Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nyɔ!  |  February 2013

 BLEMATƆWO ŊUTI NYA

Plato

Plato

Plato (ƒe 427-347 Do Ŋgɔ Na Mía Ŋɔli lɔƒo) nye trɔ̃subɔla Helatɔ si nye xexemenunyala. Wodzii le Atene ɖe ƒome xɔŋkɔ aɖe me, eye ede suku yi ŋgɔ le Hela sukuwo. Xexemenunyala xɔŋkɔ Socrates kpakple Pythagoras, si nye xexemenunyala kple akɔntanyala bibi la yomedzelawo ƒe nufiafiawo kpɔ ŋusẽ ɖe edzi.

ESI Plato ɖi tsa le Mediterranea nutoa me heƒo eɖokui ɖe Sirakusa, si nye Hela dugã aɖe si le Sicily ƒe dunyahehe me megbe la, etrɔ yi Atene heɖo suku si wotsɔ ŋkɔ na be Academy. Suku sia si ŋu wogblɔna le be enye Europa ƒe yunivɛsiti gbãtɔ la va nye akɔnta kple xexemenunya fiaƒe vevi aɖe.

ALEKE EŊU NYA KA WÒE?

Plato ƒe nufiafiawo xɔ aƒe ɖe subɔsubɔha siwo me ame miliɔn geɖe, siwo dome ame siwo be yewonye Kristotɔwo le la me, eye wo dometɔ geɖe buna vodadatɔe be Biblia mee nufiafia mawo tso. Plato ƒe nufiafia veviwo dometɔ ɖekae nye be luʋɔ makumaku aɖe le amegbetɔ me si dona le ŋutilãa me ne eku.

“Luʋɔ makumaku ŋu nyaa nye nufiafia siwo doa dzidzɔ na Plato wu la dometɔ ɖeka.”—Body and Soul in Ancient Philosophy

Nu si dzɔna le ku megbe ŋu nyawo nɔ vevie na Plato. Agbalẽ aɖe (Body and Soul in Ancient Philosophy) gblɔ be “luʋɔ makumaku ŋu nyaa nye nufiafia siwo doa dzidzɔ na Plato wu la dometɔ ɖeka.” Kakaɖedzi sẽŋu nɔ esi be “luʋɔ la doa go le ŋutilãa me ɖaxɔa teƒeɖoɖo nyui alo tohehe” le ku megbe ɖe ale si wònɔ agbee esime wònɔ anyigba dzi la nu. *

 ALEKE PLATO ƑE NUFIAFIAWO WƆ KAKA?

Plato ƒe Academy la nɔ anyi ƒe alafa asieke, tso ƒe 387 Do Ŋgɔ Na Mía Ŋɔli va se ɖe ƒe 529 Mía Ŋɔli, eye nu siwo wofiana le afi ma la kpɔ ŋusẽ ɖe ame geɖe dzi. Plato ƒe susuwo va xɔ aƒe ɖe dukɔ siwo dzi Hela kple Roma ɖu la me. Yuda xexemenunyala Philo, si tso Alexandria, va xɔ Plato ƒe nufiafiawo dzi se, abe ale si wònɔ le subɔsubɔha siwo be yewonye Kristotɔwo la ƒe kplɔlawo dometɔ geɖe hã gome ene. Esia wɔe be trɔ̃subɔlawo ƒe xexemenunya, siwo dome luʋɔ makumaku ƒe nufiafiaa le la, va tra ɖe Yuda-subɔsubɔ kple Kristotɔnyenye me.

Numekugbalẽ aɖe (The Anchor Bible Dictionary) gblɔ be, “Hela xexemenunya, vevietɔ Plato ƒe dzixɔsewo, kpɔ ŋusẽ ɖe Kristotɔwo ƒe hamenufiafiawo katã dzi va se ɖe afi aɖe ya teti, gake le Kristotɔ hakplɔla aɖewo ya gome la, . . . esɔ be woayɔ wo be Plato ƒe nusrɔ̃lawo.” Azɔ de dzesi vovototo si le Plato ƒe nufiafia kple Biblia tɔ dome.

Nya si Plato gblɔ: “[Le ku me la,] nu si míeyɔna be luʋɔ makumaku, si nye ame si míenye ŋutɔŋutɔ la, doa go ɖadona ɖe mawuawo ŋkume . . . hena akɔntabubu—ame nyuiwo kpɔa mɔ na esia kple dzideƒo, ke enyea ŋɔdzinu gã na ame vɔ̃ɖiwo.”—Plato—Laws, Book XII.

Nya si Biblia gblɔ: Luʋɔ lae nye amea ŋutɔ alo agbe si wòle. Lãwo gɔ̃ hã nye luʋɔwo. Ne ame ku la, eƒe akpa aɖeke megayia edzi nɔa agbe o. * De dzesi nu si ŋɔŋlɔ siawo gblɔ:

  • “Ame gbãtɔ, Adam, zu luʋɔ gbagbe.”—1 Korintotɔwo 15:45.
  • “Mawu gblɔ be: ‘Luʋɔ gbagbewo nedo le anyigba la dzi le wo ƒomeviwo nu, aƒemelãwo kple lã siwo tana, kpakple gbemelãwo.’”—1 Mose 1:24, NW.
  • “Nye luʋɔ neku.”—4 Mose 23:10, NW.
  • “Luʋɔ, si wɔ nu vɔ̃ la, eyae aku.”—Xezekiel 18:4.

Eme kɔ ƒãa be Biblia megblɔ be luʋɔ la nɔa agbe le ku megbe o. Eya ta bia ɖokuiwò be, ‘Biblia dzie wotu nye dzixɔsewo ɖo loo alo Plato ƒe xexemenunya dzie?’

^ mm. 7 Togbɔ be Plato na luʋɔ makumaku ƒe nufiafiaa de du hã la, menye eyae toe vɛ o. Nufiafia ma ƒomevi xɔ aƒe ɖe blematrɔ̃subɔsubɔ me, abe ale si wònɔ le Egiptetɔwo kple Babilontɔwo hã gome ene.

^ mm. 12 Le Biblia ƒe nya nu la, kukuawo le abe ame siwo le alɔ̃ dɔm ene, eye wole tsitretsitsi lalam. (Nyagblɔla 9:5; Yohanes 11:11-14; Dɔwɔwɔwo 24:15) Gake ne amewo xɔe se be luʋɔ mekuna o la, ke nu si woƒe nyaa fiae nye be tsitretsitsi mehiã o.