Dzo kpo yi emenuwo dzi

Dzo kpo yi emenuawo dzi

 DUKƆWO KPLE AMEWO

Tsaɖiɖi Yi Mongolia

Tsaɖiɖi Yi Mongolia

GENGHIS KHAN, aʋawɔla kalẽtɔ aɖe si nɔ anyi le ƒe 1100 ƒe ƒeawo mee ɖo Mongolia Fiaɖuƒe gã anyi. Mongolia si li egbea nye fiaɖuƒe ma si nɔ anyi gbe aɖe gbe la ƒe akpa sue aɖe ko. Mongolia le Russia kple China dome, eye wònye anyigbadzidukɔ siwo me amewo mesɔ gbɔ ɖo fũu o la dometɔ ɖeka.

Mongolia-dua ƒe akpa aɖewo nye dzogbenyigba gãwo, to kɔkɔwo, eye tɔsisiwo kple tɔʋuwo hã li. Gobi Gbedadaƒo le dua ƒe anyiehe eye nuto sia xɔ ŋkɔ le blemalã klitsuwo ƒe ƒu siwo ta wokpɔ nyuie le afi ma ta. Mongolia ƒe anyigba kɔkɔ wu atsiaƒu ƒe sɔsɔme ade meta 1,580. Dua me tɔwo yɔa dua be “Dziŋgɔli Blɔ Ƒe Anyigba.” Ŋkɔ sia sɔ na dua ŋutɔ elabe ŋdɔ ʋuna ŋkeke 250 kple edzivɔ ƒe sia ƒe!

Lãklẽ si nɔa sno dzi

Vuvɔŋɔli kple dzomeŋɔli siaa nu sẽna ŋutɔ le Mongolia. Le dzomeŋɔli la, yame ƒe dzoxɔxɔ tea ŋu yia dzi va ɖoa keke Celsius 40 ke eye wòɖiɖina le vuvɔŋɔli toa Celsius 0 ŋu yia gɔme Celsius 40 ke. Mongoliatɔwo  ƒe akpa ɖeka le etɔ̃ me kloe nye tsatsalawo. Ŋutsuwo kple nyɔnuwo siaa fɔna ŋdi kanyaa dzea woƒe dɔwo gɔme, wofiaa gbɔ̃wo, nyiwo, kposɔwo kple sɔwo ƒe notsiwo. Mongoliatɔwo ƒe nuɖuɖuwo nyea nyinotsi kple bɔta kpakple nyinotsi babla, ʋulãwo, eye alẽlãe vivia wo nu wu.

Akpɔnɔvivi siwo wotsɔ nyinotsi kpekẽ wɔ hesia ɖe ŋdɔgbe

Mongoliatɔwo wɔa amedzro ŋutɔ. Womedoa woƒe avɔgbadɔawo ƒe ʋɔtruwo o ale be ame siwo zɔ mɔ va yina la nage ɖe wo me agbɔ ɖe me ahaɖu nuɖuɖu vivi siwo woda ɖe wo me. Zi geɖe la, wowɔa tii si me wokɔ nyinotsi kple dze vi aɖe ɖo la na amedzrowo.

Mongoliatɔ akpa gãtɔ nye Buddhatɔwo. Dua me tɔ aɖewo xɔ dzokawo kple gbesawo dzi se, ɖewo hã nye Moslemtɔwo kple Kristotɔwo, eye bubuwo hã be yewomele subɔsubɔha aɖeke me o. Yehowa Ðasefo 350 ye le Mongolia eye wole Biblia fiam ame 770 kple edzivɔwo fifia.

Baktriatɔwo ƒe kposɔ si ɖo kpo eve tea ŋu tsɔa agba toa fafa miamiamia me