Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Nyɔ!  |  February 2013

 ŊKULÉLE ÐE XEXEA ME ŊU

Ŋkuléle Ðe Xexea Me Ŋu

Israel

Internet dzi nyatakakadzraɖoƒe si nye Haaretz.com gblɔ be, ɖevi siwo “wodzi wɔametɔwo evɔ woate ŋu azã mɔ̃ akpɔ woƒe nɔnɔmea do ŋgɔ na wo dzidzi hafi la” magate ŋu asama kɔdzimegãwo be woɖe mɔ wodzi yewo wɔametɔwoe o. Gake wo dzilawo ya ate ŋu asama kɔdzimegãwo be woaxe “ga bubu siwo wòahiã be yewoatsɔ akpɔ yewo vi wɔametɔwo dzi kple woƒe nuhiahiãwo gbɔ le [woƒe] agbe me katã la na yewo.”

Australia

Le Australia la, atsu kple asi 8 le 10 ɖe sia ɖe me nɔa wo nɔewo gbɔ abe srɔ̃tɔwo ene hafi va ɖea wo nɔewo.

Greece

Greece Dɔwɔƒe Si Kpɔa Lãmesẽnyawo gbɔ la bu akɔnta be ne wotsɔ ame siwo wu wo ɖokuiwo le ƒe 2010 ƒe ɣleti atɔ̃ gbãtɔwo me sɔ kple ƒe 2011 ƒe ɣleti atɔ̃ gbãtɔwo tɔ la, xexlẽmea dzi ɖe edzi alafa memama 40. Esi ganyawo va sesẽ le dukɔa me nyitsɔ laa lae wòdzi ɖe edzi alea.

United States

Dukɔa Ƒe Dzɔdzɔmenuwo Takpɔha gblɔ be, wogblẽa nuɖuɖu ƒe agbɔsɔsɔ akpa 40 le alafa ɖeka ɖe sia ɖe me dome. Wobu akɔnta be wogblẽa agblemenukuwo ƒe akpa 7 le alafa me ɖe bo dzi, nuɖuɖu siwo wodzrana le nuɖuɖudzraƒewo ƒe akpa 17 le alafa me tsia anyi womeɖua wo o, eye be ƒomewo hã tsɔa nuɖuɖu siwo woƒlena la ƒe akpa 25 le alafa me ƒua gbe.

Madagascar

Woke ɖe agama suetɔ kekeake si le xexea me la ŋu le Madagascar nyitsɔ laa. Agama dzĩ sue siawo siwo didi milimeta 29 la dometɔ aɖewo ƒe didime sɔ kple degblefetsu ƒe kekeme. Esi wole ave siwo me wonɔna la dome gblẽm ta la, vɔvɔ̃ li be womagava nɔ anyi kura o.