Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nyɔ!  |  July 2013

 BIBLIA ƑE NUKPƆSUSU

Mawu Fiaɖuƒe

Mawu Fiaɖuƒe

Ðe Mawu Fiaɖuƒea nye dzi ƒe nɔnɔme si le ame sia?

“Mèle adzɔge tso Mawu fiaɖuƒe la gbɔ o.”Marko 12:34.

NYA SIWO AMEWO GBLƆNA

Ame geɖewo xɔe se be Mawu Fiaɖuƒea nye “Mawu ƒe dziɖuɖu le ame ƒe dzi kple eƒe agbenɔnɔ me,” abe ale si Kristodukɔa ƒe sɔlemeha gã aɖe gblɔe ene.

NYA SI BIBLIA GBLƆ

Dziɖuɖu ŋutɔŋutɔ Mawu Fiaɖuƒea nye, ke menye kpɔɖeŋunyagbɔgblɔ aɖe si fia be ame nabɔbɔ eɖokui na Mawu le dzi mee wònye o. Mawu Fiaɖuƒea aɖu anyigba bliboa dzi.Psalmo 72:8; Daniel 7:14.

Ke nu kae nya si Yesu gblɔ be “Mawu fiaɖuƒe la le mia dome” la fia? (Luka 17:21) Yesu ƒe nyawo mate ŋu afia be ɖe wònɔ gbɔgblɔm be Fiaɖuƒea le yeƒe nyaselawo ƒe dzi me o. Nu ka tae? Elabena ɣemaɣi la, Farisitɔwoe wònɔ nu ƒom na. Yesu gblɔ be ame siawo makpɔ gome le Fiaɖuƒe la me o, elabena wowɔa alakpanu le woƒe subɔsubɔ me, eye esia na be woƒe subɔsubɔ medze Mawu ŋu o. (Mateo 23:13) Ke hã, esɔ be Yesu nagblɔ na wo be Mawu Fiaɖuƒe la le “mia dome.” Nu ka tae? Elabe ɣemaɣi la eya ame si anye Fiaɖuƒea ƒe Fia la le tsitre ɖe wo dome.Luka 17:21.

 Nu kae nye Mawu Fiaɖuƒea?

“Wò fiaɖuƒe nava. Wò lɔlɔ̃nu nava eme le dziƒo, kple anyigba dzi hã.”Mateo 6:10.

NYA SI BIBLIA GBLƆ

Mawu Fiaɖuƒe la nye dziɖuɖu ŋutɔŋutɔ si Mawu ɖo anyi, eye Yesu Kristo ye nye eƒe Dziɖula. (Mateo 28:18; 1 Timoteo 6:14, 15) Fiaɖuƒea ana woawɔ Mawu ƒe lɔlɔ̃nu le dziƒo kple anyigba dzi. (Mateo 6:10) Mawu akpɔ amegbetɔwo ƒe kuxiwo gbɔ to Fiaɖuƒea dzi. Fiaɖuƒea awɔ dɔ si amegbetɔwo ƒe dziɖuɖu aɖeke mate ŋu awɔ gbeɖe o.

Le Mawu Fiaɖuƒea te la, ameƒomea anɔ ŋutifafa me, woanɔ dedie, eye woƒe dzi adze eme bɔkɔɔ le paradisonyigba dzi. (Psalmo 46:10; Yesaya 35:1; Mixa 4:4) Ame aɖeke magadze dɔ alo aku o, eye woaɖe dɔléle ɖa keŋkeŋ. (Yesaya 33:24; Nyaɖeɖefia 21:4) Eye amegãkuku kple nyagãkuku gɔ̃ hã maganɔ anyi o. Biblia gblɔe ɖi be: “Dzo aɖo eƒe lãme abe ɖekakpui ene, eye wòagaɖo eƒe ɖekakpuiŋkekewo me.”Hiob 33:25.

NU SI NÀTE ŊU AWƆ

Àte ŋu anye Mawu Fiaɖuƒea te vi ne èwɔa nu si Mawu di tso asiwò, metsɔ le ƒome si me nètso alo afi si wodzi wò ɖo la me o. Biblia gblɔ be: “Mawu mekpɔa ame ŋkume o, ke boŋ le dukɔ sia dukɔ me la, ame si vɔ̃nɛ, eye wòwɔa nu dzɔdzɔe la, eyae dzea eŋu.”Dɔwɔwɔwo 10:34, 35.

Ðe amegbetɔwo ate ŋu ahe Mawu Fiaɖuƒea vɛ to woƒe agbagbadzedzewo dzia?

“Dziƒo ƒe Mawu la aɖo fiaɖuƒe aɖe anyi, si matsrɔ̃ gbeɖegbeɖe o.”Daniel 2:44.

NYA SIWO AMEWO GBLƆNA

Ame aɖewo xɔe se be amegbetɔwo aɖo Mawu Fiaɖuƒea anyi ɖe anyigba dzi, eɖanye to dzimetɔtrɔ na amewo loo alo to agbagbadzedze be ŋutifafa kple nɔviwɔwɔ naxɔ anyigba bliboa dzi me o.

NYA SI BIBLIA GBLƆ

Mawue aɖo Fiaɖuƒea anyi, ke menye amegbetɔ o. (Daniel 2:44) Mawu gblɔ le Fiaɖuƒea ŋu kɔɣi be: “Ke nye la meɖo fianye.” (Psalmo 2:6) Amegbetɔwo mate ŋu aɖo Mawu Fiaɖuƒea anyi o, eye womate ŋu ado kplamatsɛ eƒe dɔwɔwɔwo hã o, elabena dziƒoe wòanɔ aɖu anyigba la dzi.Mateo 4:17.

NU KA TA WÒLE BE NÀTSƆ ÐE LE NYA SIA ME?

Esɔ le dzɔdzɔmenu be amegbetɔwo nakpɔ mɔ be yewoahe ŋutifafa kple ɖekawɔwɔ avɛ gbe ɖeka. Ðewohĩ ètee kpɔ agbadree be yeaɖo taɖodzinu sia gbɔ gake ɖeko nèdo kpo nu, eye dzi ɖe le ƒowò. Enyanya be Mawu ƒe ŋusẽ le megbe na dziɖuɖu sia ana nàtsɔ ɖokuiwò ade Fiaɖuƒe sia te ahazã wò ŋusẽ le mɔ si aɖe vi wu nu.