Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nyɔ!  |  February 2013

 GBEBIAME | MASSIMO TISTARELLI

Robot-wɔla Aɖe Ƒe Xɔse

Robot-wɔla Aɖe Ƒe Xɔse

Nufialagã Massimo Tistarelli nye dzɔdzɔmeŋutinunyala le Sassari Yunivɛsiti le Italy. Enye nuŋɔŋlɔmetola ƒe kpeɖeŋutɔ na dzɔdzɔmeŋutinunyagbalẽ etɔ̃ siwo de du, eye enɔ eme woŋlɔ dzɔdzɔmeŋutinunya ƒe nyati siwo wu alafa ɖeka. Esrɔ̃a nu tso ale si amegbetɔwo kpɔa ame ƒe ŋkume dzea sii kple nu bubuwo, abe ale si míewɔna léa bɔl si woda la ene ŋu. Eyome la, etrɔa asi le robotwo ŋu be woakpɔ nu adze sii abe ale si amegbetɔwo wɔnɛ ene. Nyɔ! magazinea talawo bia gbee tso eƒe xɔse kpakple eƒe dɔa ŋu.

Subɔsubɔha ka mee nènɔ tsã?

Dzinyelawo nye Katolikotɔwo, gake womedea sɔleme o. Mezu mawudzimaxɔsela esime menɔ ɖekakpuime. Wofiam le suku be agbea dzɔ le eɖokui si, Wɔla manɔmee, eye mexɔe se. Gake togbɔ be nyemexɔ Wɔla dzi se o hã la, mexɔe se be nane li si kɔ wu mí. Be manya nu si wònye la, mesrɔ̃ nu tso Buddhatɔwo, Hindutɔwo kple Taotɔwo ƒe dzixɔsewo ŋu, gake woƒe nufiafiawo medze ŋunye o.

Nu kae na nèva tsɔ ɖe le dzɔdzɔmeŋutinunya me?

Mɔ̃wo ƒe nu doa dzidzɔ nam tso nye ɖevime ke. Mekakaa nye elektrɔnikfefenuwo gɔ̃ hã hegafɔa wo kpena. Eye mebiaa nya geɖe fofonye, si nye radio kple telefon ŋu dɔwɔla la tso ale si nu mawo wɔa dɔe ŋu.

Nu kae wò dɔa bia?

Mesrɔ̃ elektrɔnikmɔ̃ɖaŋu le Genoa Yunivɛsiti, eye meku nu me tso robot-wɔwɔ ŋu hexɔ eŋuti ɖaseɖigbalẽ kɔkɔtɔ. Ale si amegbetɔwo kpɔa nu dzea sii la koŋ ŋue mesrɔ̃a nu tsonɛ hewɔa eŋu dɔ le robot-wɔwɔ me.

Nu ka tae nètiae be yeasrɔ̃ nu tso amegbetɔ ƒe nukpɔkpɔŋutete ŋu?

Míaƒe nukpɔkpɔŋutetea de ŋgɔ ale gbegbe, eye menye míaƒe ŋkuwo ko gbɔe esia tso o—ŋutinu siwo nana míedzea si nu si ŋkua kpɔ la hã le eme. Le kpɔɖeŋu  me, bu ale si wòdzɔnae be nètea ŋu léa bɔl la ŋu kpɔ. Esime nèle du ƒum be yealée la, wò gadaglamakui nana bɔl la ƒe nɔnɔme dzena le wò ŋku to me. Ale si bɔl la le zɔzɔm le ya me kple ale si ŋkua kplɔe ɖo la kpɔa ŋusẽ ɖe ale si nɔnɔmea dzena le wò ŋku to me dzi. Esi wò ŋku kplɔ bɔl la ɖo ta la, eƒe nɔnɔme dzena le wò ŋku to me abe ɖe wòle teƒe ɖeka ene, ke adzɔgenuwo ya dzena abe ɖe wole zɔzɔm ene.

Le ɣeyiɣi ma ke me la, wò sidzenuwo bua bɔl la ƒe duƒuƒu kple afi si wòɖo tae la ŋuti kɔnta. Nukutɔe la, akɔntabubu sia yia edzi le ŋkua to me esime wò ŋku le afi si bɔl la le tso adzɔgenuwo gbɔ la dzidzem. Wò ŋkukawo ɖoa bɔl la ƒe nɔnɔme si dze le ŋkua to me la ŋuti nyatakakawo ɖe ahɔhɔ̃a, si hã trɔa asi le nyatakakaa ŋu heʋãa wò be nàyi aɖalé bɔl la. Nu bliboa de ŋgɔ ŋutɔ hewɔ nuku.

Nu kae na nèxɔe se be Wɔla aɖe li?

Le ƒe 1990 me la, menɔ Ireland ƒe dugã Dublin ɣleti ʋɛ aɖewo henɔ nu me kum le Trinity College suku kɔkɔa me. Esi mía kple srɔ̃nye Barbara míetrɔ yina aƒe la, míenɔ dze ɖom tso mía viwo ƒe etsɔme ŋu. Míeɖoe hã be míayi aɖasrã nɔvinyenyɔnu si nye Yehowa Ðasefo kpɔ. Nɔvinyea tsɔ agbalẽ aɖe si Yehowa Ðasefowo ta, si nye Life—How Did It Get Here? By Evolution or by Creation? (La vie : comment est-elle apparue ? Évolution ou création ?) la nam. Ale si gbegbe woku nu mee hafi ta agbalẽa wɔ dɔ ɖe dzinye. Enumake mede dzesii be nyemeku nu me hafi xɔe se be agbea dzɔ le eɖokui si o. Le kpɔɖeŋu me, mesusui tsã be blematɔwo ƒe ƒuwo ŋuti dodokpɔwo ɖo kpe edzi be agbea dzɔ le eɖokui si. Gake mele nenema o. Zi ale si medzro nu mee la, zi nenemae meva ka ɖe edzi be dzixɔse ma nye adegbeƒonya, ke menye nyateƒenya o.

Meva de ŋugble tso nye robot-wɔwɔdɔa ŋu. Ame ka ƒe asinudɔwɔwɔwoe wònye srɔ̃m mele?

Meva de ŋugble tso nye robot-wɔwɔdɔa ŋu. Ame ka ƒe asinudɔwɔwɔwoe wònye srɔ̃m mele? Nyemate ŋu awɔ robot si alé bɔl abe ale si amegbetɔwo lénɛ ene o. Woate nu atrɔ asi le robot ŋu be wòalé bɔl, gake nɔnɔme aɖewo koŋ me koe wòanya wɔ le. Ne nɔnɔmeawo sɔ ɖe ɖoɖo si wode robot la me nu ko hafi wòate ŋu alée. Amewoe wɔ mɔ̃wo, ke amegbetɔ ƒe nusɔsrɔ̃ŋutete de ŋgɔ sãsãsã wu mɔ̃wo tɔ. Nyateƒenya sia kple bubu geɖewoe na mekpɔe be Wɔla aɖee wɔ mí.

Nu kae na nèva zu Yehowa Ðasefo?

Ale si Ðasefowo srɔ̃a nu tsitotsito hã le eme tae woƒe nu nyo mía kple Barbara ŋu ɖo. Ale si gbegbe wokua nu me hafi ŋlɔa woƒe agbalẽwo la wɔ dɔ ɖe dzinye. Woƒe numekuku deto la dzea ŋunye le esi medina be maku nuwo gɔme ta. Le kpɔɖeŋu me, nusɔsrɔ̃ tso Biblia me nyagblɔɖiwo ŋu do dzidzɔ nam ŋutɔ. Nu si mesrɔ̃ la na meka ɖe edzi be Mawu gbɔe Biblia tso vavã. Mía kple Barbara míexɔ nyɔnyrɔ zu Yehowa Ðasefowo le ƒe 1992 me.

Ðe dzɔdzɔmeŋutinunya na wò xɔse me gbɔdzɔa?

Ao, ɖe wòdo ŋusẽ nye xɔse boŋ. Le kpɔɖeŋu me, bu ale si míetea ŋu kpɔa amewo ƒe ŋkume dzea sii ŋu kpɔ. Vidzĩwo tea ŋu wɔa esia gaƒoƒo ʋɛ aɖewo le wo dzidzi megbe. Míekpɔa ame si míenya la dzea sii enumake ne amehawo domee amea le hã. Míetea ŋu nyana ale si wòle sesem le eɖokui me gɔ̃ hã. Gake ɖewohĩ míenyana kura be nu geɖe ŋutɔwoe yia edzi le ɣeyiɣi kpui aɖe ko me hafi míaƒe sidzenuwo tea ŋu wɔa nu siawo o.

Meka ɖe edzi bliboe be míaƒe nukpɔkpɔŋutete la nye nunana xɔasi si tso Yehowa Mawu gbɔ. Eƒe nunanawo, siwo dome Biblia le la, nana medaa akpe nɛ heƒoa nu tso eŋu na amewo. Mekpɔe be ele be makafui ɖe eƒe nuwɔwɔwo ta.