Dzo kpo yi emenuwo dzi

Dzo kpo yi emenuawo dzi

 BIBLIA ƑE NUKPƆSUSU

Mawu Ƒe Nɔnɔme

Mawu Ƒe Nɔnɔme

Ŋutilã ka ƒomevie le Mawu si?

“Mawu nye Gbɔgbɔ.”Yohanes 4:24.

NYA SI BIBLIA GBLƆ

Biblia gblɔ be Mawu nye gbɔgbɔ. (2 Korintotɔwo 3:17) Eya ta ekɔ boo wu mí, eye wòle afi si míaƒe ŋku mate ŋu akpɔ o. Wogblɔ le 1 Timoteo 1:17 be, enye “Fia mavɔmavɔtɔ, magblẽmagblẽ, makpɔmakpɔ.” Biblia gblɔ hã be: “Ame aɖeke mekpɔ Mawu ɣeaɖekeɣi kpɔ o.”1 Yohanes 4:12.

Mía Wɔla la kɔ boo wu mí ale gbegbe be míate ŋu akpɔ ale si eƒe nɔnɔme le le susu me gɔ̃ hã o. Yesaya 40:18 gblɔ be: “Ame kae miebe, yewoabu ɖe Mawu ŋu, eye nɔnɔme ka miebe, yewoatsɔ asɔ kplii?” Xexe gbahoo wɔnuku sia gɔ̃ hã meɖi naneke ne wotsɔe sɔ kple Ŋusẽkatãtɔ la o.Yesaya 40:22, 26.

Ke hã, nuwɔwɔ nyanu aɖewo li siwo tea ŋu kpɔa Mawu heƒoa nu kplii ŋkume kple ŋkume. Nu ka tae? Elabena woawo hã wonye gbɔgbɔwo, eye wole dziƒo. (1 Fiawo 22:21; Hebritɔwo 1:7) Yesu Kristo gblɔ tso nuwɔwɔ siawo siwo kɔ boo wu amegbetɔwo, siwo wogayɔna be mawudɔlawo la ŋu be: “[Wokpɔa] Fofonye si le dziƒo la ƒe mo ɣesiaɣi.”Mateo 18:10.

 Ðe Mawu le afi sia afia?

“Eya ta miawo mido gbe ɖa ale: ‘Mía Fofo si le dziƒowo.’”Mateo 6:9.

NYA SI BIBLIA GBLƆ

Biblia mefia nu be Mawu le afi sia afi, alo be ele teƒe sia teƒe ɣeawokatãɣi, abe ŋusẽ aɖe si si amenyenye mele ene o. Ke boŋ, abe ale si Yesu gblɔ le Mateo 6:9 kple Mateo 18:10 ene la, Mawu nye ame ŋutɔŋutɔ—enye “Fofo”—eye wòle dziƒo, afi si nye ‘enɔƒe.’1 Fiawo 8:43.

Esime wòsusɔ vie Yesu naku la, egblɔ be: “Mele dzodzom le xexea me, eye meyina Fofo la gbɔ.” (Yohanes 16:28) Esi Kristo ku le ŋutilã me, eye wofɔe ɖe tsitre le gbɔgbɔ me megbe la, eyi “dziƒo ŋutɔŋutɔ” eye ‘wòdo ɖe Mawu ŋutɔ ŋkume.’Hebritɔwo 9:24.

Nyateƒenya siawo siwo ku ɖe Mawu ŋu la le vevie. Nu ka tae? Susu gbãtɔe nye be esi wònye ame ŋutɔŋutɔ Mawu nye ta la, míate ŋu asrɔ̃ nu tso eŋu ahate ɖe eŋu. (Yakobo 4:8) Susu bubue nye be, nyateƒe si ku ɖe Mawu ŋu nyanya kpɔa mía ta tso alakpatadedeagu, abe tadede agu na legbawo kple nu siwo me agbe mele o ene si me. Wogblɔ le 1 Yohanes 5:21 be: “Vinye lɔlɔ̃awo, mikpɔ mia ɖokui dzi le trɔ̃wo ŋu.”

Aleke wowɔ amegbetɔwo ɖe Mawu ƒe nɔnɔme nue?

“Mawu wɔ ame ɖe ye ŋutɔ ƒe nɔnɔme, Mawu ƒe nɔnɔme nue wòwɔe ɖo; ŋutsu kple nyɔnu wòwɔ.”1 Mose 1:27.

NYA SI BIBLIA GBLƆ

Ŋutete le mí amegbetɔwo si be míaɖe Mawu ƒe nɔnɔmewo, abe lɔlɔ̃, dzɔdzɔenyenye kple nunya ene afia. Le nyateƒe me la, Biblia gblɔ be: “Mizu Mawu srɔ̃lawo, abe lɔlɔ̃viwo ene, eye miyi edzi miazɔ le lɔlɔ̃ me.”Efesotɔwo 5:1, 2.

Gakpe ɖe eŋu la, Mawu na tiatiawɔblɔɖe mí, eye esia wɔe be míetea ŋu tianae be míawɔ nyui ke menye vɔ̃ o, eye esia hã nana be míeɖea lɔlɔ̃ fia amewo le mɔ vovovowo nu. (1 Korintotɔwo 13:4-7) Ŋutete le mía si hã be míato nu yeyewo vɛ, míakpɔ dzidzɔ ɖe nu siwo nya kpɔ la ŋu, eye nu wɔnuku siwo le xexea me la nawɔ dɔ ɖe mía dzi. Ƒo wo katã ta la, Mawu na mawusubɔsubɔ ƒe ŋutete mí, si nye dzɔdzɔmeŋutete si nana be míedina be míasrɔ̃ nu tso mía Wɔlaa kple eƒe lɔlɔ̃nu na mí ŋu.Mateo 5:3.

Ale si Biblia me nyateƒea ate ŋu akpe ɖe ŋuwò. Ne míeyi edzi le nu srɔ̃m tso Mawu ŋu hele eƒe nɔnɔmewo srɔ̃m la, míanɔ agbe nɔm ɖe mɔ si nu wòdi be míanɔ agbe ɖo la nu geɖe wu. Esia wɔnɛ be míekpɔa dzidzɔ, ŋutifafa, dzidzeme kple susumekɔdzeanyi vavãtɔ. (Yesaya 48:17, 18) Ɛ̃, Mawu nyae be yeƒe nɔnɔme nyoameŋuwo ʋãa amegbetɔwo ƒe dzi, hea dzianukwaretɔwo vaa ye gbɔ hekplɔa wo vaa agbe mavɔ mɔ la dzi.Yohanes 6:44; 17:3.