Dzo kpo yi emenuwo dzi

Dzo kpo yi emenuawo dzi

Yosua 7:1-26

EMENYAWO ƑE TOTOƉEME

  • Aitɔwo ɖu Israel-viwo dzi (1-5)

  • Yosua ƒe gbedodoɖa (6-9)

  • Nu vɔ̃ na woɖu Israel-viwo dzi (10-15)

  • Asi su Akan dzi eye woƒu kpee wòku (16-26)

7  Ke Israel-viwo meɖi anukware le nu siwo wòle be woatsrɔ̃ gbidigbidi la me o, elabena Akan,+ Karmi vi, ame si nye Zabdi vi, ame si nye Zera vi, si tso Yuda-to la me tsɔ nu siwo wòle be woatsrɔ̃ gbidii+ la ƒe ɖe. Eye Yehowa ƒe dziku fla ɖe Israel-viwo ŋu.+  Eye Yosua dɔ ŋutsuwo tso Yeriko ɖo ɖe Ai,+ si te ɖe Bet-Aven ŋu le Betel+ ƒe ɣedzeƒe, eye wògblɔ na wo be: “Miyi ɖatsa ŋku le anyigba la dzi.” Eya ta ŋutsuawo yi ɖatsa ŋku le Ai.  Esi wotrɔ gbɔ va Yosua gbɔ la, wogblɔ nɛ be: “Mehiã be aʋawɔlawo katã nayi o. Ame akpe eve alo akpe etɔ̃ ko ate ŋu asi Ai. Mègaɖe fu na aʋawɔlawo katã be woayi o, elabena ameawo mesɔ gbɔ o.”  Eya ta aʋawɔla siwo anɔ abe akpe etɔ̃ ene yi, gake wosi le Aitɔwo nu.+  Aitɔwo wu ŋutsu blaetɔ̃ vɔ ade, eye wonya wo ɖe nu tso dugbo la nu va se ɖe keke Sebarim* ke, eye wonɔ wo wum le aga la me. Eya ta dukɔ la ƒe dzi lólo zu tsi.  Enumake Yosua dze eƒe awuwo, eye wòtsyɔ mo anyi ɖe Yehowa ƒe Aɖaka la ŋgɔ va se ɖe fiẽ, Israel ametsitsiwo hã wɔ nenema, eye wonɔ ke lɔm kɔ ɖe tame.  Eye Yosua gblɔ be: “Oo Aƒetɔ Dziɖulagã Yehowa, nu ka tae nèkplɔ dukɔ sia wotso Yordan-tɔsisia be nàtsɔ mí ade asi na Amoritɔwo woatsrɔ̃? Ne ɖe míenya hetsi Yordan godo* la, ne enyo wu ɖe!  Oo Yehowa, meɖe kuku, esi Israel si le eƒe futɔwo nu* ɖe, aleke gblɔ ge mala fifia?  Ne Kanaantɔwo kple anyigba la dzi nɔlawo katã see la, woaɖe to ɖe mí, ahatsrɔ̃ míaƒe ŋkɔ ɖa le anyigba la dzi; ekema nu kae nàwɔ le wò ŋkɔ gã la ŋu?”+ 10  Eye Yehowa ɖo eŋu na Yosua be: “Tso ɖe tsitre! Nu ka tae nètsyɔ mo anyi? 11  Israel wɔ nu vɔ̃, eye wotu nu, si mebla kpli wo+ la. Wotsɔ nu siwo wòle be woatsrɔ̃ gbidigbidi la dometɔ aɖewo,+ wofi wo,+ eye wotsɔ wo ɣla ɖe woƒe nuwo dome.+ 12  Eya ta Israel-viwo mate ŋu anɔ te ɖe woƒe futɔwo nu o. Woatrɔ megbe ade woƒe futɔwo ahasi le wo nu, elabena wozu nu si wòle be woatsrɔ̃ gbidigbidi. Nyemaganɔ kpli mi o, negbe ɖe mieɖe nu si wòle be woatsrɔ̃ gbidii la ɖa le mia dome hafi.+ 13  Tso nàkɔ dukɔ la ŋu!+ Gblɔ na wo be: ‘Mikɔ mia ɖokuiwo ŋu etsɔ, elabena ale Yehowa Israel ƒe Mawu la gblɔe nye esi: “Oo Israel, nu si wòle be woatsrɔ̃ gbidii la le dowòme. Màgate ŋu anɔ te ɖe wò futɔwo nu o, va se ɖe esime mieɖe nu si wòle be woatsrɔ̃ gbidigbidi la ɖa le mia dome hafi. 14  Miva etsɔ ŋdi, to sia to, eye to si dzi Yehowa atɔ asii la nate va, ƒome sia ƒome, eye ƒome si dzi Yehowa atɔ asii+ la nate va, aƒe sia aƒe, eye aƒe si dzi Yehowa atɔ asii la nate va ŋutsu ɖekaɖeka. 15  Woatɔ dzo+ ame si gbɔ wokpɔ nu si wòle be woatsrɔ̃ gbidii la le, eya kple eƒe nuwo katã, elabena etu Yehowa ƒe nubabla+ la, eye wòwɔ ŋukpenanu le Israel.”’” 16  Le ŋufɔke la, Yosua fɔ ŋdi kanya, eye wòna Israel te va, to sia to, eye wotɔ asi Yuda-to la dzi. 17  Ena Yuda ƒomeawo te va, eye wotɔ asi Zera viwo+ ƒe ƒome la dzi, eye emegbe wòna Zera viwo ƒe ƒomea te va, ŋutsu sia ŋutsu, eye wotɔ asi Zabdi dzi. 18  Mlɔeba ena Zabdi ƒe aƒe la te va, ŋutsu sia ŋutsu, eye wotɔ asi Akan, Karmi vi, Zabdi vi, ame si nye Zera vi, tso Yuda-toa me la dzi.+ 19  Eye Yosua gblɔ na Akan be: “Vinye, meɖe kuku, de bubu Yehowa Israel ƒe Mawu la ŋu, eye nàʋu eme nam. Meɖe kuku, gblɔ nu si nèwɔ la nam. Mègaɣlae ɖem o.” 20  Eye Akan ɖo eŋu na Yosua be: “Le nyateƒe me la, nyee wɔ nu vɔ̃ ɖe Yehowa Israel ƒe Mawu la ŋu, eye nu si mewɔ lae nye esi: 21  Esi mekpɔ awu xɔasi nyakpɔ aɖe si tso Sinar+ kple klosalo sekel* alafa eve, kple sikakpɔti ɖeka, si ƒe kpekpeme nye sekel blaatɔ̃ le aboyonuawo dome la, wobiã ŋu nam, eye metsɔ wo. Meɖi nuawo ɖe nye agbadɔ me, eye ga la le wo te.” 22  Enumake Yosua dɔ amewo woƒu du yi agbadɔ la me, eye vavãe woɖi awuawo ɖe eƒe agbadɔ la me, eye ga la hã le wo te. 23  Ale wotsɔ nuawo tso agbadɔ la me vɛ na Yosua kple Israel-viwo katã, eye wotsɔ wo da ɖe Yehowa ŋkume. 24  Azɔ Yosua kple Israel blibo si le eŋu la kplɔ Akan,+ Zera vi la, eye wotsɔ klosaloa, awu xɔasia kple sikakpɔti+ la, eye wokplɔ viaŋutsuwo, vianyɔnuwo, eƒe nyiwo, tedziwo, alẽwo, eye wotsɔ eƒe agbadɔ kple eƒe nuwo katã yi Akor Bali+ la me. 25  Eye Yosua gblɔ be: “Nu ka tae nèhe vɔ̃ va mía dzi?+ Yehowa hã ahe vɔ̃ ava dziwò egbe sia.” Israel blibo la ƒu kpe wo woku,+ eye wotɔ dzo wo.+ Ale woƒu kpe wo katã woku. 26  Eye wofɔ kpewo li kɔ gã aɖe ɖe edzi, eye kɔ sia li va se ɖe egbe. Eye Yehowa ƒe dziku helĩhelĩ la nu fa.+ Esia tae wona ŋkɔ teƒe ma be Akor Bali me* va se ɖe egbe sia.

Etenuŋɔŋlɔ

Egɔmee nye, “Kpegbãƒe.”
Efia, ɣedzeƒe gome.
Alo, “trɔ ʋume de eƒe futɔwo.”
Sekel ɖeka le gram 11.4. Kpɔ Megbenyawo B14.
Egɔmee nye, “Afɔku; Vɔ̃.”