Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nyɔ!  |  December 2014

 NU SI BIBLIA GBLƆ

Anyigba

Anyigba

Tame kae Mawu ɖo ɖe anyigba la ŋu?

“Yehowa, dziƒowɔla, eya ame si nye Mawu, eya ame si mè anyigba, eye wòwɔe; eya ame si ɖoe anyi, menye ɖe wòwɔe, be wòatsi ƒuƒlu o, ke boŋ ɖe wòmèe, be woanɔ edzi.”Yesaya 45:18.

NYA SIWO AMEWO GBLƆNA

Ame geɖe gblɔna be anyigba ŋutɔ koe dzɔ le eɖokui si. Subɔsubɔha aɖewo fiaa nu be anyigba nye teƒe si Mawu doa amewo kpɔ le ɣeyiɣi ʋɛ aɖe nenye be wodze ayi dziƒo loo alo ayi dzo mavɔ me.

NYA SI BIBLIA GBLƆ

Biblia gblɔ be “Mawu wɔ dziƒo kple anyigba.” (1 Mose 1:1) Egblɔ na atsu kple asi gbãtɔ be: “Midzi, ne miasɔ gbɔ, eye miayɔ anyigba la dzi, eye mianye agbo ɖe edzi, miaɖu ƒumelãwo kple dziƒoxe dzodzoewo kple lã, siwo katã zɔna le anyigba dzi la dzi!” (1 Mose 1:28) Egblɔ be ne womeɖo to ye o ko hafi woaku. (1 Mose 2:17) Eya ta ɖe Mawu ɖoe be anyigba nanye amegbetɔwo nɔƒe tegbee. Eɖoe be amegbetɔ toɖolawo nayɔ edzi, alé be nɛ ahanɔ edzi tegbee.

 Ðe woatsrɔ̃ anyigba la?

“Eɖo anyigba gɔme anyi ɖe eƒe anyinɔwo dzi, ne magaʋã gbeɖe akpɔ o.”—Psalmo 104:5.

NYA SIWO AMEWO GBLƆNA

Dzɔdzɔmeŋutinunyalawo yɔa nu vovovo siwo ate ŋu ana anyigba ŋutɔ loo alo nu gbagbe siwo le edzi la natsrɔ̃ keŋkeŋ. Wogblɔna be nu siwo ate ŋu atsrɔ̃ anyigba la dometɔ aɖewoe nye ɣletinyigba suewo alo ɣletivitoasikewo ƒe ŋgokpekpe kple anyigba, dzoto gãwo ƒe wòwo, ɣea ƒe tsɔtsrɔ̃ alo xexea me ƒe dzoxɔxɔ kpakple amegbetɔwo ƒe nuwɔnawo abe nukliaʋawo alo dɔlékuiwo tsɔtsɔ tsrɔ̃ nu gbagbewoe ene.

NYA SI BIBLIA GBLƆ

Tame si Mawu ɖo ɖe anyigba la ŋu metrɔ o. Mawu ƒe Nya la gblɔ eme kɔ be: “Anyigba ya li tegbee.” (Nyagblɔla 1:4) Gakpe ɖe eŋu la, amegbetɔwo anɔ edzi tegbee: “Ame dzɔdzɔewo anyi anyigba la dome, eye woanɔ edzi tegbee.”Psalmo 37:29.

NU KA TAE WÒLE VEVIE?

Esi ame aɖewo xɔe se be anyigba atsrɔ̃ ta la, wole anyigbadzinu xɔasiwo dome gblẽm. Ena be ame aɖewo hã bua mɔkpɔkpɔ eye wonɔa agbe hena egbe ko. Esia nana be tameɖoɖo gobi aɖeke menɔa woƒe agbe ŋu o. Gake ne míexɔnɛ sena be míava nɔ agbe tegbee le anyigba dzi la, enana míewɔa nu siwo aɖe vi na míawo ŋutɔwo kple míaƒe ƒomewo fifia kple etsɔme siaa.

Dziƒoe amegbetɔwo katã ava nɔ mlɔeba?

“Dziƒo enye dziƒo na Yehowa, ke etsɔ anyigba na amegbetɔviwo.”—Psalmo 115:16.

NYA SIWO AMEWO GBLƆNA

Ame geɖe xɔe se be ame nyuiwo katã yia dziƒo.

NYA SI BIBLIA GBLƆ

Dziƒoe nye Mawu tɔ, gake etsɔ anyigba la na amegbetɔwo. Biblia ƒo nu tso “anyigba si gbɔna, si dzi amewo anɔ” la ŋu. (Hebritɔwo 2:5) Yesue nye ame gbãtɔ si yi dziƒo eye Biblia gblɔ be ame ʋɛ aɖewo ayi dziƒo hena dɔ tɔxɛ aɖe wɔwɔ. Wo kple Yesu “woaɖu fia ɖe anyigba la dzi.”Nyaɖeɖefia 5:9, 10; Luka 12:32; Yohanes 3:13.

NU KA TAE WÒLE VEVIE?

Dzixɔse sia si nye be ame nyuiwo katã ayi dziƒo la mewɔ ɖeka kple nu si Biblia fia o. Ne Mawu ana ame nyuiwo katã nayi dziƒo la, ke afia be mewɔ ɖe tame si wòɖo le gɔmedzedzea me ɖe anyigba la ŋu la dzi o, eye ŋugbe si wòdo be yeana amegbetɔ nanɔ agbe tegbee le anyigba dzi la hã menye nyateƒe o. Gake Mawu ƒe Nya la gblɔ be: “Kpɔ mɔ na Yehowa, eye nalé ŋku ɖe eƒe mɔwo ŋu, ekema ado wò ɖe dzi, ne nanyi anyigba la dome.”Psalmo 37:34.