Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nyɔ!  |  December 2014

 GBEBIAME | STEPHEN TAYLOR

Gakɔntafialagã Aɖe Ƒe Xɔse

Gakɔntafialagã Aɖe Ƒe Xɔse

Nufialagã Stephen Taylor fiaa nu hekua nu me le Sydney ƒe Mɔ̀ɖaŋununya Yunivɛsiti le Australia. Esrɔ̃ nu tso gakɔntaŋutinunya kple ɖoɖowɔwɔ ɖe ga ŋu nyuie ŋu. Nyɔ! magazinea talawo bia gbee tso ŋusẽ si eƒe numekukua kpɔ ɖe eƒe xɔse dzi la ŋu.

Ƒo nu tso ɖokuiwò ŋu na mí.

Dzinyelawo nye sɔlemedela anukwareɖila siwo doa vevie dɔ wɔna. Wodea dzi ƒo nam be masrɔ̃ agbalẽ ayi ŋgɔ, eya ta mesrɔ̃ nu tso asitsatsa ŋu le New South Wales Yunivɛsiti. Mekpɔe be numekuku dzɔa dzi nam ŋutɔ, eya ta metsɔe ɖo dɔe.

Nu kawo ŋue nèkua nu me le?

Medi vevie be manya nu tso ale si gadedɔme ƒe ɖoɖowo wɔa dɔe la ŋu nyuie. Gadedɔmedɔwɔƒewo ɖea mɔ na amewo wodea ga adzɔhawo me alo ɖea woƒe ga si wode adzɔhawo me. Megakua nu me tso nu siwo kpɔa ŋusẽ ɖe gadedɔme ƒe ɖoɖowo dzi la ŋu.

Gblɔ eƒe kpɔɖeŋu aɖe na mí.

Wobia tso dɔwɔƒewo si be woanɔ akɔnta nam tso woƒe viɖewo ŋu edziedzi. Ame siwo dea ga dɔ me nɔa te ɖe akɔnta siawo dzi nyaa dɔwɔƒea ƒe ganyawo ƒe nɔnɔme. Gake mɔ siwo dzi dɔwɔƒewo tona bua akɔnta le woƒe viɖewo ŋu dometɔ aɖewo menɔa ɖoɖo nu o. Glãkahelawo ate ŋu abui be ɖe dɔwɔƒeawo toa mɔ mawo dzi be yewoaɣla ale si tututu woƒe dɔwɔƒeawo ƒe ganyawo le. Eya ta aleke ame siwo dea ga dɔ me awɔ anya ale si tututu dɔwɔƒeawo ƒe ganyawo le? Eye nyatakaka kawoe gadedɔmedzikpɔlawo hiã ale be gadedɔmedɔwɔƒewo nazɔ nyuie? Nyatakaka mawo ŋue nye kple nye dɔwɔhatiwo míele nu me kum tsoe fifia.

 Ƒo nu tso wò mawusubɔsubɔ ŋu na mí.

Nye kple dzinyelawo míedea sɔleme le Presbiteria-ha me, gake esi meɖo sɔhɛme la, medzudzɔ edede. Mexɔ Wɔlaa dzi se eye medea bubu Biblia hã ŋu, gake ewɔna nam be subɔsubɔhawo mete ŋu le kpekpem ɖe amewo ŋu wole woƒe kuxiwo gbɔ kpɔm o. Ewɔna nam be sɔlemehawo meto vovo tso fefewɔhawo gbɔ o. Le Europa la, mede sɔleme gã geɖewo, gake nyemetea ŋu sea nu si tae wozi kesinɔnu gbogbowo ɖi evɔ ahedada bɔ ɖe xexea me alea gbegbe la gɔme o. Nu sia ɖe fu na nye susu vevie eye nyemegava tsɔa ɖeke le sɔlemehawo ƒe nya me o.

Nu kae na nètrɔ susu?

Yehowa Ðasefowo te Biblia-sɔsrɔ̃ kple srɔ̃nye Jennifer, eye wòdze woƒe kpekpeawo dede gɔme, eya ta megblɔ na ɖokuinye be anyo be mayi kplii aɖakpɔ nu si wowɔna le afi ma ɖa. Meva kpɔe be nyemenya naneke tso Biblia ŋu o. Esia wɔ nuku nam ŋutɔ! Eya ta Ðasefoawo te Biblia-sɔsrɔ̃ kplim.

Mɔ si nu Ðasefoawo srɔ̃a nu le la wɔ dɔ ɖe dzinye ale gbegbe. Wobiaa nya, dia kpeɖodziwo hedea ŋugble tso wo ŋu, eye wotsoa nya me wòwɔa ɖeka kple nu si ŋu woke ɖo. Nenema tututue nye hã mewɔna le nye numekukuwo me. Mexɔ nyɔnyrɔ hezu Yehowa Ðasefo le ƒe 1999 me, srɔ̃nye ya xɔ nyɔnyrɔ ƒe ʋɛ aɖewo do ŋgɔ nam.

Ðe gaŋutinunya kpe ɖe ŋuwò nèxɔ Biblia dzi se geɖe wua?

Ɛ̃! Le kpɔɖeŋu me, Se si Mawu na blema Israel la, kpɔ ga kuxi siwo ŋu gaŋutinunyalawo gbãa ta le egbea la gbɔ. Sea bia tso Israel-viwo si be woagblẽ woƒe agblemenuwo ƒe ɖe ɖi na ame dahewo (esɔ kple adzɔxexe kple nugblẽfexeɖoɖo), woado ga na hiãtɔwo dememaxɔmaxɔe (esɔ kple mɔnunana amewo be woado ga) eye woagbugbɔ anyigba ana anyigbatɔ si ƒe domenyinu wònye la ƒe 50 ɖe sia ɖe (esɔ kple nutɔnyenye ƒe gomenɔamesi). (3 Mose 19:9, 10; 25:10, 35-37; 5 Mose 24:19-21) Ðoɖo sia kple bubuwo kpe ɖe dukɔa ŋu le mɔ vevi etɔ̃ nu: (1) ekpena ɖe wo ŋu le gakuxiwo me, (2) ekpena ɖe wo ŋu wodona le ahedada si me wonɔ eteƒe didi la me eye (3) enana be ga menɔa ame aɖewo si kpaŋkpaŋ evɔ ame aɖewo ya daa ahe kolikoli o. Eye siawo katã yi edzi ƒe 3,000 kple edzivɔ hafi wova to gaŋutinunya vɛ.

Biblia dea agbenɔnɔ aɖewo ƒe dzi ƒo siwo wɔnɛ be ame ƒoa asa na gakuxiwo. Le kpɔɖeŋu me, efia amewo be woanye anukwareɖilawo, nyateƒetolawo, nublanuikpɔlawo kple dɔmenyolawo. (5 Mose 15:7-11; 25:15; Psalmo 15) Nukutɔe la, le xexea me ganyawo ƒe zitɔtɔ si va eme nyitsɔ laa megbe la, asitsatsa ƒe sukuwo kple habɔbɔwo le eƒom ɖe asitsalawo kple gaŋutidɔwɔlawo nu be woaka atam be yewoalé agbe nyui nɔnɔ ƒe se aɖewo me ɖe asi. Nye ya mekpɔe be Biblia me sewo de ŋgɔ sãsãsã wu adzɔdolawo ƒe se mawo.

Ŋusẽ kae wò xɔse kpɔ ɖe dziwò?

Biblia-sɔsrɔ̃e nye nu nyuitɔ kekeake si mewɔ kpɔ

Srɔ̃nye Jennifer be mesea nu gɔme fifia wu. Tsã la, medina be woawɔ nu sia nu pɛpɛpɛ. Ðewohĩ emae na mekpɔ dzidzedze le gakɔntaŋutinunya me! Edze ƒãa be agbenɔnɔ ɖe Biblia ƒe mɔfiamewo nu na meva da sɔ wu. Fifia, mele dzidzɔ kpɔm eye nye ƒomea hã le dzidzɔ kpɔm wu tsã. Biblia me nunya tuameɖowo fiafia amewo hã dzɔa dzi na mí ŋutɔ. Biblia-sɔsrɔ̃e nye nu nyuitɔ kekeake si mewɔ kpɔ.