Dzo kpo yi emenuwo dzi

Dzo kpo yi emenuawo dzi

 GBEBIAME | RACQUEL HALL

Yuda-nyɔnu Aɖe Ðe Nu Si Tae Wògbugbɔ Ŋku Lé Ðe Eƒe Dzixɔsewo Ŋu Me

Yuda-nyɔnu Aɖe Ðe Nu Si Tae Wògbugbɔ Ŋku Lé Ðe Eƒe Dzixɔsewo Ŋu Me

Racquel Hall dada nye Israel Yudatɔ eye fofoa nye Austriatɔ aɖe si va ɖo Yuda-subɔsubɔha me. Dadaa dzilawo nye Zion-dukɔa gbugbɔ ɖo anyi ta ʋlilawo, eye woʋu yi Israel le ƒe 1948 me, ƒe ma mee Israel zu Dukɔ nɔɖokuisi. Nyɔ! magazinea talawo bia gbe Racquel wòɖe nu si na wògbugbɔ ŋku lé ɖe woƒe Yuda-subɔsubɔ dzixɔsewo ŋu la me.

Ƒo nu tso ɖokuiwò ŋu na mí.

Wodzim le ƒe 1979 me le United States. Dzinyelawo gbe wo nɔewo esime mexɔ ƒe etɔ̃. Nɔnye nyim le Yudatɔwo ƒe kɔnyinyiwo nu, eye wòdem Yudatɔwo ƒe suku (yesiva). Esi mexɔ ƒe adre la, míeʋu ɖanɔ Israel ƒe ɖeka, eye mede suku le dɔwɔlawo ƒe nuto siwo woyɔna be kibbutz la dometɔ ɖeka me. Emegbe nye kple Nɔnye míeʋu yi Mexico.

Togbɔ be Yudatɔwo ƒe ƒuƒoƒe aɖeke menɔ afi ma o hã la, melé míaƒe kɔnyinyiwo me ɖe asi. Mesia bosomikaɖi le Sabat dzi, mexlẽa míaƒe Torah, mezãa míaƒe gbedoɖagbalẽ (siddur) tsɔ doa gbe ɖa. Zi geɖe la, megblɔna na nye sukuxɔmehatiwo be míaƒe subɔsubɔhae nye gbãtɔ. Nyemexlẽ Biblia ƒe akpa si wolɔ̃a yɔyɔ be Nubabla Yeye, si ƒo nu tso Yesu Kristo ƒe subɔsubɔdɔa kple eƒe nufiafiawo ŋu la kpɔ o. Le nyateƒe me la, Nɔnye gbee nam vevie be nyemegaxlẽe o, elabena eƒe nufiafiawo ava ƒo ɖi nye mawusubɔsubɔ.

Nu kae na nèva ɖoe be yeaxlẽ Nubabla Yeyea?

Esi mexɔ ƒe 17 la, metrɔ yi United States be maɖawu suku nu. Medo go nye ame nyanyɛ aɖe le afi ma si be Kristotɔe yenye eye wògblɔ nam be ne nyemexɔ Yesu dzi se o la nye agbe made blibo o.

Meɖo eŋu nɛ be: “Ame siwo xɔ Yesu dzi se la ɖe wobu koŋ.”

Ebiam be: “Ke èxlẽ Nubabla Yeyea kpɔa?”

Meɖo eŋu be: “Ao.”

Eye wògblɔ be: “Ekema menye nu si ŋu menya naneke tsoe o ye nye ema nèle fɔ bumee oa?”

 Eƒe nyawo tɔm vevie, elabe mebunɛ be enye bometsitsi be ame nabu fɔ nu si ŋu menya naneke tsoe o. Nya la wɔ dɔ ɖe dzinye, eya ta mexɔ eƒe Biblia yi aƒe me hede asi exexlẽ me.

Dɔ kae nu si nèxlẽ la wɔ ɖe dziwò?

Nukutɔe la, meva kpɔe be Yudatɔwoe Nubabla Yeyea ŋlɔlawo nye. Zi ale si mexlẽe la, zi nenemae mekpɔnɛ be Yesu nye Yudatɔ fatu ɖokuibɔbɔla si di be yeakpe ɖe amewo ŋu ke menye be yeaba wo o. Meyi agbalẽdzraɖoƒe ɖaɣe agbalẽ siwo ƒo nu tso eŋu gɔ̃ hã. Gake agbalẽ siawo dometɔ aɖeke mete ŋu ɖo kpe edzi nam be Yesue nye Mesia la o. Ðewo gɔ̃ hã be eyae nye Mawu, si nye nya si me susu aɖeke mele nam o. Ne nenemae la ke ame kae Yesu do gbe ɖa na, eya ŋutɔ ɖokui yea? Gawu la, Yesu ku. Gake Biblia gblɔ le Mawu ŋu be: “Wò la mèkuna o.” *

Aleke nèkpɔ nya mawo gbɔe?

Nyateƒe la metsia tsitre ɖe eɖokui ŋu o, eye meɖoe kplikpaa be make ɖe nyateƒea ŋu. Eya ta medo gbe ɖa na Mawu vevie kple aɖatsiwo, eye esiae nye zi gbãtɔ si medo gbe ɖa nye gbedoɖagbalẽa mazamazãe. Kaka mawu gbedodoɖaa nu ko la, mese ʋɔƒoƒo. Yehowa Ðasefo eve aɖewoe. Wona woƒe Biblia-srɔ̃gbalẽ ɖekam. Agbalẽ sia kple nu siwo me Ðasefoawo va dzro kplim emegbe la na meka ɖe edzi be Biblia dzie wotu woƒe dzixɔsewo ɖo. Le kpɔɖeŋu me, nu si Ðasefoawo xɔ se ye nye be, “Mawu ƒe Vi” * kple “Mawu ƒe nuwɔwɔ ƒe gɔmedzedze” * ye Yesu nye, ke menye Mawuɖekaetɔ̃ ƒe akpa aɖee o.

Ema megbe kpuie la, metrɔ yi Mexico, eye Ðasefowo yi edzi fia num tso nyagblɔɖi siwo ku ɖe Mesia ŋu la ŋu. Ale si nyagblɔɖiawo sɔ gbɔe la wɔ nuku nam! Ke hã ɖikeke aɖe gakpɔtɔ nɔ menye kokoko. Mebia ɖokuinye be: “‘Yesu ɖeka koe nyagblɔɖi siawo sɔ kplea?’ eye “Nu kae fia be menye ameflula aɖe koe dze agbagba wɔ nu abe Mesia ene o?”

Nu kae na nètrɔ susu kura?

Ðasefoawo tsɔ nyagblɔɖi aɖewo fiam siwo ameflula aɖeke mate ŋu ana woava eme ɖe eɖokui dzi o. Le kpɔɖeŋu me, Mixa gblɔe ɖi ƒe 700 kple edzivɔ do ŋgɔ be woadzi Mesia la le Betlexem, le Yudea. * Ame kae ate ŋu akpɔ ŋusẽ ɖe afi si wòadzi le dzi? Yesaya gblɔe ɖi be woawu Mesia la abe nu vlo wɔla vɔ̃ɖi aɖe ene, gake woaɖii ɖe kesinɔtɔwo dome. * Nyagblɔɖi siawo katã va eme ɖe Yesu dzi.

Nu mamlɛtɔe nye ƒome si me woadzii Yesu le. Biblia gblɔ be Mesia la anye Fia David ƒe dzidzimevi. * Esi wònye dzidzimewo ŋuti nuŋlɔɖiwo nɔa blema Yudatɔwo si ta la, ɖe menye David ƒe ƒome mee wodzi Yesu le o la, anye ne eƒe futɔwo agblɔe le dutoƒo! Gake womete ŋui o, elabena ɖikeke aɖeke mele eme o be David ƒe ƒomea mee Yesu dzɔ tso. Amehawo gɔ̃ hã yɔnɛ be “David Vi.” *

Le ƒe 70 Mía Ŋɔli, si nye ƒe 37 le Yesu ƒe ku megbe la, Roma-ʋakɔwo va tsrɔ̃ Yerusalem, eye esia wɔe be dzidzimewo ŋuti nuŋlɔɖiwo bu alo wo dome gblẽ. Eya ta be woate ŋu anɔ te ɖe dzidzimewo ŋuti nuŋlɔɖiwo dzi ade dzesi Mesia la, ele be wòava do ŋgɔ na ƒe 70 Mía Ŋɔli.

Dɔ kae esia nyanya wɔ ɖe dziwò?

Wogblɔe ɖi le 5 Mose 18:18, 19 be Mawu aɖo nyagblɔɖila aɖe na Israel si anɔ abe nyagblɔɖila Mose ene. Eye Mawu gblɔ be, “Ame si ke meɖo to nya, siwo wòagblɔ le nye ŋkɔ dzi o la, mabia tso ame la si.” Biblia bliboa sɔsrɔ̃ nyuie na meva ka ɖe edzi bliboe be Yesu Nazaretetɔ lae nye nyagblɔɖila ma.