Dzo kpo yi emenuwo dzi

Dzo kpo yi emenuawo dzi

 ÐE WOWƆEA?

Hawaiitɔwo Ƒe Totsitotsi Ƒe Dzosinu

Hawaiitɔwo Ƒe Totsitotsi Ƒe Dzosinu

HAWAIITƆWO ƒe totsitotsi alo akladzĩ daa ade le zã me, eye eya ŋutɔ sia akaɖi aɖe si sɔna kple ɣleti kple ɣletiviwo ƒe keklẽ. Le esi akaɖi sia nana lã bubuwo nakpɔe teƒe la, ɖe wònana boŋ be wometea ŋu kpɔnɛ o. Nu si kpena ɖe ƒumelã sia ŋu wòtea ŋu wɔa nu siae nye nugbagbevi suesue aɖewo siwo le eƒe dzosinu me siwo klẽna. Lã sia kple nugbagbevi suesue siawo ƒe dɔwɔwɔ aduadu alea ate ŋu aɖe vi na mí le go aɖe me. Ate ŋu ade míaƒe lãmesẽ dzi.

Bu nya siawo ŋu kpɔ: Hawaiitɔwo ƒe totsitotsi nɔa Hawaii Ƒukpoa ƒe ƒu siwo me kɔ la me. Ðe wòle be ɣleti kple ɣletiviwo ƒe keklẽ nana ƒumelã lénu siwo to totsitotsia gɔme va yina la nakpɔ eƒe vɔvɔli hafi. Gake dzo aɖe sina le totsitotsia ƒe ƒodo dzi si sɔna kple ɣleti ƒe keklẽ pɛpɛpɛ. Esia wɔnɛ be lã sia ƒe vɔvɔli medzena o. Nu si nana be lã sia tea ŋu wɔa “aɖaŋu deŋgɔ” siae nye nugbagbevi suesue aɖewo siwo le eƒe dzosinu la me. Nugbagbevi siawo sia dzo. Nugbagbevi suesue siawo ƒe dzoa ƒe keklẽ sɔna kple ɣleti ƒe keklẽ pɛpɛpɛ, si nana be ƒumelã lénuwo metea ŋu kpɔa totsitotsi la o.

Ðewohĩ nugbagbevi suesue siawo kpɔa ŋusẽ ɖe totsitotsia ƒe alɔ̃dɔdɔ kple eƒe nyɔnyɔ dzi. Numekulawo tsɔ ɖe le esia me vevie, elabe wosusui be ɖewohĩ nugbagbevi suesue siwo le nu gbagbe bubuwo hã me la kpɔa ŋusẽ ɖe ɖoɖo si nu woƒe ŋutilã wɔa dɔ ɖo gbe sia gbe la dzi. Le kpɔɖeŋu me, le lã siwo naa no vi gome la, nugbagbevi siwo nana be nuɖuɖu wɔa dɔ le lãme hã anya kpɔa ŋusẽ ɖe ɖoɖo si nu woƒe ŋutilã wɔa dɔ ɖo gbe sia gbe la dzi. Wogblɔ be ne nane tɔtɔ ɖoɖo si nu míaƒe ŋutilã wɔa dɔ ɖo gbe sia gbe la, etea ŋu hea blanuiléledɔ, suklidɔ, lolo fũu akpa kple alɔ̃dɔkuxiwo vɛ. Eya ta nusɔsrɔ̃ tso totsitotsi kple nugbagbevi siwo le eƒe dzosinua me ŋu ate ŋu ana woaganya nu geɖe tso amegbetɔwo ƒe lãmesẽ ŋu.

Nu kae nèsusu? Ðe totsitotsi ƒe dzosinu la dzɔ le eɖokui sia? Alo Wɔla lae wɔea?