Dzo kpo yi emenuwo dzi

Kristotɔwo Ƒe Agbenɔnɔ Kple Subɔsubɔdɔ Kpekpe Ŋuti Mɔfiamewo

Kristotɔwo Ƒe Agbenɔnɔ Kple Subɔsubɔdɔ Kpekpe Ŋuti Mɔfiamewo

Emenyawo

 

Memamawo

Ŋgɔdonyawo

 2

Nu Xɔasi Siwo Le Mawu Ƒe Nya La Me

 3

Na Wò Subɔsubɔdɔa Nanyo Ðe Edzi

 4

Kristotɔwo Ƒe Agbenɔnɔ

 5

Nyataƒonyawo

 6

Do Vevie Nuxexlẽ Kple Nufiafia

 7

Aɖaŋuɖoɖo

 8

Gamedzinɔnɔ

 9

Nutome Sue Dzikpɔla Ƒe Sasrãkpɔ

 10

Takpekpe Ƒe Kwasiɖaa

 11

Ŋkuɖodzi Ƒe Kwasiɖaa

 12

Agbenɔnɔ Kple Subɔsubɔdɔ Kpekpea Dzikpɔla

 13

Agbenɔnɔ Kple Subɔsubɔdɔ Kpekpea Ƒe Zimenɔla

 14

Hamemetsitsiwo Ƒe Ha Ƒe Ðoɖowo Gbɔ Kpɔla

 15

Aɖaŋuɖola Kpeɖeŋutɔ

 16

Sukuxɔ Bubuwo

 17

Videowo

 18

1. Ðoɖo si le Kristotɔwo Ƒe Agbenɔnɔ Kple Subɔsubɔdɔ Kpekpe Ƒe Nusrɔ̃gbalẽa me dzie woazɔ ɖo awɔ Kristotɔwo Ƒe Agbenɔnɔ Kple Subɔsubɔdɔ kpekpea, eye woawɔ ɖe mɔfiame siwo gbɔna dzi. Mikpe gbeƒãɖelawo katã be woaŋlɔ ŋkɔ awɔ dɔ le sukua me. Ne ame bubu siwo le ha dem kple hamea lɔ̃ ɖe Biblia ƒe nufiafiawo dzi eye wole agbe nɔm ɖe Kristotɔwo ƒe dzidzenuwo nu la, ke woawo hã ate ŋu awɔ dɔ le sukua me.—be axa 282.

 2. Ŋgɔdonyawo: Miniti 3 alo made o. Kwasiɖa sia kwasiɖa la, le hadzidzi kple gbedodoɖa si woatsɔ adze kpekpea gɔme megbe la, Agbenɔnɔ Kple Subɔsubɔdɔ Kpekpea ƒe zimenɔla ade dzo nɔviawo me ɖe nu siwo me woadzro le kpekpea me ŋu eye ahe susu ayi nyabiase si le Agbenɔnɔ Kple Subɔsubɔdɔ Kpekpe Ƒe Nyaŋuɖogbalẽvia me la hã dzi.

 3. Nu Xɔasi Siwo Le Mawu Ƒe Nya La Me:

  • Nuƒo: Miniti 10. Nuƒoa ƒe tanya kple nya vevi eve alo etɔ̃ siwo dzi woatui ɖo adze le Agbenɔnɔ Kple Subɔsubɔdɔ Kpekpe Ƒe Nusrɔ̃gbalẽa me. Woade nuƒo sia asi na hamemetsitsi alo subɔsubɔdɔwɔla si dze. Ne kwasiɖa aɖe ƒe Biblia xexlẽa dze egɔme kple Biblia gbalẽ yeye la, woaɖe video kpui aɖe ku ɖe Biblia gbalẽ ma ŋu atsɔ adze dɔdeasia gɔme. Nuƒolaa ate ŋu ahe susu ayi ale si videoa de nu nuƒoa ƒe tanya mee dzi. Gake ele be wòaƒo nu tso nya vevi siwo le nusrɔ̃gbalẽa me hã ŋu. Ele be wòadzro nɔnɔmetata kple Ŋɔŋlɔawo me nufiame siwo le eme la hã me, elabena ɖe wotrɔ asi le wo ŋu be woana nyatia me nakɔ nyuie.

  • Mawu Ƒe Nya La Me Kesinɔnuwo Didi: Miniti 8. Anye nyabiabia kple ŋuɖoɖo eye womagblɔ ŋgɔdonya alo nyataƒonya o. Woadee asi na hamemetsitsi alo subɔsubɔdɔwɔla si dze. Nuƒolaa ŋutɔ nakpɔ ɣeyiɣi si wòazã ɖe biabia eneawo dometɔ ɖe sia ɖe ŋu le ale si wòka hameae nu. Gake nekpɔ egbɔ be yebia nyabiaseawo katã nyaselawo. Azɔ hã ate ŋu atiae be yeana woaxlẽ mawunyakpukpui siwo woyɔ le biabia eve gbãtɔawo me la katã loo alo womaxlẽ wo o. Ame sia ame ƒe nyaŋuɖoɖo naxɔ sɛkɛnd 30 alo made o.

  • Biblia Xexlẽ: Miniti 4 alo made o. Woade dɔ sia asi na nɔviŋutsu. Sukuvia axlẽ akpa si wode esi, eye magblɔ ŋgɔdonya alo nyataƒonya aɖeke o. Ele be kpekpea ƒe zimenɔla natsi dzi ɖe kpekpeɖeŋu nana sukuviawo be woaxlẽ nu nyuie, eme nakɔ, nyawo nazɔ tẽe, woate gbe ɖe nya siwo hiã dzi, woanya ale si woatrɔ gbe vovovoe, woagbɔ ɖe eme le afi siwo wòhiã le, eye woaxlẽ nua wòasɔ ɖe dzɔdzɔme nu la ŋu.

  4. Na Wò Subɔsubɔdɔa Nanyo Ðe Edzi: Miniti 15 alo made o. Wotrɔ asi le akpa sia ŋu be wòakpe ɖe ame sia ame ŋu wòadzra ɖo ɖe subɔsubɔdɔa ŋu ahabi le gbeƒãɖeɖe kple nufiafia me. Sukuviawo natu woƒe yiyi zi gbãtɔ kple tɔtrɔyi ƒe dɔdeasiawo ɖe kpɔɖeŋudzeɖonya siwo dze le Agbenɔnɔ Kple Subɔsubɔdɔ Kpekpe ƒe Nusrɔ̃gbalẽa ƒe axa gbãtɔ la dzi. Gbeƒãɖelawo ate ŋu atiae be yewoazã agbalẽ alo video siwo le míaƒe Dɔwɔnu Siwo Mietsɔ Fiaa Nui me loo alo womazãe o. Ɣeyiɣi si tututu sukuvi ƒe dɔdeasi ɖe sia ɖe axɔ la adze le Agbenɔnɔ Kple Subɔsubɔdɔ Kpekpe Ƒe Nusrɔ̃gbalẽa me, eye ɣeaɖewoɣi la, woana mɔfiame bubuwo. Sukuviawo megatsɔ nya bubuwo kpee kple susu be game si woɖo na yewo nade kokoko o. Ɣeaɖewoɣi la, wɔwɔfia si wodzra ɖo nyuie ate ŋu awu enu miniti ɖeka alo esi wu nenema do ŋgɔ. Woate ŋu ade sukuvi ƒe dɔwo asi na hamemetsitsiwo hã ne ehiã.

  • Kpɔɖeŋudzeɖonya Ƒe Videowo: Kwasiɖa ɖe sia ɖe le ɣletia me la, woaɖe kpɔɖeŋudzeɖonya ƒe video ahadzro eme. Video siawo aku ɖe yiyi zi gbãtɔ, tɔtrɔyi gbãtɔ kple tɔtrɔyi evelia ŋu. Agbenɔnɔ Kple Subɔsubɔdɔ Kpekpea ƒe zimenɔla ye awɔ akpa sia.

  • Yiyi Zi Gbãtɔ: Woade dɔ sia asi na nɔviŋutsu alo nɔvinyɔnu. Ŋutsu ƒe aƒemenɔla nanye ŋutsu eye nyɔnu hã tɔ nanye nyɔnu, alo woanye ƒometɔwo. Sukuvia kple eƒe kpeɖeŋutɔa ate ŋu anɔ anyi alo anɔ tsitrenu. Sukuvia nazã gbedoname si sɔ le miaƒe nutoa me. Woatu woƒe numedzodzroa ɖe kpɔɖeŋudzeɖonyaa dzi.

  • Tɔtrɔyi Gbãtɔ: Woade dɔ sia asi na nɔviŋutsu alo nɔvinyɔnu. Ŋutsu ƒe aƒemenɔla meganye nyɔnu o eye nyɔnu hã tɔ meganye ŋutsu o. (km 5/97 axa 2) Sukuvia kple eƒe aƒemenɔla ate ŋu anɔ anyi alo anɔ tsitrenu. Sukuvia nawɔ nya si woagblɔ ne wotrɔ yi ame si ɖe ɖetsɔleme fia le yiyi zi gbãtɔ me gbɔ la ƒe wɔwɔfia. Woatu numedzodzroa ɖe kpɔɖeŋudzeɖonya si dze le Agbenɔnɔ Kple Subɔsubɔdɔ ƒe Nusrɔ̃gbalẽa me la dzi.

  • Tɔtrɔyi Evelia: Woade dɔ sia asi na nɔviŋutsu alo nɔvinyɔnu. Ŋutsu ƒe aƒemenɔla meganye nyɔnu o eye nyɔnu hã tɔ meganye ŋutsu o. (km 5/97 axa 2) Sukuvia kple eƒe aƒemenɔla ate ŋu anɔ anyi alo anɔ tsitrenu. Sukuvia nawɔ nya si woagblɔ ne wotrɔ yi ame si ɖe ɖetsɔleme fia le tɔtrɔyi gbãtɔ me gbɔ la ƒe wɔwɔfia. Woatu numedzodzroa ɖe kpɔɖeŋudzeɖonyaa dzi.

  • Biblia Nusɔsrɔ̃: Woade dɔ sia asi na nɔviŋutsu alo nɔvinyɔnu. Ŋutsu ƒe aƒemenɔla meganye nyɔnu o eye nyɔnu hã tɔ meganye ŋutsu o. (km 5/97 axa 2) Sukuvia kple eƒe aƒemenɔla ate ŋu anɔ anyi alo anɔ tsitrenu. Woawɔe wòanye Biblia nusɔsrɔ̃ si gɔme wodze xoxo. Womagblɔ ŋgɔdonya alo nyataƒonya o, negbe ɖe wobia tso sukuvia si be  wòawɔ dɔ tso nudidi ma ŋu hafi. Togbɔ be woate ŋu axlẽ memamaawo hã la, mehiã be woaxlẽ wo katã kokoko o. Woana nufiafiaɖaŋu nadze nyuie.

  • Nuƒo: Nɔviŋutsue awɔ sukuvi ƒe dɔdeasi sia eye awɔe wòanye nuƒo na hamea.

  5. Kristotɔwo Ƒe Agbenɔnɔ: Le hadzidzi megbe la, kpekpea ƒe akpa sia ƒe miniti 15 gbãtɔ anye dɔdeasi ɖeka alo eve siwo akpe ɖe nɔviawo ŋu woatsɔ Mawu ƒe Nyaa ade dɔwɔwɔ me. Ne míena mɔfiame bubu aɖeke o la, ke woade dɔ siawo asi na hamemetsitsi alo subɔsubɔdɔwɔla si dze; gake ne enye miaƒe nuhiahiãwo la, woadee asi na hamemetsitsi.

  • Hame Ƒe Biblia Nusɔsrɔ̃: Miniti 30. Woade akpa sia asi na hamemetsitsi si dze. (Ne hamemetsitsiwo mesɔ gbɔ o la, woate ŋu adee asi na subɔsubɔdɔwɔla siwo dze ne ehiã.) Hamemetsitsiwo ƒe ha natia wo dometɔ siwo dze akpɔ Hame Ƒe Biblia Nusɔsrɔ̃ dzi. Ele be nɔvi siwo wotia nate ŋu akpɔ nusɔsrɔ̃a dzi nyuie ale be wòanɔ game dzi, woate gbe ɖe Ŋɔŋlɔ vevieawo dzi ahakpe ɖe nɔviwo ŋu woakpɔ ale si nusɔsrɔ̃a ka woe. Woakpɔ eŋuti gɔmeɖose nyui aɖewo le Gbetakpɔxɔ Nusɔsrɔ̃ dzi kpɔkpɔ ŋuti mɔfiame siwo li me. Ne anya wɔ la, mizã nusɔsrɔ̃dzikpɔla kple nuxlẽla vovovowo kwasiɖa ɖe sia ɖe. Ne Agbenɔnɔ Kple Subɔsubɔdɔ Kpekpea ƒe zimenɔla gblɔ be woatso nusɔsrɔ̃a dzi la, ke ame si le dɔdeasia wɔm ŋutɔ nakpɔ ale si wòawɔe. Ate ŋu ana woaxlẽ memama aɖewo ko.

  6. Nyataƒonyawo: Miniti 3 alo made o. Agbenɔnɔ Kple Subɔsubɔdɔ Kpekpea ƒe zimenɔla agato kpekpea me nya veviwo me, eye adzro biabia kple ŋuɖoɖo si dze le Agbenɔnɔ Kple Subɔsubɔdɔ Kpekpe Ƒe Nyaŋuɖogbalẽvia hã me. Azɔ hã, ele be wòahe susu ayi nu siwo me woadzro le kwasiɖa si akplɔe ɖo me dzi, ɖewohĩ abia nyabiase aɖe si ŋu woava ɖo. Ne ɣeyiɣi li la, ate ŋu ayɔ ame siwo awɔ dɔ le kwasiɖa si kplɔe ɖo me la ƒe ŋkɔwo. Zimenɔlaa ye awɔ gbeƒãɖeɖe siwo li alo axlẽ lɛta siwo hiã la na hamea le eƒe nyataƒoƒoa me, negbe ɖe míena mɔfiame bubu aɖe. Migawɔ gbeƒãɖeɖe nyanyɛwo, abe gbeadziyiɖoɖowo kple xɔa me dzadzraɖo ŋuti gbeƒãɖeɖewo le kplɔ̃a ta o, ke miklãe ɖe nyatakakaʋuƒoa dzi boŋ. Ne edzɔ be ɣeyiɣi si woɖo na nyataƒonyawo masu woatsɔ awɔ gbeƒãɖeɖewo alo axlẽ lɛtawo o la, ke zimenɔlaa nabia tso nɔvi siwo le Kristotɔwo Ƒe Agbenɔnɔ ƒe dɔdeasiawo wɔm la si be woatso woƒe dɔdeasiawo dzi ale si dze. ( Kpɔ memama 5 kple  9.) Woatsɔ hadzidzi kple gbedodoɖa awu kpekpea nu.

 7. Do Vevie Nuxexlẽ Kple Nufiafia: Tso January 7, 2019 ƒe kwasiɖaa me la, Nufiafia ƒe agbalẽ gbadzaa ye Agbenɔnɔ Kple Subɔsubɔdɔ Kpekpea ƒe zimenɔlaa azã atsɔ akafu sukuviawo ahaɖo aɖaŋu na wo. Sukuviawo dometɔ ɖe sia ɖe nawɔ dɔ tso nudidi si adze le kpɔtɔtɔ me le dɔdeasia gbɔ le Agbenɔnɔ Kple Subɔsubɔdɔ Kpekpe Ƒe Nusrɔ̃gbalẽa me la ŋu. Le ɣleti ɖe sia ɖe ƒe kwasiɖa gbãtɔ me la, Agbenɔnɔ Kple Subɔsubɔdɔ Kpekpe ƒe zimenɔlaa adzro Nufiafia ƒe agbalẽ gbadza la ƒe nuƒoƒo ƒe nudidi ɖeka me kple nyaselawo. Wotrɔ asi le agbalẽ gbadzaa ƒe akpa si nye “Wɔ Wò Ŋgɔyiyi Ŋuti Nuŋlɔɖi” la ŋu be sukuviawo nawɔ eŋu dɔ, eye mele be zimenɔlaa nawɔ nuŋlɔɖiwo ɖe afi ma o.

  8. Aɖaŋuɖoɖo: Ne sukuviawo dometɔ ɖe sia ɖe wu eƒe dɔa nu la, Agbenɔnɔ Kple Subɔsubɔdɔ Kpekpea ƒe zimenɔla azã abe miniti ɖeka ene anɔ te ɖe Nufiafia ƒe agbalẽ gbadzaa dzi akafu wo ahaɖo aɖaŋu na wo. Ne zimenɔlaa le sukuvi aɖe kpem la, mayɔ nudidi si wode asi nɛ o. Gake ne sukuvia wu eƒe dɔdeasia nu eye zimenɔlaa kafui ale si dze vɔ la, ayɔ nudidi si ŋu sukuvia wɔ dɔ le, eye wòagblɔ nu siwo koŋ ta sukuvia wɔ nudidi ma ŋu dɔ nyuie, alo aɖe nu si tae sukuvia agate ŋu atrɔ asi le nudidi ma ŋu wòanyo ɖe edzi la me dɔmenyotɔe. Zimenɔlaa ate ŋu aƒo nu tso dɔdeasia ƒe akpa bubuwo hã ŋu ne ekpɔe be esia aɖe vi na sukuvia alo nyaselawo. Le sukuvi ɖe sia ɖe ƒe hiahiã nu la, agate ŋu anɔ te ɖe Nufiafia ƒe agbalẽ gbadzaa alo Subɔsubɔ Suku  gbalẽa dzi aɖo aɖaŋu tuameɖo bubuwo na eya ɖeɖe dzaa le kpakpã megbe alo ɣebubuɣi, ku ɖe nuƒoƒo ƒe nudidi si wode asi nɛ ŋu loo alo le nudidi bubu ŋu.—Kpɔ  memama 13 kple  16 hena mɔfiame siwo li ku ɖe Agbenɔnɔ Kple Subɔsubɔdɔ Kpekpea dzikpɔla kple Aɖaŋuɖola kpeɖeŋutɔ ƒe dɔwo ŋu.

    9. Gamedzinɔnɔ: Dɔdeasi aɖeke megagbɔ game dzi o, Agbenɔnɔ Kple Subɔsubɔdɔ Kpekpea ƒe zimenɔla ƒe nyawo hã le eme. Zimenɔla natsɔ aɖaŋudzedze atɔ te sukuviawo ne woƒe game de. Ne nɔvi siwo wɔ dɔdeasi bubuawo dometɔ aɖe ɖu game la, aɖaŋuɖola ƒe kpeɖeŋutɔa naɖo aɖaŋu na eya ɖeɖe. Kpekpe bliboa axɔ gaƒoƒo ɖeka miniti 45, hadzidziwo kple gbedodoɖawo hã le eme.

 10. Nutome Sue Dzikpɔla Ƒe Sasrãkpɔ: Ne nutome sue dzikpɔla va srã hame aɖe kpɔ la, ɖoɖo si le Agbenɔnɔ Kple Subɔsubɔdɔ Kpekpe Ƒe Nusrɔ̃gbalẽa me ke dzie kpekpea azɔ ɖo, negbe tɔtrɔ siwo gbɔna koe woawɔ: Nutome sue dzikpɔla ƒe subɔsubɔnuƒo si axɔ miniti 30 la axɔ ɖe Hame Ƒe Biblia Nusɔsrɔ̃ si le akpa si nye Kristotɔwo Ƒe Agbenɔnɔ te la teƒe. Agbenɔnɔ Kple Subɔsubɔdɔ Kpekpea ƒe zimenɔla agato nu siwo wosrɔ̃ ƒe nya veviwo me, ahe susu yi kwasiɖa si kplɔe ɖo tɔwo dzi eye wòawɔ gbeƒãɖeɖe alo axlẽ lɛta siwo hiã hafi akpe nutome sue dzikpɔlaa be wòaƒo eƒe subɔsubɔnuƒoa. Le nuƒoa megbe la, nutome sue dzikpɔla awu kpekpea nu kple hadzidzi si wòtia. Hamea mawɔ kpekpe le gbegbɔgblɔ ma ke me le sukuxɔ evelia me ne nutome sue dzikpɔla va o. Gake gbebubudolawo ƒe ƒuƒoƒo ate ŋu awɔ woƒe kpekpewo le sukuxɔ evelia me ne nutome sue dzikpɔla le hamea ŋutɔ gbɔ gɔ̃ hã. Gake ƒuƒoƒoa nawɔ ɖeka kple hamea ase nutome sue dzikpɔla ƒe subɔsubɔnuƒoa.

 11. Takpekpe Ƒe Kwasiɖa: Womawɔ hame ƒe kpekpe aɖeke le takpekpe ƒe kwasiɖaawo me o. Ame ɖe sia ɖe alo ƒome ɖe sia ɖe nadzro kwasiɖa ma ƒe kpekpea me le wo ɖokui si.

 12. Ŋkuɖodzi ƒe Kwasiɖa: Ne Ŋkuɖodzia dze kwasiɖa domedome ƒe ŋkeke aɖe dzi la, womawɔ Agbenɔnɔ Kple Subɔsubɔdɔ Kpekpea o. Gake woawɔ kpekpe hena gbedziyiyi ya le Ŋkuɖodzia ɖugbe.

  13. Agbenɔnɔ Kple Subɔsubɔdɔ Kpekpea Dzikpɔla: Hamemetsitsiwo ƒe haa natia hamemetsitsi ɖeka wòanye Agbenɔnɔ Kple Subɔsubɔdɔ Kpekpea dzikpɔla. Eyae akpɔ egbɔ be kpekpea zɔ ɖe ɖoɖo nu nyuie hewɔ ɖeka kple mɔfiame siwo míena fifia. Ele be dzeɖoɖo nanɔ eya kple aɖaŋuɖola kpeɖeŋutɔa dome ku ɖe kpekpea ŋu. Ne ɣleti aɖe ƒe Agbenɔnɔ Kple Subɔsubɔdɔ Kpekpea Ƒe Nusrɔ̃gbalẽ do ko la, Agbenɔnɔ Kple Subɔsubɔdɔ Kpekpea dzikpɔla nama ɣletia ƒe dɔdeasiawo na sukuviawo. (Kpɔ  memama 4.) Ele be woaŋlɔ sukuviwo ƒe dɔdeasiawo ɖe Kristotɔwo Ƒe Agbenɔnɔ Kple Subɔsubɔdɔ Kpekpea Ƒe Dɔdeasigbalẽvia (S-89) dzi atsɔ ana sukuviawo kwasiɖa etɔ̃ ya teti hafi gbe si gbe woawɔ dɔa naɖo.

 14. Agbenɔnɔ Kple Subɔsubɔdɔ Kpekpea Ƒe Zimenɔla: Le kwasiɖaa me la, hamemetsitsi ɖeka anye Agbenɔnɔ Kple Subɔsubɔdɔ Kpekpe bliboa ƒe zimenɔla. (Ne hamemetsitsiwo mesɔ gbɔ o la, ke miate ŋu adee asi na subɔsubɔdɔwɔla siwo dze, ne ehiã.) Adzra ɖo ɖe kpekpea ƒe ŋgɔdonya kple nyataƒonya siwo wòagblɔ ŋu eye wòadzro kpɔɖeŋudzeɖonya ƒe videowo me, eye eyae adzro video siwo ahe susu ayi nuƒoƒo ƒe nudidi yeye dzi le Nufiafia ƒe agbalẽ gbadzaa me la dzi. Eyae ayɔ ame siwo katã awɔ dɔ le kpekpea me la va kplɔ̃a ta, eye le hamemetsitsiwo ƒe agbɔsɔsɔ nu la, ate ŋu ahiã be wòawɔ dɔdeasi bubuwo le kpekpea me. Mele be wòaƒo nu fũu le kpekpea dzi kpɔkpɔ me o. Hamemetsitsiwo ƒe haa natia hamemetsitsi siwo dze anye kpekpea ƒe zimenɔlawo. Woana hamemetsitsi siwo dze la nanɔ zimenɔla ƒe dɔa wɔm ɖe wo nɔewo yome. Gake  le ale si nɔnɔmeawo le nu la, ate ŋu adzɔ be Agbenɔnɔ Kple Subɔsubɔdɔ Kpekpea dzikpɔla nanɔ zimenɔla ƒe dɔa wɔm kabakaba wu hamemetsitsi bubu siwo wotia. Ne hamemetsitsi aɖe dze akpɔ Hame Ƒe Biblia Nusɔsrɔ̃ dzi la, ke anɔ eme be edze anye kpekpea ƒe zimenɔla hã. Gake míeɖe kuku miɖo ŋku edzi be ahiã be hamemetsitsi si anye zimenɔla la nakafu nɔvi siwo wɔ sukuviwo ƒe dɔdeasiawo ahaɖo aɖaŋu tuameɖowo na wo ne ehiã. Zimenɔla kee akpɔ egbɔ be kpekpea wu enu ɖe game dzi. (Kpɔ  memama 6 kple  9.) Ne zimenɔlaa lɔ̃ eye teƒe le nuƒolanɔƒea la, woate ŋu aglã nuƒomɔ̃ bubu nɛ ale be ne eva kplɔ̃a ta be yeayɔ ame si kplɔe ɖo la, ame si awɔ dɔdeasia hã ava nuƒolanɔƒea hafi zimenɔlaa nawu eƒe nyawo nu. Nenema kee ne zimenɔlaa lɔ̃ la, ate ŋu anɔ anyi ɖe kplɔ̃ ŋu le nuƒolanɔƒea ne wole sukuvi ƒe Biblia xexlẽ kple kpekpea ƒe akpa si nye Na Wò Subɔsubɔdɔ Nanyo Ðe Edzi ƒe dɔdeasiawo wɔm. Esia ana womagblẽ ɣeyiɣi o.

 15. Hamemetsitsiwo Ƒe Ha Ƒe Ðoɖowo Gbɔ Kpɔla: Hamemetsitsiwo ƒe ha ƒe ɖoɖowo gbɔ kpɔlae ama kpekpea me dɔdeasiwo katã, negbe sukuviwo ƒe dɔdeasiwo koe mele eme o. Eya kee ade dɔ asi na kpekpea ƒe zimenɔla siwo hamemetsitsiwo ƒe haa tia be woanye kpekpea ƒe zimenɔlawo. Hamemetsitsiwo ƒe ha ƒe ɖoɖowo gbɔ kpɔla awɔ dɔ aduadu kple Agbenɔnɔ Kple Subɔsubɔdɔ Kpekpea dzikpɔla akpɔ egbɔ be yeklã kpekpe bliboa ƒe ɖoɖowɔɖi si dzi ame siwo si dɔ le ƒe ŋkɔwo dze le la ɖe nyatakakaklãɖoƒea.

  16. Aɖaŋuɖola Kpeɖeŋutɔ: Ne anya wɔ la, anyo be woatia hamemetsitsi si nye nuƒola bibi be wòawɔ ɖoƒe sia. Aɖaŋuɖola kpeɖeŋutɔa ƒe dɔe nye be, ne ehiã la, wòaɖo aɖaŋu na hamemetsitsi alo subɔsubɔdɔwɔla siwo awɔ dɔ le kplɔ̃a ta; le Agbenɔnɔ Kple Subɔsubɔdɔ Kpekpea me, ne woƒo dutoƒonuƒowo, ne wokpɔ Gbetakpɔxɔ Nusɔsrɔ̃ alo Hamea Ƒe Biblia Nusɔsrɔ̃ dzi, alo xlẽ memamawo le nusɔsrɔ̃a wɔɣi. (Kpɔ  memama 9.) Ne hamemetsitsi siwo nye nuƒola bibiwo kple nufiala nyuiwo sɔ gbɔ le hamea me la, ke woate ŋu aɖɔli aɖaŋuɖola kpeɖeŋutɔa ƒe sia ƒe. Mehiã kokoko be aɖaŋuɖola kpeɖeŋutɔa naɖo aɖaŋu na nɔviawo ɣe sia ɣi si wowɔ dɔdeasi aɖe o.

 17. Sukuxɔ Bubuwo: Ne sukuviwo sɔ gbɔ le hame aɖe me la, woate ŋu awɔ ɖoɖo awɔ sukuviwo ƒe dɔdeasiwo le sukuxɔ bubuwo hã me. Aɖaŋuɖola bibi aɖe nakpɔ sukua dzi le sukuxɔ bubuawo me, eye anyo ŋutɔ be wòanye hamemetsitsi. Le afi si wòhiã le la, woate ŋu azã subɔsubɔdɔwɔla si dze nyuie. Hamemetsitsiwo ƒe haa natia ame si dze awɔ dɔ sia eye woakpɔe ɖa ne ehiã be woadee asi na ame vovovowo ɖe wo nɔewo yome. Aɖaŋuɖolaa nawɔ ɖe mɔfiame siwo le  memama 8 lia me dzi. Ne wowu Nu Xɔasi Siwo Le Mawu Ƒe Nya La Me ƒe dɔdeasi si nye Mawu Ƒe Nyaa Me Kesinɔnuwo Didi nu ko la, woana sukuvi siwo si dɔ le le sukuxɔ bubuawo me nayi afi ma. Woagawɔ ɖeka kple hamea ne kpekpea ƒe akpa si nye Na Wò Subɔsubɔdɔa Nanyo Ðe Edzi wu enu. Ne wole video aɖe me dzrom la, ame siwo le sukuxɔ bubu me la nanɔ afi ma akpɔ videoa alo ase numedzodzroa ne anya wɔ. Ne manya wɔ o la, ke aɖaŋuɖola si le sukuxɔ ma me la nazã tablɛt, kɔmpiuta, alo emawo tɔgbi atsɔ aɖe video la ahadzro eme.

 18. Videowo: Woawɔ video aɖewo koŋ be míaɖe le kpekpe sia me. Woada video siwo míaɖe le kwasiɖa domedome kpekpea me la ɖe JW Library dɔwɔnua dzi ame sia ame nakpɔ. Ɣeaɖewoɣi ne woɖe kpɔɖeŋudzeɖonyawo ƒe videowo le Agbenɔnɔ Kple Subɔsubɔdɔ Kpekpea me vɔ la, woagate ŋu aɖee le kpekpe hena gbeadziyiyi me emegbe.