Dzo kpo yi emenuwo dzi

Dzo kpo yi emenuawo dzi

 NU SI BIBLIA GBLƆ

Xexea Ƒe Nuwuwu

Xexea Ƒe Nuwuwu

Biblia gblɔ le 1 Yohanes 2:17 be, “Xexea kple eƒe nudzodzrowo nu va yina.” “Xexe” kae? Aleke enu ayii, eye ɣekaɣie?

“Xexe” kae awu enu?

NYA SI BIBLIA GBLƆ

Esi wònye be “nudzodzrowo” le xexea si si medzea Mawu ŋu o ta la, edze ƒãa be menye anyigba la ƒe nya gblɔm wole o. Ke boŋ ameƒomea ƒe xexe si medea bubu Mawu ŋu o, si na be wova zu eƒe futɔ lae wowɔnɛ. (Yakobo 4:4) Ame siwo katã ƒo ƒu nye xexe sia la “akpɔ tsɔtsrɔ̃ mavɔ ƒe tohehe.” (2 Tesalonikatɔwo 1:7-9) Ke hã ame siwo wɔ ɖe Yesu Kristo ƒe nya siwo wògblɔ be woaganye “xexea ƒe akpa aɖeke o” dzi la akpɔ agbe mavɔ.—Yohanes 15:19.

Biblia gblɔ le 1 Yohanes 2:17 ƒe akpa mamlɛa be: “ame si wɔa Mawu ƒe lɔlɔ̃nu la nɔa anyi yi ɖe mavɔmavɔ me.” Ɛ̃, ame si wɔa Mawu ƒe lɔlɔ̃nu la akpɔ agbe mavɔ le anyigba dzi afi sia abe ale si Psalmo 37:29 gblɔe ene be: “Ame dzɔdzɔewo anyi anyigba la dome, eye woanɔ edzi tegbee.”

“Migalɔ̃ xexea alo nu siwo le xexea me la o. Ne ame aɖe lɔ̃a xexea la, Fofo la ƒe lɔlɔ̃ mele eme o.”—1 Yohanes 2:15.

Aleke xexea awu enui?

NYA SI BIBLIA GBLƆ

Nuwuwua ava le akpa eve eme. Gbã la, Mawu atsrɔ̃ alakpasubɔsubɔha siwo gbolo aɖe si woyɔna be “Babilon Gã” la le tsitre ɖi na. (Nyaɖeɖefia 17:1-5; 18:8) Togbɔ be egblɔna be yewɔa nuteƒe na Mawu hã la, ewɔ ɖeka kple xexe sia me dziɖulawo. Gake dziɖula siawoe atrɔ ɖe eŋu. Eye “woawo alé fu gbolo la, woagblẽe aɖe amae, aɖu eƒe ŋutilã, [alo kesinɔnuwo] eye woatɔ dzoe wòafiã keŋkeŋ.”—Nyaɖeɖefia 17:16.

Eveliae nye be Mawu atrɔ ɖe dziɖulawo hã ŋu, eye wòatsrɔ̃ “anyigba blibo la dzi fiawo” kple ame vɔ̃ɖiwo katã ɖa le “Mawu Ŋusẽkatãtɔ la ƒe ŋkeke gã la ƒe aʋawɔwɔ” si wogayɔna be “Armagedon.” me.—Nyaɖeɖefia 16:14, 16.

“Midi Yehowa, mi ame siwo katã bɔbɔ mia ɖokui ɖe anyi le anyigba dzi . . . Midi dzɔdzɔenyenye, midi ɖokuibɔbɔ yome mɔ. Ðewohĩ woatsɔ mi aɣla le Yehowa ƒe dzikudogbe la.”Zefaniya 2:3.

 Ɣekaɣie xexea awu enu?

NYA SI BIBLIA GBLƆ

Ne woxlɔ̃ nu amewo le xexea me godoo tso Mawu Fiaɖuƒea si nye dziɖuɖu si axɔ ɖe amegbetɔwo ƒe dziɖuɖuwo teƒe la ŋu nyuie vɔ la, ekema nuwuwua ava. (Daniel 7:13, 14) Yesu Kristo gblɔ be: “Woaɖe gbeƒã Fiaɖuƒe ŋuti nya nyui sia le anyigba blibo la katã dzi be wòanye ɖaseɖiɖi na dukɔwo katã, eye ekema nuwuwu la ava.” (Mateo 24:14) Gbeƒãɖeɖedɔ sia si ɖea Mawu ƒe dzɔdzɔenyenye kple nublanuikpɔkpɔ fiana la nye “dzesi” vovovo siwo afia be míele nuwuwuŋkekeawo me la dometɔ ɖeka. Dzesia ƒe akpa bubu aɖewoe nye aʋawɔwɔ, anyigbaʋuʋu, dɔwuame, kple dɔléle siwo anɔ edzi yim le xexea ƒe akpa vovovowo.—Mateo 24:3; Luka 21:10, 11.

Tsɔ kpe ɖe nu siwo anɔ dzɔdzɔm le xexea me ŋu la, Biblia gblɔ nɔnɔme si anɔ amewo si le “ŋkeke mamlɛawo me.” Míexlẽ be: “Ɣeyiɣi sesẽ siwo me nɔnɔ asesẽ la ava. Elabena amewo anye ɖokuilɔ̃lawo, galɔ̃lawo, . . . ame maɖoto dzilawo, . . . ame siwo meɖua wo ɖokuiwo dzi o, ame wɔadãwo, ame siwo melɔ̃a nu nyui o, . . . ame siwo lɔ̃a dzidzɔkpɔkpɔ wu esi woalɔ̃ Mawu.” *2 Timoteo 3:1-5.

Xexe vɔ̃ɖi sia ‘nu ayi’ kpuie.—1 Yohanes 2:17

Nudzɔdzɔ kple amewo ƒe nɔnɔme siawo katã dze egɔme tso ɣeyiɣi si me Xexemeʋa Gbãtɔ dze egɔme le ƒe 1914 me lɔƒo. Eye tso ɣemaɣi la, Yehowa Ðasefowo le gbeƒã ɖem Mawu Fiaɖuƒea le xexea ƒe akpa sia akpa, eye enye bubu na wo be amewo nya be yewoe le dɔ sia wɔm. Le nyateƒe me la, woƒe magazine vevitɔ ƒe tanyae nye Gbetakpɔxɔ Le Gbeƒã Ðem Yehowa Ƒe Fiaɖuƒe.

“Eya ta minɔ ŋudzɔ, elabena mienya ŋkeke la alo gaƒoƒo la o.”Mateo 25:13.

^ mm. 14 Àte ŋu axlẽ nu geɖe tso nya sia ŋu le agbalẽ si nye Nuka Tututue Nye Biblia ƒe Nufiafia? ƒe ta 9 lia me. Yehowa Ðasefowoe tae. Àkpɔe le Internet hã dzi le www.jw.org/ee.