Amewo lɔ̃na faa be yewoaɖo to Fiaɖuƒe gbedeasia ne wosee le wo degbe me. Anye susu ma tae le ƒe 33 K.Ŋ. ƒe Pentekoste ŋkekea dzi la, Yehowa wɔ ɖoɖo be “Yudatɔ mawuvɔ̃la siwo tso dukɔ sia dukɔ me le dziƒoa te” nase nya nyuia le woawo “ŋutɔ degbe” me, togbɔ be woanya se Hebrigbe alo Helagbe si ame geɖe dona ɣemaɣi hã. (Dw 2:5, 8) Le nuto siwo me gbe vovovo dolawo le me egbea la, hame siwo doa gbe vovovowo la ate ŋu anɔ dɔ wɔm le anyigbamama ɖeka ma ke me. Aleke gbeƒãɖela siwo le hame siawo tɔgbi me awɔ nu ɖekae aɖe gbeƒã na amewo katã evɔ womanɔ dɔ wɔm ɖe dɔ dzi si aɖia aƒemenɔlawo nu o?

  • Mide adaŋu (Lod 15:22): Ele be subɔsubɔdɔdzikpɔlawo nade adaŋu akpɔe ɖa be mɔnu kawoe yewoazã wòade yewo dzi yewoaɖe gbeƒã nya nyuia hã. Ne anyigbamamaa melolo o la, hameawo ate ŋu aɖoe be yewomayi aƒe siwo me aƒemenɔlawo medoa gbe si yewoƒe hamea dona me o. Ke hã, ne hame mawo mete ŋu le woƒe anyigbamamaa kpem ɖo edziedzi o, le esi aƒeawo dome didi ta la, woate ŋu atiae be miage ɖe aƒe ɖe sia ɖe me, gake miana yewoanya ne ame aɖe ɖe ɖetsɔleme fia le anyigbamamaa me. (od 93 ¶37) Alo woate ŋu abia tso miaƒe hamea si be miakpe ɖe yewo ŋu yewoadi ame siwo doa gbe si yewoƒe hamea dona eye miaɖo woƒe adrɛswo ɖe yewo. (km 7/12 5, aɖaka) Gake nenɔ susu me na mi hã be, gbe vovovo dolawo ate ŋu anɔ aƒe aɖewo me. Ele be ɖoɖo siwo miawɔ be yewoate ŋu akpe anyigbamamawo ɖo la, nawɔ ɖeka kple se siwo ku ɖe amewo ƒe nyatakakawo ŋu le dukɔa me.

  • Miwɔ dɔ ɖekae (Ef 4:16): Miwɔ ɖe mɔfiame siwo subɔsubɔdɔdzikpɔla na mi la dzi pɛpɛpɛ. Ðe nèle Biblia srɔ̃m kple ame aɖe si medoa gbe si miaƒe hamea dona oa? Ne ètsɔ nusrɔ̃via na ame aɖe le hame alo ƒuƒoƒo si te ɖe mia ŋu si doa wo degbea la, esia akpe ɖe eŋu wòayi ŋgɔ kabakaba.

  • Dzra ɖo (Lod 15:28; 16:1): Ne aƒemenɔlaa doa gbe bubu la, dze agbagba nàgblɔ nya nyuia nɛ. Bu gbe vovovo dola siwo ŋu nàte ŋu ake ɖo la ŋu eye nàwɔ Biblia kple video siwo le gbe mawo me ƒe kɔpi ɖe wò fon alo tablɛt dzi do ŋgɔ.Àte ŋu azã JW Language app la, atsɔ asrɔ̃ ale si wodoa gbe na ame le gbe mawo me hã.