Ðe wònye nu gbegblẽ be woano aha sesẽa?

“Wain doa dzidzɔ na amegbetɔ ƒe dzi, eye wònana eƒe mo zrɔ̃na lãlãlã wu ami; ke abolo doa ŋusẽ amegbetɔ ƒe dzi.”Psalmo 104:15.

NYA SIWO AMEWO GBLƆNA

Le ƒome geɖewo me la, womefena kple aha sesẽ kura o, eye wononɛ le nuɖuɣiwo. Ke le ƒome bubuwo ya me la, wotsri aha sesẽ nono vevie. Nu ka gbɔe wòtso be amewo ƒe susu to vovo? Nu siwo gbɔ wòtso la dometɔ aɖewoe nye dekɔnu, lãmesẽnyawo kple mawudzixɔse.

NYA SI BIBLIA GBLƆ

Biblia ƒo nu tsi tre ɖe ahamumu kple aha tsu nono ŋu, gake meƒo nu tsi tre ɖe enono ɖe ŋku nu ŋu o. (1 Korintotɔwo 6:9, 10) Le nyateƒe me la, ŋutsu kple nyɔnu mawusubɔla siwo nɔ anyi le blema la no wain, eye Biblia ƒo nu tso aha ŋu wòwu zi alafa eve sɔŋ. (1 Mose 27:25) Nyagblɔla 9:7 gblɔ be: “[Ðu] wò abolo kple dzidzɔ, eye nàno wò wain le dzidzeme me.” Elabena wain nana dzi kpɔa dzidzɔ eye zi geɖe la, wotsɔa wain ɖoa kplɔ̃ le azãɖuƒewo, abe srɔ̃ɖekplɔ̃ɖoƒewo ene. Teƒe siawo dometɔ aɖee Yesu Kristo wɔ eƒe nukunu gbãtɔ le, esi wòtrɔ tsi wòzu “wain nyuitɔ.” (Yohanes 2:1-11) Wozãa wain hã le atikewɔwɔ me.Luka 10:34; 1 Timoteo 5:23.

 Ðe Biblia ɖo seɖoƒe aɖe koŋ na mía?

‘Mègazu kluvi na wain geɖe nono o.’Tito 2:3.

NU KA TA WÒLE BE NÀTSƆ ÐE LE NYA SIA ME?

Ƒe sia ƒe la, aha muame nono gblẽa nu le ƒome geɖewo ŋu le esi dzila ɖeka alo evea siaa nye aha tsu nola ta. Aha geɖe nono hã kplɔa ame dea kuxi kple afɔku geɖe siwo dometɔ aɖee nye ʋufɔku la me. Mlɔeba aha tsu nono ate ŋu agblẽ nu le ame ƒe ahɔhɔ̃, dzi, aklã kple dɔgbo ŋu.

NYA SI BIBLIA GBLƆ

Ŋuɖɔɖɔɖo le ahanono kple nuɖuɖu me nye Mawu ƒe nudidi vevi aɖe. (Lododowo 23:20; 1 Timoteo 3:2, 3, 8) Ne míeɖua mía ɖokuiwo dzi o la, Mawu makpɔ ŋudzedze ɖe mía ŋu o. Biblia gblɔ be: “Wain nye fewuɖula eye aha muame nye avuwɔla, ame si wòkplɔ trae la menya nu o.”Lododowo 20:1, Agbenya La.

Mɔ ɖeka si dzi aha muame kplɔa ame manyanu tranae lee nye ale si wònana amea ƒoa eɖokui ɖe nuwɔna manyomanyowo me. Hosea 4:11 gblɔ be: “Wain kple aha yeye ɖe wòdoa lã ame.” Esi ŋutsu aɖe si ŋkɔe nye John he kuxi sesẽ aɖe va eɖokui dzi vɔ hafi wòva kpɔe be nyateƒee nya sia nye. * Esi eya kple srɔ̃a wowɔ dzre vɔ megbe la, edo dziku eye wòyi amedzrodzeƒe ɖano aha fũu eye wòwɔ ahasi, nu sia va vee vevie emegbe eye wòɖo be yemagawɔ nu sia azɔ o. Ahanono wòagbɔ eme ate ŋu agble nu le mía ŋu le ŋutilã, agbenɔnɔ kple gbɔgbɔ me eye Biblia gblɔ be ahamulawo makpɔ agbe mavɔ o.1 Korintotɔwo 6:9, 10.

Ɣekaɣie mele be míano aha o?

“Nunyala kpɔa dzɔgbevɔ̃e, eye wòɣlaa eɖokui; ke ame bebewu dea ta eme, eye akpɔ etɔnua.”Lododowo 22:3.

NU KA TA WÒLE BE NÀTSƆ ÐE LE NYA SIA ME?

Numekugbalẽ aɖe gblɔ be: “Aha sesẽ nye nu muame vɔ̃ɖi.” (World Book Encyclopedia) Eya ta ahanono le ŋuɖɔɖo me le nɔnɔme aɖewo alo ɣeyiɣi aɖewo me gɔ̃ hã masɔ o.

NYA SI BIBLIA GBLƆ

Zi geɖe la, amewo “dea ta” kuxiwo me elabena wono aha le ɣeyiɣi si mesɔ o la dzi. Biblia gblɔ be: “Ɣeyiɣi li na nu sia nu” eye esia fia be ɣeyiɣi si woaƒo asa na aha sesẽ nono hã li. (Nyagblɔla 3:1) Le kpɔɖeŋu me, ate ŋu anye be ame metsi xɔ ƒe si nu se ɖe mɔ ɖo be woano aha sesẽ o, ɖewohĩ enye aha tsu nola si le agbagba dzem be yeaɖe asi le eŋu alo ele atike aɖe zãm si ta masɔ be wòano aha o. Eye le ame geɖe gome la, “ɣeyiɣi” si wòle be woaƒo asa na aha sesẽ nono lae nye ne woyina dɔ me alo le dɔ me, vevietɔ ne wozãa mɔ̃ siwo tea ŋu doa afɔku ame bɔbɔe. Le nyateƒe me la, ame siwo nyaa nu la bua agbe kple lãmesẽ be wonye nunana xɔasiwo tso Mawu gbɔ. (Psalmo 36:10) Míedea bubu nunana ma ŋu ne míenana Biblia ƒe gɔmeɖosewo fiaa mɔ mí le aha sesẽ nono ŋuti.

^ mm. 11 Míetrɔ ŋkɔa.