Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nyɔ!  |  April 2014

 DUKƆWO KPLE AMEWO

Tsaɖiɖi Yi Cambodia

Tsaɖiɖi Yi Cambodia

NE ÈYI Cambodia-dua ƒe akpa aɖewo la, nu siwo nàkpɔ la dometɔ aɖewoe nye kɔƒedu siwo le tɔ dzi, ame siwo le asi ɖim, zemidzãtɔ (dzokekedola) siwo lɔa agba ɖe sia ɖe ƒomevi, eɖanye koklogba alo nufamɔ̃ o.

Wonya Cambodiatɔwo be wodoa vivi ɖe ame ŋu, wowɔa xɔlɔ̃ eye woléa nɔvisi. Zi geɖe ne wodo go la, woyɔa wo nɔewo be efo, davi, tasi, tɔɖia, mama alo tɔgbui, ne womekpɔ amea kpɔ o gɔ̃ hã.

Cambodiatɔ aɖewo ƒe aƒe nyea tɔdziʋu siwo le tɔ dzi, eye bubuwo hã tɔ nyea xɔ siwo wotu ɖe sɔti tsralawo dzi ɖe tɔ dzi. Wotu sukuwo, kɔdziwo, asiwo kple mɔmemidzraƒewo gɔ̃ hã ɖe tɔ dzi

Atikutsetse ƒomevi aɖe si woyɔna be Dragon nye woƒe nuɖuɖu vivi aɖe

Mɔlu nye Cambodiatɔwo ƒe nuɖuɖu vevitɔ. Wotsɔa nuɖuɖu vovovo etɔ̃ alo ene siwo dome detsi hã nɔna ɖoa kplɔ̃e zi geɖe. Wolɔ̃a tɔmelãɖuɖu. Wotea ŋu tsɔa nuɖuɖu siwo vivina, esiwo lãna kple esiwo ƒo dzeve ɖoa kplɔ̃e zi ɖeka.

Anɔ abe ƒe akpe eve aɖewoe nye esi va yi la, Indiatɔ asitsala kple xɔsetamɔzɔla siwo ɖoa ta China la va  toa Cambodia-ƒuta eye wotsɔa seda kple gakpo ɖɔlia nu ʋeʋĩwo, ati ʋeʋĩwo, nyiɖuwo kple sika. Le ƒe geɖe megbe la, Cambodiatɔwo va xɔ Indiatɔwo kple Chinatɔwo ƒe subɔsubɔwo wɔ wo tɔe. Aleae wòdzɔe be Hindu-subɔsubɔ kple Buddha-subɔsubɔ va xɔ aƒe ɖe wo dome. Egbea la, Cambodiatɔ 90 le alafa me nye Buddhatɔwo.

Yehowa Ðasefowo ɖea gbeƒã Biblia me mɔkpɔkpɔgbedeasia le Cambodia. Wozãa agbalẽ si nye Nuka Tututue Nye Biblia ƒe Nufiafia? tsɔ kpena ɖe ame geɖe ŋu. Wota agbalẽ sia ɖe gbegbɔgblɔ siwo ade 250 me, eye ele Cambodiagbe hã me.

Yehowa Ðasefowo le nu srɔ̃m kple ame 1,500 kple edzivɔwo le Cambodia eye wokpena ɖe wo ŋu wokpɔa ŋuɖoɖo na nyabiase siwo dometɔ aɖewoe nye “Afi kae ame kukuwo le?” kple “Nu ka tae Mawu wɔ anyigba la ɖo?”

Agbalẽ si nye Nuka Tututue Nye Biblia ƒe Nufiafia?, si Yehowa Ðasefowo ta la le Cambodiagbe me (abe ale si wòdze le afi sia ene).