Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nyɔ!  |  July 2014

 NYATI SI LE AKPAA DZI | NE NYA VƆ̃ AÐE DZƆ

Ne Wò Lãme Gblẽ

Ne Wò Lãme Gblẽ

Mabel le Argentina nye nyɔnu aɖe si doa vevie nu le agbe me eye wòkpena ɖe dɔnɔ siwo gbɔ tso kɔdzi ŋu wodea kame be woƒe lãme nasẽ nyuie. Le ƒe 2007 me la, ɖeɖi va nɔ eŋu tem vevie eye ta ɖunɛ kutɔkutɔe gbe sia gbe. Egblɔ be: “Meyi ɖɔkta geɖewo gbɔ eye atike kae li womewɔ nam o, gake gbeɖea koe.” Mlɔeba wova wɔ dodokpɔ si nye MRI na Mabel, eye wokpɔe be nu te ahɔhɔ̃ me nɛ. Egblɔ be: “Dzidzi ƒom! Nyemete ŋu xɔe se be futɔ sia le ŋunye metsɔ le yiyimee o.

“Ke hã nyemenya ale si gbegbe nye agbe ɖo afɔku mee o va se ɖe esime wowɔ dɔ nam hafi. Esi menyɔ tso alɔ̃ me le dɔwɔwɔ nam vɔ megbe la, nyemegate ŋu le ʋaʋãm o. Xɔdzisasrã koe mete ŋu le kpɔkpɔm. Kasia ko, nye ŋutɔ pɛ nyemegate ŋu le naneke wɔm o. Metɔtɔ le ŋkeke siwo metsɔ nɔ kɔ ma dzi la me ŋutɔ, eye dɔdalawo ƒe dɔwɔnuwo, toklãnamɔ̃wo kple dɔnɔ bubuwo ƒe ŋeŋe koe menɔa sesem. Ne ɖe mate ŋu atu nye vevesesea kple fukpekpea ɖe ya me la adzɔ dzi nam ŋutɔ.

“Egbea, nye lãmea ka ɖe eme vie. Metea ŋu zɔna le ɖokuinye si, eye nye ɖeka metea ŋu dona ɣeaɖewoɣi gɔ̃ hã. Gake menɔa nu kpɔm eveve, eye nye lãkusiwo mewɔa dɔ nyuie o.”

TENƆNƆ ÐE LÃMEGBEGBLẼ NU

Wò susu nenɔ nu nyuiwo ŋu. Biblia gblɔ le Lododowo 17:22 be: “Dzi kpɔdzidzɔ nana lãme hayana, ke gbɔgbɔ xanu nana ƒuwo ƒuna kplakplakpla.” Mabel gblɔ be: “Esi menɔ kame dem be nye lãme nasẽ la, nye hã meto nu siwo gbegbe me dɔnɔ siwo ŋu mekpena ɖo la tona ke me. Kamedefefeawo nana mesea veve vevie, eye ewɔna nam ɣeaɖewoɣi be madzudzɔ. Medzea agbagba vevie ɖea susu ma ɖa, elabena menyae be nye kutrikukua ahe viɖe vɛ nam mlɔeba ta.”

Kpɔ mɔ na nu nyuiwo be nàte ŋu ado dzi. Mabel gblɔ be: “Mekpɔ nu si tae nya vɔ̃wo dzɔna ɖo la le Biblia me. Eye menyae hã be ŋkeke sia ŋkeke si va yina la, míele tetem ɖe ɣeyiɣi si me vevesesewo katã nu ayi tegbee la ŋu.” *

De dzesii be Mawu tsɔ ɖe le eme na wò. (1 Petro 5:7) Mabel gblɔ ale si esia nyanya kpe ɖe eŋui la ale: “Esi wokplɔm yi amekoƒe la, mekpɔ ŋugbe si Mawu do le Yesaya 41:10 ƒe nyateƒenyenye dze sii, egblɔ le afi ma be: ‘Mègavɔ̃ o, elabena meli kpli wò.’ Nye dzi dzea eme ale gbegbe elabe menyae be Yehowa Mawu tsɔa ɖe le nu si me tom mele la me.”

Ènyaa? Biblia gblɔ be ɣeyiɣi aɖe gbɔna esime ame aɖeke magadze dɔ o.Yesaya 33:24; 35:5, 6.

^ mm. 8 Àte ŋu axlẽ nu geɖe tso nya sia ŋu le agbalẽ si nye Nuka Tututue Nye Biblia ƒe Nufiafia? ƒe ta 11 lia me.