“Zi geɖe ne zã do la, xɔ̃nyewo kplɔam yia aƒe me. Gake le zã aɖe me la, ɖeɖi te ŋunye ale gbegbe be meɖo ʋu boŋ.

“Ʋukulaa metsɔm yi aƒe me o. Ke boŋ etsɔm yi teƒe tsoabo aɖe, eye wòtee kpɔ be yeadɔ gbɔnye sesẽe. Medo ɣli sesĩe, eye wòhe ɖe megbe. Esi wògazɔ ɖe dzinye la, megado ɣli sesĩe hede afɔ du me.

“Tsã la mebiaa ɖokuinye be, ‘Vi kae ɣlidodo ate ŋu aɖe?’ Gake mekpɔe azɔ be eɖea vi!”—KARIN. *

LE DUKƆ geɖewo me la, nu vlo wɔlawo tea ŋu dzea ame dzi ɣesiaɣi. Le kpɔɖeŋu me, ʋɔnudrɔ̃la aɖe gblɔ le dukɔ aɖe me be: “Nublanuitɔe la, fifia nya si wòle be ame nabiae nye be ɣekaɣie nu vlo wɔlawo adze ye dzi, ke menye be ɖe woate ŋu adze ye dzi mahã o.” Anɔ eme be nu vlo wɔwɔ mabɔ le teƒe aɖewo ya o. Le teƒe mawo gɔ̃ hã la, ele be ame nanɔ ŋudzɔ, ne menye nenem o la ate ŋu adze nu vlo wɔlawo si me bɔbɔe.

Eɖanye afi si nu vlo wɔwɔ bɔ ɖo alo afi si mebɔ ɖo o ye nèle o, aleke nàwɔ akpɔ wò ŋutɔ kple wò ame veviwo ta? Afɔ vevi aɖe si nàte ŋu aɖee nye be nàwɔ ɖe Biblia ƒe mɔfiame sia dzi be: “Nunyala kpɔ dzɔgbevɔ̃e gbɔna, eye wòɣla eɖokui, gake bometsila ya yiyim ko wòle eye wòkpea fu ɖe enu.” (Lododowo 22:3, Agbenya La) Le nyateƒe me la, kpovitɔwo ɖo aɖaŋu be ele vevie be ame naɖe afɔ aɖewo do ŋgɔ be wòagadze nu vlo wɔlawo si me o.

Menye ɖeko nu vlo wɔlawo wɔa nu vevi amewo hedaa adzo wo o, ke woƒe nuwɔnawo gagblẽa nu bubuwo hã le wo ŋu. Ame siwo dzi wodze la dometɔ geɖe megavona le susu me o, eye nu tena ɖe wo dzi ɣeyiɣi didi aɖe. Eya ta aleke gbegbe wòle vevie be míawɔ nu sia nu si míate ŋui atsɔ akpɔ mía ɖokui tae nye esi! Azɔ na míakpɔ afɔ siwo nàte ŋu aɖe atsɔ akpɔ ɖokuiwò ta tso nu vlo wɔwɔ ƒomevi ene siawo si me ɖa: Adzodada ame, amegbɔdɔlawo ƒe amedzidzedze, Internet dzi nu vlo wɔwɔ kple ame ŋuti nyatakakawo fifi.

 ADZODADA AME

Nu kae wònye? Adzodada nye ale si woatsɔ akpasesẽ alo ŋɔdzidodo axɔ nu le ame si.

Aleke wògblẽa nu le ame ŋue? Esi wotsɔ tu daa adzo ame geɖewo tre ɖe nu le Britain megbe la, ʋɔnudrɔ̃la aɖe de dzesii be togbɔ be ame siwo woda adzoe la mexɔ abi o hã la, nu te ɖe wo katã dzi vevie. Egblɔ be: “Wo dometɔ geɖe gblɔ be yewotsia dzodzodzoe, eye yewomegatea ŋu dɔa alɔ̃ o.” Egblɔ kpee be: “Wo katã kloe gblɔ be nu si dzɔ ɖe yewo dzi la gblẽ nu gã aɖe le yewoƒe gbe sia gbe dɔwɔnawo ŋu.”

Nu kae wòle be nàwɔ?

  • Fiafiwo dia mɔnu le ame ŋu; nya ame siwo tɔgbi dome nèle

    Nɔ ŋudzɔ. Fiafiwo dia mɔnu le ame ŋu. Wolɔ̃a ame siwo mele ŋudzɔ o la fifi. Eya ta nɔ ame siwo le ŋku lém ɖe ŋuwò la ƒe mo kpɔm, nya ame siwo tɔgbi dome nèle, eye mègamu aha alo ano atike vɔ̃ɖi si awɔe be wò susu nawɔ dɔ̃ɔ o. Numekugbalẽ aɖe si ku ɖe lãmesẽnyawo ŋu gblɔ be, “Ne ame no aha alo atike vɔ̃ɖi la,” asesẽ ŋutɔ be “eƒe susu nanɔ te wòakpɔ nu siwo ate ŋu anye afɔku nɛ la adze sii.”
  • Kpɔ wò nunɔamesiwo ta. Tu wò aƒe kple wò ʋu ƒe ʋɔtruwo kple fesrewo nyuie. Mègaɖe mɔ ame si mènya o nage ɖe wò aƒe me o. Mègada wò nu xɔasiwo ɖe gaglãgbe o. Lododowo 11:2 gblɔ be: “Ame siwo bɔbɔa wo ɖokui ɖe anyigba la, si me nunya le.” Zi geɖe la, ame siwo daa woƒe atsyɔ̃ɖonu xɔasiwo kple elɛktronik-mɔ̃wo ɖe gaglãgbe lae fiafiwo kple gbevuviwo fina.
  • Bia aɖaŋuɖoɖo. “Bometsila ƒe mɔ dzɔna le eya ŋutɔ ŋkume; ke nunyala ɖoa to aɖaŋuɖoɖo.” (Lododowo 12:15) Ne èle mɔ zɔm la, wɔ ɖe nutoa me tɔ siwo dzi woate ŋu aka ɖo kple mɔzɔnyawo gbɔ kpɔlawo ƒe aɖaŋuɖoɖowo dzi. Woate ŋu afia teƒe siwo mele be nàto o kple ale si nàkpɔ wò ŋutɔ kple wò nunɔamesiwo tae la wò.

AMEGBƆDƆLAWO ƑE AMEDZIDZEDZE

Nu kae wònye? Menye amegbɔdɔdɔ sesẽe koe esia lɔ ɖe eme o, ke elɔ ŋɔdzidodo na ame kple amedzizizi be wòalɔ̃ woadɔ egbɔ hã ɖe eme.

Aleke wògblẽa nu le ame ŋue? Ame aɖe si gbɔ wodɔ sesẽe gblɔ be: “Nu si wɔ nublanui wu lae nye be menye ɣeyiɣi si me wodɔ amea gbɔ sesẽe koe wògblẽa nu le eŋu o,” ke boŋ “etsia susu me nɛ heɖea fu nɛ ɣeyiɣi didi aɖe, eye wònana ale si ame bua agbee la trɔna kura. Egblẽa nu le eƒe ame veviwo hã ŋu.” Ke hã, menye ame si dzi wodze la ƒe vodadae o. Amegbɔdɔlaa dzie fɔbubua le.

Nu kae wòle be nàwɔ?

  • Mègado toku ale si nèse le ɖokuiwò me o. North Carolina kpovitɔwo ƒe dɔwɔƒe si le United States ɖo aɖaŋu be, “Ne teƒe aɖe alo ame aɖe ƒe afi ma nɔnɔ na nètsi mavoe la, ekema dzo. Ne èse le ɖokuiwò me be ele be yeadzo la, mègana ame aɖeke naƒoe ɖe nuwò nàkpɔtɔ anɔ afi ma o.”
  • Zɔ dzideƒotɔe; nɔ ŋudzɔ. Ame siwo dɔa amewo gbɔ sesẽe la lɔ̃a ame siwo mele ŋudzɔ o alo ame gblɔewo dzi dzedze. Eya ta zɔ dzideƒotɔe eye nànɔ ŋudzɔ.
  • Wɔ nu afɔtsɔtsɔe. Do ɣli sesĩe. (5 Mose 22:25-27) Si dzo alo wɔ nane si amea mele  mɔ kpɔm na o. Ne anya wɔ la, si du yi afi si nànɔ dedie le, eye nàƒo ka na kpovitɔwo. *

INTERNET DZI NU VLO WƆWƆ

Nu kae wònye? Internet dzi nu vlo wɔwɔ lɔ asaƒoƒo na adzɔxexe, kpekpeɖeŋunanaɖoɖowo dzi toto afi amewo, ame bubu ƒe agbananuƒlegbalẽvi zazã kple nu siwo amewo ƒle to Internet dzi la maɖomaɖo ɖe wo ɖe eme. Elɔ gadede adzɔhawo me ƒe ɖoɖowo dzi toto afi amewo kple nyatakakadzraɖoƒe siwo dzi wotsaa asi le la hã ɖe eme.

Aleke wògblẽa nu le ame ŋue? Internet dzi nu vlo wɔlawo fia ame ɖekaɖekawo kple habɔbɔwo siaa ƒe dɔlar miliɔn akpe geɖewo. Eƒe kpɔɖeŋu aɖee nye esi: Sandra xɔ e-mail aɖe si wòsusu be yeƒe gadzraɖoƒee ɖoe ɖe ye. Wobia tso esi be wòaɖo eƒe Internet dzi gadzadzraɖo ŋuti nyatakaka yeyewo ɖe yewo. Esi wòɖo nyatakakawo ɖe wo vɔ teti ko la, dzidzi ƒoe esi wòde dzesii be woɖe Amerika dɔlar 4,000 le yeƒe ga me tsɔ ɖo ɖe dutagadzraɖoƒe aɖe. Sandra de dzesii enumake be woda adzo ye.

Nu kae wòle be nàwɔ?

  • Ðɔ ŋu ɖo! Mègana nyatakakadzraɖoƒe siwo dzena abe adodoeawo ene la naflu wò o. De dzesii be gadzraɖoƒe akuakuawo mabia tso asiwò be nàɖo ŋutiwò nyatakaka veviwo ɖe yewo to e-mail dzi o. Hafi nàƒle nane alo ade ga adzɔha aɖe me to Internet dzi la, ka ɖe edzi be enye adzɔha vavã. Lododowo 14:15 gblɔ be: “Amebebewu xɔa nya sia nya dzi sena; ke nunyala léa ŋku ɖe eƒe afɔɖeɖe ŋu.” Kpɔ nyuie ne èle asi tsam kple adzɔha siwo le duta. Elabena ne kuxiwo do mo ɖa la, wo gbɔ kpɔkpɔ asesẽ.
  • Lé ŋku ɖe adzɔhawo kple woƒe dɔwɔɖoɖowo ŋu. Bia ɖokuiwò be: ‘Afi ka adzɔha ƒe dɔwɔƒe le? Ðe eƒe telefonxexlẽdzesi li ŋutɔŋutɔa? Ðe woaɖe ga bubu siwo womegblɔ nam do ŋgɔ o le ga me nama? Ɣekaɣie woatsɔ nye nudɔdɔa avɛ nam? Ðe mate ŋu agbugbɔe aɖo ɖa alo agbugbɔ nye ga axɔa?’
  • Kpɔ nyuie ne nu si wogblɔ la dze amiɖeɖe ɖe nu. Ŋuklẽlawo kple aɖufuliɖulawo koŋ ye Internet dzi fifilawo fina. Woƒe ameflumɔnu aɖewoe nye be woazã ga sue aɖe ko akpɔ viɖe gã aɖe, be woado ga na ame alo ana agbananuƒlegbalẽvii togbɔ be medze nɛ o hã, alo be wòade ga asitsamɔnu aɖe siwo ŋu wogblɔ le be kakaɖedzi le me ahakpɔ ga geɖe. United States dukɔa ƒe Asitsanyawo Ƒe Dɔdzikpɔƒe gblɔ be: “Gbɔ dzi ɖi nàku nu me nyuie ahakpɔe ɖa be asɔ be yeade ga asitsatsa sia me mahã. Zi ale si ga si ŋugbe wodo la kɔ mo dzie la, zi nenemae afɔku le gadede asitsatsa ma me. Mègaɖe mɔ boblodola aɖeke naƒoe ɖe nuwò nàde ga asitsatsa aɖe me hafi ava kpɔe ɖa be ele se nu mahã o.”

AME ŊUTI NYATAKAKAWO FIFI

Nu kae wònye? Enye mɔ manɔsenu aɖe dzi toto ake ɖe ame aɖe ŋuti nyatakakawo ŋu ahazãe atsɔ afi fi alo awɔ nu vlo.

Aleke wògblẽa nu le ame ŋue? Fiafiwo ate ŋu azã ŋutiwò nyatakakawo atsɔ awɔ agbananuƒlegbalẽviwo alo ado ga loo alo atsɔ ʋu gadzraɖokɔnta yeye le gadzraɖoƒe. Eye woaɖu fe ade wò! Ne ète ŋu na wote fli ɖe fenyinyia me hã la, ɖewohĩ eteƒe adidi ŋutɔ hafi gadzraɖoƒewo nagaka ɖe dziwò. Ame aɖe si wofii to mɔ sia dzi gblɔ be: “Ne gadzraɖoƒewo megakana ɖe ame dzi wò o la, egblẽa nu le ame ŋu le goawo katã me, eye wòvɔ̃ɖi kura wu be woada adzo ame.”

Nu kae wòle be nàwɔ?

  • Ɣla ŋutiwò nyatakaka veviwo. Ne èʋua wò gadzraɖoƒe alo ƒlea nu to Internet dzi,  vevietɔ ne ezãa kɔmpiuta si ame bubuwo hã zãna la, ke nɔ nya ɣaɣlɛ siwo nètsɔ ʋua kɔmpiuta la ɖɔlim edziedzi. Eye abe ale si míegblɔe va yi ene la, kpɔ nyuie le e-mail siwo me woabia be nàna ŋutiwò nyatakaka veviwo le la ŋu.Menye kɔmpiutawo dzi koe fiafitɔwo tona fia ame ŋuti nyatakakawo o. Wotoa mɔ sia mɔ dzi be yewoƒe asi nasu nyatakaka veviwo, abe ga si le gadzraɖoƒe na ame ŋuti kɔnta, gaxɔgbalẽvi, agbananuƒlegbalẽviwo kple dziɖuɖu ƒe kpekpeɖeŋuɖoɖo ƒe xexlẽdzesi ene dzi. Eya ta lé be na agbalẽvi siawo, eye vuvu agbalẽvi ɖe sia ɖe si dzi nyatakaka veviwo le hafi nàtsɔe aƒu gbe. Eye ne ède dzesii be yeƒe agbalẽvi siawo dometɔ aɖe bu alo wofi la, na nutsotso tso eŋuti kaba.
  • Nɔ ŋku lém ɖe ga si le gadzraɖoƒe na wò ŋu. United States dukɔa ƒe Asitsanyawo Ƒe Dɔdzikpɔƒe gblɔ be: “Ŋudzɔnɔnɔe nye aʋawɔnu vevitɔ . . . si kpea ame ŋuti nyatakaka filawo dzi.” Egagblɔ hã be: “Eɖea vi ŋutɔ ne ame de dzesii kaba be wofi ye ŋuti nyatakakawo.” Eya ta nɔ ŋku lém ɖe ga si le gadzraɖoƒe na wò ŋu, eye kpɔe ɖa be ɖe woɖe ga le ga me na ye le yeƒe manyamanya me hã. Ne anya wɔ la, na dɔwɔƒe aɖe si ŋu kakaɖedzi le la naɖe wò fenyigbalẽvi ƒe kɔpi na wò, de dzesi ga si le gadzraɖoƒe na wò kple esiwo wozã agbananuƒlegbalẽviwo tsɔ ɖe le ŋkɔwò me.

Ke hã nu sia nu ate ŋu adzɔ le egbexexe sia me. Nu vlo wɔlawo te ŋu fi ame siwo nɔa ŋudzɔ vevie gɔ̃ hã. Le esia ta, nunya kple gɔmesese si le Biblia me la ŋu dɔwɔwɔ ɖea vi na mí ɣesiaɣi. “Mègaɖe asi le eŋu o, ekema adzra wò ɖo; lɔ̃e, ekema akpɔ tawò.” (Lododowo 4:6) Gawu la, Biblia do ŋugbe be nu vlo wɔwɔ nu ayi.

Nu Vlo Wɔwɔ Nu Ayi Kpuie

Nu ka tae míate ŋu aka ɖe edzi be Mawu aɖe nu vlo wɔwɔ ɖa? Bu nya siawo ŋu kpɔ:

  • Mawu di be yeatsi nu vlo wɔwɔ nu. “Nye Yehowa melɔ̃a nya dzɔdzɔe, eye meléa fu nuhaha vɔ̃ɖi.”Yesaya 61:8.
  • Ŋusẽ le esi be wòatsi nu vlo wɔwɔ nu. “Eƒe ŋusẽ tri akɔ, ke metea se kple dzɔdzɔenyenye blibo ɖe to o.”Hiob 37:23.
  • Edo ŋugbe be yeatsrɔ̃ ame vɔ̃ɖiwo eye yeakpɔ ame dzɔdzɔewo ta. “Woatsrɔ̃ ame vlowo.” “Ame dzɔdzɔewo anyi anyigba la dome, eye woanɔ edzi tegbee.”Psalmo 37:9, 29.
  • Edo xexe yeye si me ŋutifafa anɔ ƒe ŋugbe na ame siwo wɔa nuteƒe nɛ. “Ame ɖihiãwo anyi anyigba la dome, eye dzi adzɔ wo ɖe ŋutifafa gbogbo la ŋuti.”Psalmo 37:11.

Ðe nya siawo melé dzi na wò ŋutɔ oa? Ekema di ɣeyiɣi nàdzro Biblia me be nàgasrɔ̃ nu geɖe tso tame si Mawu ɖo ɖe ameƒomea ŋu la ŋu. Nunya si le Biblia me la megale agbalẽ bubu aɖeke me o. Eye agbalẽ bubu aɖeke mena mɔkpɔkpɔ mí be nu vlo wɔwɔ nu ayi le etsɔme o. *

Mawu do xexe yeye si me ŋutifafa anɔ ƒe ŋugbe, si me nu vlo wɔwɔ manɔ o

^ mm. 5 Míetrɔ ŋkɔawo.

^ mm. 22 Ame siwo dzi nu sia dzɔ ɖo la dometɔ akpa gãtɔ nya wo dzi dzelawo nyuie. Kpɔ nyati si nye “How Can I Protect Myself From Sexual Predators?” (Comment me protéger des prédateurs sexuels ?) le agbalẽ si nye Questions Young People Ask—Answers That Work (Les jeunes s’interrogent — Réponses pratiques), Babla 1 ƒe axa 228. Àte ŋu akpɔ agbalẽ sia le Internet dzi le www.jw.org.

^ mm. 44 Ne èdi numekɔkɔ bubuwo ku ɖe Biblia ƒe nufiafia veviwo ŋu la, kpɔ agbalẽ si nye Nuka Tututue Nye Biblia ƒe Nufiafia? Àte ŋu axɔ ɖeka le Yehowa Ðasefowo gbɔ femaxee alo axlẽe le www.jw.org.