Dzo kpo yi emenuwo dzi

Dzo kpo yi emenuawo dzi

 NU SI BIBLIA GBLƆ

Mɔɖeɖeɖenuŋu

Mɔɖeɖeɖenuŋu

Amewo xɔxɔ atuu, tsɔtsɔke kple mɔɖeɖeɖenuŋu nana ŋutifafa nɔa amewo dome. Gake ɖe wòle be seɖoƒe nanɔ mɔɖeɖeɖenuŋu ŋua?

Nu vevi kae akpe ɖe mía ŋu míaɖe mɔ ɖe nanewo ŋu?

ALE SI NUWO LE EGBEA

Le xexea me godoo egbea la, mɔmaɖemaɖe na amewo va le gã dom ɖe edzi ŋutɔ, eye nu siwo gbɔ tsom wòle koŋue nye ŋutigbalẽ ƒe vovototo, nuto si me ame tso, dukɔmevinyenye, gbegbɔgblɔ ƒe vovototo kple subɔsubɔha zazɛ̃nyahelawo ƒe anyranuwɔwɔ.

NYA SI BIBLIA GBLƆ

Esime Yesu Kristo nɔ eƒe subɔsubɔdɔa wɔm le anyigba dzi la, ame siwo melɔ̃a ame ƒe nya o domee wònɔ. Yudatɔwo kple Samariatɔwo lé fu wo nɔewo vevie. (Yohanes 4:9) Wodea bubu ŋutsuwo ŋu wu nyɔnuwo. Yuda subɔsubɔhakplɔlawo doa vlo ame tsɛwo. (Yohanes 7:49) Gake Yesu Kristo ya to vovo kura. Ame siwo tsi tsitre ɖe eŋu la gblɔ be: “Ame sia xɔa nu vɔ̃ wɔlawo heɖua nu kpli wo.” (Luka 15:2) Yesu fa tu, egbɔ dzi ɖi eye wòlɔ̃ ame elabena menye ɖe wòva be yeabu fɔ amewo o, ke boŋ be yeakpe ɖe wo ŋu woadze si Mawu. Lɔlɔ̃ koŋue nye nu si ʋãe wòwɔ nu nenema.—Yohanes 3:17; 13:34.

Yesu ɖo mɔɖeɖeɖenuŋu ƒe kpɔɖeŋu ɖi, menye ɖe wòva be yeabu fɔ amewo o, ke boŋ be yeakpe ɖe wo ŋu woadze si Mawu

Lɔlɔ̃e nye nu vevi si akpe ɖe mía ŋu míaɖe mɔ ɖe nanewo ŋu ahakɔ dzi me ɖe ame ŋu togbɔ be woƒe blibomademade kple nuwɔna aɖewo madzɔ dzi na mí o hã. Kolosetɔwo 3:13 gblɔ be: “Miyi edzi miado dzi anɔ anyi kple mia nɔewo, eye miatsɔ anɔ mia nɔewo kem faa ne nya aɖe le ame aɖe si ɖe nɔvia ŋu.”

“Vevietɔ la, milɔ̃ mia nɔewo vevie, elabena lɔlɔ̃ tsyɔa nu vɔ̃ geɖe dzi.”1 Petro 4:8.

 Nu ka tae wòle be seɖoƒe nanɔ mɔɖeɖeɖenuŋu ŋu?

ALE SI NUWO LE

Le dukɔ geɖe me la, wodzea agbagba be woakpɔ egbɔ be amewo wɔ ɖe sewo kple ɖoɖowo dzi. Esia wɔnɛ be woxea mɔ ɖe nuwɔwɔ wòagbɔ eme nu.

NYA SI BIBLIA GBLƆ

“[Lɔlɔ̃] mewɔa nu si medze o.” (1 Korintotɔwo 13:5) Togbɔ be Yesu ɖo mɔɖeɖeɖenuŋu ƒe kpɔɖeŋu ɖi hã la, meɖe mɔ ɖe nu gbegblẽ wɔwɔ, alakpanuwɔwɔ kple nu baɖa wɔwɔ bubuwo ŋu o. Ke boŋ eƒo nu tsi tre ɖe nu mawo ŋu vevie. (Mateo 23:13) Egblɔ be: “Ame si wɔa nu gbegblẽwo la léa fu [nyateƒe ƒe] kekeli la.”—Yohanes 3:20.

Kristotɔ Apostolo Paulo gblɔ be: “Minyɔ ŋu nu vɔ̃ɖi; milé ɖe nu si nyo la ŋu.” (Romatɔwo 12:9) Eya ŋutɔ wɔ ɖe nya mawo dzi. Le kpɔɖeŋu me, esi Kristotɔ siwo nye Yudatɔwo ɖe wo ɖokui ɖa le xɔsetɔ siwo menye Yudatɔwo o ŋu la, Paulo ame si hã nye Yudatɔ la ƒo nu tsi tre ɖe nuwɔna ma ŋu, gake le tufafa me. (Galatiatɔwo 2:11-14) Enya be Mawu, ame si “mekpɔa ame ŋkume o” la, maɖe mɔ be Eƒe amewo nanɔ vovototo dem wo nɔewo dome o.—Dɔwɔwɔwo 10:34.

Esi Yehowa Ðasefowo nye Kristotɔwo ta la, wonana Biblia fiaa mɔ wo le agbe me. (Yesaya 33:22) Eya ta womeɖea mɔ ɖe nu gbegblẽ wɔwɔ ŋu le woƒe hamewo me o. Womeɖea mɔ na ame siwo mewɔna ɖe Mawu ƒe sewo dzi be woanɔ Kristo hame si le dzadzɛ la me o. Eya ta Ðasefowo wɔna ɖe Biblia ƒe mɔfiame si me kɔ la dzi be: “Miɖe ame vɔ̃ɖi la ɖa le miawo ŋutɔwo mia dome.”—1 Korintotɔwo 5:11-13.

“Oo mi ame siwo lɔ̃a Yehowa, mitsri vɔ̃.”Psalmo 97:10.

Ðe Mawu aɖe mɔ ɖe vɔ̃ɖinyenye ŋu ɖaa?

NU SI DZI AME GEÐE XƆ SE

Ale si amegbetɔwo le ta la, nu gbegblẽ wɔwɔ anɔ anyi ɖaa.

NYA SI BIBLIA GBLƆ

Nyagblɔɖila Habakuk do gbe ɖa na Yehowa Mawu be: “Nu ka tae nèle ameteteɖeanyi teƒe kpɔm? Nu ka tae tsɔtsrɔ̃ kple ŋutasesẽ le ŋkunyeme? Eye nu ka tae dzrewɔwɔ kple avuwɔwɔ bɔ?” (Habakuk 1:3) Mawu ka ɖe edzi na eƒe nyagblɔɖila si tɔtɔ la be yeabia akɔnta nu gbegblẽ wɔlawo. Mawu gblɔ tso ŋugbedodo sia ŋu be: “Ele eme va ge kokoko. Mahe ɖe megbe o!”—Habakuk 2:3.

Hafi ɣemaɣi naɖo la, mɔnukpɔkpɔ le ʋuʋu ɖi be nu gbegblẽ wɔlawo natrɔ tso woƒe mɔ vɔ̃wo dzi. “Aƒetɔ Dziɖulagã Yehowa be, ‘Ðe ame vɔ̃ɖi ƒe ku vivia nunyea? Menye ɖe medina be wòatrɔ tso eƒe mɔwo dzi ne wòanɔ agbe boŋ oa?’” (Ezekiel 18:23) Ame siwo ɖea asi le woƒe mɔ vɔ̃wo ŋu hetrɔna ɖe Yehowa ŋu la ate ŋu akpɔ mɔ na etsɔme nyui aɖe kple kakaɖedzi. Lododowo 1:33 gblɔ be: “Ame si ɖoa tom la, anɔ anyi dedie, aɖe dzi ɖi, eye vɔ̃ madzi ŋɔ nɛ o.”

“Esusɔ vie ko ame vɔ̃ɖiwo maganɔ anyi o . . . Ke ame fafawo anyi anyigba la dome, Eye dzi adzɔ wo geɖe ɖe ŋutifafa gbogbo la ŋuti.”Psalmo 37:10, 11.