Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nyɔ!  |  April 2013

 NU SI AKPE ÐE ƑOMEWO ŊU | SRƆ̃TƆWO

Ale Si Miaƒo Asa Na Nya Tɔamewo Gbɔgblɔ

Ale Si Miaƒo Asa Na Nya Tɔamewo Gbɔgblɔ

KUXIA

Ɣesiaɣi si masɔmasɔ ɖo wò kple srɔ̃wò dome la, miedudua nya tɔamewo kɔna ɖe mia nɔewo dzi bababa. Nya tɔamewo gbɔgblɔ va xɔ aƒe ɖe miaƒe ƒomea me ale gbegbe be ɖeko wòva zu tsi mienona gbe sia gbe.

Ne aleae wòle le miaƒe ƒomea me la, miate ŋu atrɔ asi le nɔnɔme sia ŋu. Gake gbã la, ahiã be mianya nu siwo gbɔ wòtso kple nu si tae asitɔtrɔ le nɔnɔmea ŋu aɖe vi na mi.

NU SI GBƆ WÒTSONA

Ƒome si me wohe ame le. Wohe srɔ̃ŋutsu kple srɔ̃nyɔnu geɖe le ƒome siwo me nya tɔamewo gbɔgblɔ xɔ aƒe ɖo la me. Srɔ̃tɔawo dometɔ ɖeka alo wo ame evea siaa anya nɔ nu ƒom na nɔvia abe ale si ko wo dzilawo ƒoa nu na wo nɔewo ene.

Modzakaɖeɖe ƒe ŋusẽkpɔɖeamedzi. Wogblɔa nya tɔamewo le filmwo kple television dzi fefewo me tsɔ doa nukokoe na amewo, eye esia wɔe be nukpɔlawo va susunɛ be naneke megblẽ le wo ŋu o, alo nukokoedonamenya koe wonye.

Dekɔnu. Wofia dukɔ aɖewo me tɔwo be ŋutsu siwo zia ame dzi lae nye “ŋutsu ŋutɔŋutɔwo,” eye ele be nyɔnuwo hã ƒe mo nasẽ ne womagabu wo be wonye gbɔdzɔgbɔdzɔtɔwo o. Ale wɔ ne masɔmasɔwo do mo ɖa la, srɔ̃tɔ siwo si nɔnɔme siawo le la bua wo nɔewo futɔwoe le esi eteƒe be woabu wo nɔewo xɔlɔ̃woe, eye wogblɔa nya siwo tɔa ame le esi teƒe be woagblɔ nya siwo tua ame ɖo.

Eɖanye susu ka tae wogblɔ nya tɔamewo ɖo o, ate ŋu ahe srɔ̃gbegbe kple lãmesẽkuxi geɖewo avɛ. Ame aɖewo gblɔ gɔ̃ hã be dzugbewo vena wu ƒoƒo. Le kpɔɖeŋu me, nyɔnu aɖe si srɔ̃a dzuna heƒona la gblɔ be: “Ne srɔ̃nye dzum la eveam wu be wòaƒom. Anyo nam be wòanɔ ƒoyem wu be wòanɔ dzuyem.”

Nu kae nàte ŋu awɔ ne nya tɔamewo gbɔgblɔ le nu gblẽm le miaƒe srɔ̃ɖeɖea ŋu?

 NU SI NÀTE ŊU AWƆ

Se veve ɖe ame nu. Tsɔ ɖokuiwò ɖo srɔ̃wòa teƒe, dze agbagba nànya ale si wò nyawo nana wòsena le eɖokui me. Ne anya wɔ la, dze agbagba nàɖo ŋku nudzɔdzɔ aɖe koŋ si me wò nyagbɔgblɔwo do vevesese nɛ la dzi. Mègada susu ɖe nya si tututu nègblɔ nɛ la dzi o; ke boŋ bu ale si srɔ̃wòa se le eɖokui me le nya si nègblɔ nɛ ŋu la ŋu. Ðe nàte ŋu abu mɔ bubu aɖewo siwo nu nàte ŋu agblɔ nya ma ke le evɔ mavee oa? Biblia gblɔ be: “Nyaŋuɖoɖo fafɛ tsia dziku nu; ke gbe da ɖe ame gbɔ nana dɔmedzoe flana.”—Lododowo 15:1.

Lé ŋku ɖe srɔ̃tɔ siwo dea bubu wo nɔewo ŋu la ŋu. Ne ame siwo gblɔa nya tɔamewo ƒe nuƒoƒo kpɔ ŋusẽ ɖe dziwò la, ke srɔ̃ ame siwo ɖoa kpɔɖeŋu nyui le nuƒoƒo me. Nɔ to lém ɖe srɔ̃tɔ siwo ɖoa kpɔɖeŋu nyui le nuƒoƒo na wo nɔewo me la ŋu.—Biblia ƒe gɔmeɖose: Filipitɔwo 3:17.

Migaɖo ŋku nu siwo do dzidzɔ na mi va yi la dzi. Zi geɖe la, dzi mee nya tɔamewo gbɔgblɔ tsona, ke menye nu mee o. Eya ta dze agbagba nànɔ susu nyui bum ɖe srɔ̃wòa ŋu. Ðo ŋku nu siwo do dzidzɔ na mi va yi la dzi. Kpɔ foto siwo mieɖe gbe aɖe gbe va yi. Nu kae ɖi kokoe na wò le wo ŋu? Nɔnɔme nyui kawoe he mi ɖe mia nɔewo ŋu?—Biblia ƒe gɔmeɖose: Luka 6:45.

Zã ŋkɔteƒenɔnya “me” le wò nyagbɔgblɔwo me. Esi nànɔ nya tɔamewo gblɔm ɖe srɔ̃wò ŋu teƒe la, gblɔ ale si nu si dzɔ la te ɖe dziwòe boŋ. Le kpɔɖeŋu me, gbɔgblɔ be “Ne èwɔ ɖoɖowo evɔ mègblɔe nam do ŋgɔ o la, mesena le ɖokuinye me be mèbu ŋunye o” ana srɔ̃wòa naɖo nya ŋu tufafatɔe wu be nàgblɔ be “Nenema koe nèle—ɖeko nèwɔa ɖoɖowo le ɖokuiwò si ɣesiaɣi, evɔ mègblɔnɛ nam do ŋgɔ o.”—Biblia ƒe gɔmeɖose: Kolosetɔwo 4:6.

Nya ɣeyiɣi si nàtɔ dzeɖoɖoa. Ne èkpɔe be dziku di be yeage ɖe nyaa me eye nya tɔamewo te dodo la, anyo be miaɖe asi le nyaa ŋu gbɔ. Zi geɖe la, enyo be nàdzo ahaƒo asa na nyahehe va se ɖe esime miaƒe dzi dze eme be miate ŋu akpɔ nyaa gbɔ le ŋutifafa me.—Biblia ƒe gɔmeɖose: Lododowo 17:14.

Zi geɖe la, dzi mee nya tɔamewo gbɔgblɔ tsona, ke menye nu mee o