Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Yosua 24:1-33

EMENYAWO ƑE TOTOƉEME

  • Yosua gbugbɔ gblɔ Israel-viwo ƒe ŋutinya na wo (1-13)

  • Nuxɔxlɔ̃ wo be woasubɔ Yehowa (14-24)

    • “Ke nye kple nye aƒe ya, míasubɔ Yehowa” (15)

  • Yosua bla nu kple Israel dukɔ la (25-28)

  • Yosua ƒe ku kple eɖiɖi (29-31)

  • Woɖi Yosef ƒe ƒuwo ɖe Sekem (32)

  • Eleazar ƒe ku kple eɖiɖi (33)

24  Yosua ƒo Israel-toawo katã nu ƒu ɖe Sekem, eye wòyɔ Israel ƒe ametsitsiwo, tatɔwo, ʋɔnudrɔ̃lawo kple dzikpɔlawo,+ eye wova tsi tsitre ɖe Mawu vavã la ŋkume.  Yosua gblɔ na dukɔ blibo la be: “Ale Yehowa, Israel ƒe Mawu la, gblɔe nye esi: ‘Le blema+ la, Tɔsisi* la ƒe go kemɛ dzie mia tɔgbuiwo+ nɔ—wo dometɔ ɖekae nye Tera, si nye Abraham kple Nahor fofo—eye wosubɔ mawu bubuwo.+  “‘Emegbe mekplɔ mia tɔgbui Abraham+ tso Tɔsisi* la ƒe go kemɛ dzi, mena wòtsa le Kanaan-nyigba blibo la dzi, eye mena eƒe dzidzimeviwo sɔ gbɔ.+ Metsɔ Isak+ nɛ,  eye metsɔ Yakob kple Esau+ na Isak. Emegbe metsɔ Seir To la na Esau be wòazu etɔ;+ eye Yakob kple viawo yi Egipte.+  Emegbe medɔ Mose kple Aron,+ eye metsɔ nu siwo mewɔ le Egipte la wɔ fu dukɔ ma,+ eye mekplɔ mi dzoe.  Esime mekplɔ mia fofowo tso Egipte+ gbɔna, eye mieva ɖo ƒua nu la, Egiptetɔwo ti mia fofowo yome kple aʋatasiaɖamwo kpakple sɔdolawo va ɖo keke Ƒudzĩ+ la nu ke.  Wodo ɣli na Yehowa,+ eye wòna viviti va nɔ mi kple Egiptetɔwo dome, ena ƒu la nyè tsyɔ wo dzi,+ eye miaƒe ŋkuwo kpɔ nu si mewɔ le Egipte.+ Eye mieva nɔ gbea dzi ƒe* geɖe.+  “‘Eye mekplɔ mi va Amoritɔ siwo nɔ Yordan ƒe go kemɛ* dzi la ƒe anyigba dzi, eye wowɔ aʋa kpli mi.+ Gake metsɔ wo de asi na mi, ale be miete ŋu xɔ woƒe anyigba, eye metsrɔ̃ wo ɖa gbidigbidi le mia ŋgɔ.+  Eye Moab-fia Balak, Zipor vi, ho aʋa ɖe Israel ŋu. Eya ta edɔ woyi ɖayɔ Bileam, Beor vi vɛ, be wòaƒo fi ade mi.+ 10  Gake nyemeɖo to Bileam+ o. Eya ta eyra mi enuenu,+ eye meɖe mi tso esi me.+ 11  “‘Emegbe mietso Yordan+ va Yeriko.+ Ke Yerikotɔwo ƒe kplɔlawo,* Amoritɔwo, Perizitɔwo, Kanaantɔwo, Hititɔwo, Girgasitɔwo, Hivitɔwo kple Yebusitɔwo wɔ aʋa kpli mi, ke metsɔ wo de asi na mi.+ 12  Eya ta mena dzi ɖe le amewo ƒo* le mia ŋgɔ,+ eye esia nya wo ɖa le mia ŋgɔ abe ale si ko wonya Amoritɔwo ƒe fia eveawo ene. Ke menye wò yi kple wò da ye wɔ esia o.+ 13  Ale metsɔ anyigba si ŋu mieku kutri aɖeke le o kple du siwo mietso o+ la na mi miele wo me. Waingble siwo miede o kple amitibɔ siwo mietso o la me nuwo ɖumee miele.’+ 14  “Eya ta mivɔ̃ Yehowa, eye misubɔe le fɔmaɖimaɖi kple nuteƒewɔwɔ me,*+ miɖe mawu siwo mia tɔgbuiwo subɔ le Tɔsisi* la ƒe go kemɛ dzi kple Egipte+ la ɖa, eye misubɔ Yehowa. 15  Ke ne medze mia ŋu be miasubɔ Yehowa o la, ekema mitia ame si subɔ ge miala+ egbea, eɖanye mawu siwo mia tɔgbuiwo subɔ le Tɔsisi*+ la ƒe go kemɛ dzi alo Amoritɔ siwo ƒe anyigba dzi miele la ƒe mawuwo o.+ Ke nye kple nye aƒe ya, míasubɔ Yehowa.” 16  Eye dukɔ la ɖo eŋu be: “Madzɔ akpɔ gbeɖe be míagblẽ Yehowa ɖi aɖasubɔ mawu bubuwo o. 17  Yehowa mía Mawu ye kplɔ mí kple mía fofowo dzoe le Egipte-nyigba dzi,+ tso kluviwo ƒe me,+ eye eyae wɔ dzesi gã siawo le mía ŋkume,+ eye wòdzɔ mía ŋu le mɔ blibo si míezɔ la katã dzi kple dukɔ siwo katã dome míeto la me.+ 18  Yehowa nya dukɔwo katã kple Amoritɔ siwo nɔ anyigbaa dzi la ɖa le mía ŋgɔ. Eya ta míawo hã míasubɔ Yehowa, elabena eyae nye mía Mawu.” 19  Eye Yosua gblɔ na dukɔ la be: “Miate ŋu asubɔ Yehowa o, elabena Mawu kɔkɔe wònye;+ Mawu si biaa ɖokuitsɔtsɔna blibo+ ye wònye. Matsɔ miaƒe dzidadawo* kple miaƒe nu vɔ̃wo ake o.+ 20  Ne miegblẽ Yehowa ɖi, eye miesubɔ dutamawuwo la, ekema eya hã atɔ ŋku mi ahatsrɔ̃ mi ɖa keŋkeŋ evɔ wònye ewɔ nyui na mi hafi.”+ 21  Ke dukɔ la ɖo eŋu na Yosua be: “Gbeɖe, Yehowa koe míasubɔ!”+ 22  Eya ta Yosua gblɔ na dukɔ la be: “Miawo ŋutɔe nye ɖasefowo na mia ɖokui be, yewo ŋutɔe tiae be yewoasubɔ Yehowa.”+ Eye woɖo eŋu be: “Ɛ̃, míawoe nye ɖasefowo.” 23  “‘Ekema miɖe dutamawu siwo le mia dome la ɖa, eye mitrɔ miaƒe dzi ɖe Yehowa, Israel ƒe Mawu la ŋu.” 24  Eye dukɔ la ɖo eŋu na Yosua be: “Míasubɔ Yehowa mía Mawu la, eye míaɖo to eƒe gbe!” 25  Ale Yosua bla nu kple dukɔ la gbe ma gbe, eye wòwɔ ɖoɖowo kple sewo na wo le Sekem. 26  Eye Yosua ŋlɔ nya siawo ɖe Mawu ƒe Segbalẽ+ la me, eye wòtsɔ kpe gã+ aɖe ɖi ɖe ati gã si le Yehowa ƒe kɔkɔeƒea gbɔ la te. 27  Yosua gblɔ na dukɔ blibo la be: “Kpɔ ɖa! Kpe sia azu ɖasefo ɖe mía ŋu,+ elabena ese nya siwo katã Yehowa gblɔ na mí, eye wòazu ɖasefo ɖe mia ŋu, ne miagagbe nu le mia Mawu la gbɔ o.” 28  Eye Yosua ɖe asi le dukɔ la ŋu, eye ame sia ame yi eƒe anyigba dzi.+ 29  Le nu siawo megbe la, Yehowa ƒe subɔla Yosua, Nun vi la, ku esime wòxɔ ƒe alafa ɖeka kple ewo.+ 30  Eye woɖii ɖe eƒe anyigba si dome wònyi la dzi le Timna-Sera,+ si le Efrayim tonuto la me, le Gaas To la ƒe dziehe. 31  Eye Israel yi edzi subɔ Yehowa le Yosua ƒe agbemeŋkekewo katã kple ame tsitsi siwo ganɔ agbe le Yosua ƒe ku megbe, siwo nya dɔ siwo katã Yehowa wɔ na Israel la ƒe agbenɔɣi katã.+ 32  Eye Israel-viwo ɖi Yosef+ ƒe ƒu siwo wotsɔ tso Egipte vɛ la ɖe Sekem le anyigba si Yakob ƒle gaku alafa ɖeka+ le Sekem fofo Hamor ƒe viwo+ si la dzi; eye anyigba la zu Yosef viwo ƒe domenyinu.+ 33  Eleazar, Aron vi la hã ku.+ Eye woɖii ɖe via Finehas+ Ƒe Togbɛ si wotsɔ nɛ le Efrayim tonuto me la dzi.

Etenuŋɔŋlɔ

Efia, Frat-tɔsisi.
Efia, Frat-tɔsisi.
Egɔmeɖeɖe tẽe, “ŋkeke.”
Efia, ɣedzeƒe.
Agate ŋu afia, “anyigbatɔwo.”
Agate ŋu afia, “vɔvɔ̃ lé amewo; ŋɔdzi lé amewo.”
Alo, “le nyateƒe me.”
Efia, Frat-tɔsisi.
Efia, Frat-tɔsisi.
Alo, “aglãdzedzewo.”