Yosua 23:1-16

  • Yosua ƒe kaklãnyawo na Israel-metsitsiwo (1-16)

    • Nya siwo Yehowa gblɔ la katã va eme (14)

23  Le ƒe geɖe megbe, esi Yehowa na gbɔdzɔe+ Israel tso eƒe futɔ siwo ƒo xlãe godoo si me vɔ, eye Yosua tsi xɔ ƒe geɖe+ la,  Yosua yɔ Israel blibo la katã,+ eƒe ametsitsiwo, tatɔwo, ʋɔnudrɔ̃lawo kple dzikpɔlawo,+ eye wògblɔ na wo be: “Metsi ku amegã xɔ ƒe geɖe.  Miawo ŋutɔwo miekpɔ nu siwo katã Yehowa mia Mawu wɔ dukɔ siawo katã le mia ta, elabena Yehowa mia Mawue le aʋa wɔm na mi.+  Kpɔ ɖa, medzidze nu+ ɖe* dukɔ siwo susɔ la ƒe anyigbawo dzi hema wo na mi wozu domenyinu na miaƒe toawo+ hekpe ɖe dukɔ siwo katã metsrɔ̃+ le Yordan nu va se ɖe Ƒu Gã* la nu le ɣetoɖoƒe la ƒe anyigbawo ŋuti.  Yehowa mia Mawue tutu wo ɖa le mia ŋgɔ+ henya wo ɖa* na mi, eye miexɔ woƒe anyigba, abe ale si tututu Yehowa mia Mawu do ŋugbe na mi ene.+  “Azɔ ele be mialé dzi ɖe ƒo vevie, ne mialé nu siwo katã woŋlɔ ɖe Mose ƒe Segbalẽa+ me la me ɖe asi ahawɔ wo dzi, ne miagadze le eŋu ɖe ɖusime alo miame+  ahade ha kple dukɔ siawo,+ siwo kpɔtɔ le mia dome la gbeɖe o. Migayɔ woƒe mawuwo ŋkɔ+ alo atsɔ wo aka atam gɔ̃ hã o, eye migasubɔ wo alo ade ta agu na wo gbeɖe o.+  Ke boŋ miku ɖe Yehowa mia Mawu+ la ŋu, abe ale si tututu miewɔe va se ɖe egbe sia ene.  Yehowa anya dukɔ gã sesẽwo ɖa le mia ŋgɔ,+ elabena ame aɖeke kura mete ŋu nɔ te ɖe mia nu va se ɖe egbe sia o.+ 10  Mia dometɔ ɖeka pɛ anya ame akpe ɖe nu,+ elabena Yehowa mia Mawu le aʋa wɔm na mi,+ abe ale si tututu wòdo ŋugbe na mi ene.+ 11  Eya ta mikpɔ mia ɖokui dzi nyuie ɣesiaɣi*+ ne mialɔ̃ Yehowa mia Mawu+ la. 12  “Gake ne mietrɔ megbe heku ɖe dukɔ siawo me tɔ siwo kpɔtɔ+ le mia gbɔ la ŋu, eye miena srɔ̃ɖekadodo+ le mi kpli wo dome,* miede ha kpli wo eye woawo hã wode ha kpli mi la, 13  ekema minyae nyuie be Yehowa mia Mawu mayi edzi anya dukɔ siawo ɖa* na mi o.+ Woazu mɔ̃ kple kamɔ̃ aɖe mi, woazu abe ameƒoti ene anɔ axadame+ ƒom na mi, eye woanye ŋù anɔ ŋku dzi na mi va se ɖe esime mietsrɔ̃ vɔ keŋ le anyigba nyui sia si Yehowa mia Mawu tsɔ na mi la dzi. 14  “Kpɔ ɖa, nye kuɣi ɖo,* eye mienyae nyuie tso miaƒe dzi blibo kple luʋɔ* blibo me be, nya ɖeka pɛ hã medo kpo emevava le ŋugbe nyui siwo katã Yehowa mia Mawu do na mi la me o. Wo katã va eme na mi. Wo dometɔ ɖeka pɛ hã medo kpo emevava o.+ 15  Gake ale si ko ŋugbe nyui siwo katã Yehowa mia Mawu do na mi va eme na mi+ la, nenema kee Yehowa ahe vɔ̃ siwo katã ƒe ŋugbe wòdo* la ava mia dzi, eye wòatsrɔ̃ mi ɖa keŋkeŋ le anyigba nyui sia si Yehowa mia Mawu tsɔ na mi la dzi.+ 16  Ne mietu Yehowa mia Mawu ƒe nu, si wòbla kpli mi, eye mieyi ɖasubɔ mawu bubuwo hede ta agu na wo la, ekema Yehowa ƒe dziku afla ɖe mia ŋu,+ eye miatsrɔ̃ avɔ kaba ŋutɔ le anyigba nyui si wòtsɔ na mi la dzi.”+

Etenuŋɔŋlɔ

Alo, “medzidze nu hetsɔ.”
Efia, Domeƒu.
Alo, “hexɔ woƒe anyigba.”
Alo, “Eya ta mikpɔ miaƒe luʋɔwo dzi nyuie.”
Alo, “mieɖe mia nɔewo.”
Alo, “axɔ woƒe anyigba.”
Egɔmeɖeɖe tẽe, “egbea meɖo ta afi si anyigbadzitɔwo katã yina.”
Alo, “nya vɔ̃ siawo katã.”