Dzo kpo yi emenuwo dzi

Dzo kpo yi emenuawo dzi

“Mawu Kpe Ðe Mía Ŋu Míehaya”

“Mawu Kpe Ðe Mía Ŋu Míehaya”

NATALYA kple via ŋutsuvi Aslan si xɔ ƒe asieke xatsa wo ɖokuiwo ɖe Zarina kple via nyɔnuvi Anzhelika si xɔ ƒe wuieve la gbɔ. Ame tsitsi kple ɖevi siwo wu 1,000 hã nɔ anyi ɖe afi ma, eye amedzidzela siwo lé tu gãgãwo ɖe asi la nɔ wo ŋu dzɔm.

Le Kuɖa, September 1, 2004 ƒe ŋdi ma la, dzilawo kple wo viwo nɔ sukukpoa dzi nɔ dzadzram ɖo ɖe sukugɔmedzedze ƒe azã ŋu le Alania ƒe du sue si woyɔna be Beslan la me le Russia. Kasia, ame siwo lé tuwo ɖe asi eye wo dometɔ aɖewo kpla bɔmbwo ɖe wo ɖokuiwo ŋu la va do ɖe wo dome nɔ tu dam ɖe yame henɔ ɣli dom. Amedzidzela siwo wu 30 kplɔ ameha la ɖatu ɖe sukua ƒe kamedexɔ me eye woti bɔmbwo ɖe xɔa me katã.

Aʋadzedze Ði Kple Zitɔtɔ

Aleae wòdzɔe be ŋkeke etɔ̃ sɔŋ amedzidzelawo kple asrafowo dze aʋa ɖi ŋɔdzitɔe henɔ wo nɔewo kpɔm. Natalya, ame si Yehowa Ðasefowo nɔ Biblia srɔ̃m kple la gblɔ be: “Nyemedo gbe ɖa alea gbegbe kpɔ o.”

Dzomeŋɔlie, eya ta kamedexɔa me xɔ dzo gbãgbãgbã. Tso ŋkeke evelia ƒe ŋdi la, amedzidzelawo mena nuɖuɖu kple tsi woƒe aboyomeawo o. Eye kaka ŋkeke etɔ̃lia si nye Fiɖagbe naɖo la, aboyomeawo dometɔ aɖewo nɔ woƒe aɖuɖɔwo nom eye wonɔ seƒoƒo siwo ɖeviwo tsɔ vae na woƒe nufialawo la ɖum. Natalya gblɔ be: “Ŋutsuvi aɖe si nɔ anyi ɖe mía xa la tsɔ eƒe seƒoƒoa ƒe ɖe de asi nam. Memae ɖe eve tsɔ na Anzhelika kple Aslan.”

Le ŋkeke etɔ̃a gbe la, zi tɔ. Natalya gblɔ be: “Bɔmb ƒe wówo na medze anyi, dzudzɔ bla ɖe xɔa me eye wode asi tudada me.” Esi asrafoawo kple amedzidzelawo nɔ tu dam wo nɔewo la, Natalya kple Aslan ta ɖɔɖɔɖɔ dzo. Nutoa me Ossetiatɔ aɖe  kplɔ wo yi ɖada ɖe dedienɔƒe. Ame gbogbo aɖewo ya tsi eme.

Le Nudzɔdzɔa Megbe

Anzhelika ku le zitɔtɔa me

Ame tsitsi kple ɖevi alafa geɖewo ku, Anzhelika hã ku. Avifafa kple konyifafa ɖi le Beslan kwasiɖa geɖewo. Natalya ƒe aƒea dze ŋgɔ sukua, eye esi wova tu suku yeye ɖe wo gbɔ gɔ̃ hã la, Aslan gavɔ̃na kokoko eye melɔ̃na be yeayi sukua o. Megadona ɖafena gɔ̃ hã o. Natalya gblɔ be: “Míeƒo koko na Yehowa be wòakpe ɖe eŋu wòaɖu vɔvɔ̃a dzi.” Le ɣeyiɣi aɖe megbe la, dzi va ɖo eƒo wògate sukua dede.

Esesẽna na Natalya be wòade Kristotɔwo ƒe kpekpewo le Fiaɖuƒe Akpata me. Egblɔ be: “Ne mele amewo dome le xɔ aɖe me la, ewɔna nam be wogbɔna teƒea dzi dze ge. Medoa gbe ɖa be naneke nagadzɔ o. Le ɣeyiɣi aɖe megbe la, meva dzudzɔ kpekpeawo dede. Etena ɖe dzinye hã be ame gbogbo mawo ku, gake míawo ya míetsi agbe.”

Míehaya

Natalya gblɔ be: “Medaa akpe na hamea me tɔ siwo yi edzi le kpekpem ɖe ŋunye. Ðasefo aɖe si ŋkɔe nye Tatyana va kpɔam ɖa godoo ŋkeke etɔ̃ ɖe sia ɖe. Emegbe eva kplɔ Ðasefo bubu aɖe si ŋkɔe nye Ulyana va gbɔnye. Ulyana nyoa dɔme, ɖɔa ŋu ɖo, eƒe gbe le blewuu, eye wònya Biblia nyuie. Ekafuam ɖe nye agbagbadzedzewo ta eye wòɖoa tom ŋutɔŋutɔ ne mele nu ƒom.

“Fifia metea ŋu ƒoa nu tso nudzɔdzɔ ma ŋu vevesese kple vɔvɔ̃ manɔmee”

“Ulyana xlẽ nya si apostolo Paulo gblɔ le 2 Korintotɔwo 1:9 nam. Esi Paulo to nɔnɔme sesẽ aɖe me le Asia la, egblɔ be: ‘Míesusu be wotso kufia na mí.’ Exlẽ Yesaya 40:31 hã nam. Mawunyakpukpui ma gblɔ be: ‘Ŋusẽ yeye aɖo ame siwo kpɔa mɔ na Yehowa ya ŋu. Woadzo ayi dzi abe hɔ̃ ene.’ Mawunyakpukpui siawo tɔgbi kple kpekpeɖeŋu siwo Ulyana kpakple ame bubuwo nam la do ŋusẽm ale be nye kple vinyewo míegadze Kristotɔwo ƒe kpekpewo dede gɔme. Gake nye dzi medzea eme ne mele xɔ si me amewo sɔ gbɔ ɖo la me o.”

Zarina va zu Yehowa Ðasefo eye wòle mɔ kpɔm na ɣeyiɣi si me woafɔ via Anzhelika wòava nɔ agbe le anyigba nyakpɔ si dzi ŋutifafa axɔ aƒe ɖo, si dzi Mawu Fiaɖuƒea aɖu la dzi. (Mateo 6:9, 10; Dɔwɔwɔwo 24:15) Natalya kple viawo xɔ nyɔnyrɔ zu Yehowa Ðasefowo le ƒe 2009 me. Wogakpɔtɔ le afi si sukua ƒe kamedexɔa ƒe glikpowo le, gake nudzɔdzɔ ma meganana ŋɔdzi léa wo o. Natalya gblɔ be: “Fifia metea ŋu ƒoa nu tso nudzɔdzɔ ma ŋu vevesese kple vɔvɔ̃ manɔmee. Mawu kpe ɖe mía ŋu míehaya.”