Dzo kpo yi emenuwo dzi

Dzo kpo yi emenuawo dzi

 ŊKULÉLE ÐE XEXEA ME ŊU

Susuhehe Yi Europa Dzi

Susuhehe Yi Europa Dzi

Europa nye teƒe si wodo vevie mawusubɔsubɔ le tsã, gake fifia nu siwo medo ƒome kple mawusubɔsubɔ o ŋue wotsi dzi ɖo wu. Ke hã awɔ nuku na wò be nu siwo dzena le Europatɔwo ƒe nyadzɔdzɔwo me la wɔ ɖeka kple nu siwo Biblia gblɔ.

Vi Si Vidada Ƒe Gbe Ðena Na Vidzĩwo

Numekula siwo le Milan, Italy ƒo nya ta be ne vidzĩ siwo ƒe ŋkeke mede hafi wodzi wo o le wo dada ƒe gbe sem to mɔ̃ aɖe si wode alɔnu na wo dzi la, edea woƒe lãmesẽ dzi le mɔ geɖe nu esime wokpɔtɔ le kɔa dzi. Wotrɔ asi le mɔ̃ sia ŋu wòɖi ale si vidzĩa sea dadaa ƒe gbe esime wòle eƒe dɔ me. Woƒo nya ta le numekukua me be, “ne vidzĩ siwo ƒe ŋkeke mede hafi wodzi wo o dze wo dada ƒe gbe sese gɔme kaba la, eɖea vi geɖe na wo.”

NYA SI BIBLIA GBLƆ: “Mena nye luʋɔ dze akɔ anyi eye wòli kpoo, abe ɖevi si wotso no na, si le dadaa gbɔ ene.”—Psalmo 131:2.

Dzidedeƒo Be Woadze Ame Ðokui Ŋu

Le Netherlands la, wowɔ numekuku aɖe tso ɖevi 565 ŋu, le numekukua me la, ɖevi siwo wo dzilawo bua wo be “wole vevie wu ɖevi bubuwo” eye le esia ta ele be “woawɔ nu ɖe wo ŋu etɔxɛ” la bua wo ɖokuiwo ame veviwoe wu ɖevi bubuwo. Ðevi siawo wɔa nu siwo ɖenɛ fiana be yewole ŋgɔ na ɖevi bubuwo, le esia ta ele be woawɔ nu ɖe yewo ŋu nyuie wu. Wogblɔ le numekukua me be, “ɖeviwo xɔnɛ sena ne wo dzilawo gblɔna na wo be wole vevie wu ame bubuwo. Esia made ɖeviawo ŋutɔwo kple dukɔa siaa dzi o.”

NYA SI BIBLIA GBLƆ: “Mele egblɔm na mia dometɔ ɖe sia ɖe be wòagabu eɖokui ŋu wu ale si dze o, ke boŋ be wòabu ale si wòanɔ ŋute le susu me ŋu.”—Romatɔwo 12:3.

Ƒe Alafa Ðeka Xɔla Siwo DI BE YEWOAYI EDZI ANƆ AGBE

Togbɔ be dɔléle kple lãmegbegblẽ ɖea fu na ame siwo xɔ ƒe alafa ɖeka hã la, didi vevi le wo me be yewoayi edzi anɔ agbe. Nu ma ŋue numekula siwo le Heidelberg Yunivɛsiti le Germany ke ɖo. Wokpɔe be wo dometɔ ene ɖe sia ɖe siwo wobia gbee la, dometɔ etɔ̃ di vevie be yewoanɔ agbe, eye wole agbagba dzem be yewoazã yewoƒe agbe le mɔ nyuitɔ nu. Woɖoa woƒe taɖodzinuwo gbɔ, wokpɔa mɔ be nuwo ava nyo, wosena le wo ɖokuiwo me be tameɖoɖo le agbe ŋu eye woléa mawusubɔsubɔ kple agbe nyui nɔnɔ ƒe dzidzenuwo me ɖe asi.

BU NYA SIA ŊU: Abe ale si wòdze le Nyagblɔla 3:11 ene la, nu kae didi si le mía me be míayi edzi anɔ agbe la ɖe fia?