu le la domee wotiaa ame yeyeawo tsonɛ ene, eye zi geɖe la, wotsoa Aron ƒe dzidzimeviwo dome. Edze ƒãa be nunɔlawo dome ame ŋkutawoe woyɔna be “nunɔlawo ƒe tatɔwo.” Anɔ eme be nunɔlawo ƒe hatsotso 24 la ƒe tatɔwo, nunɔlagãwo ƒe ƒomewo me ame ŋkutawo kple nunɔlagã siwo si woxɔ dɔ le, abe Ana ene, hã nɔa nunɔlawo ƒe tatɔwo dome.—1 Kronika 24:1-19; Mateo 2:4; Marko 8:31; Dɔwɔwɔwo 4:6.