Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Yosua 11:1-23

EMENYAWO ƑE TOTOƉEME

  • Wotsrɔ̃ du siwo le dziehekpa dzi (1-15)

  • Yosua ƒe aʋadziɖuɖuwo ŋu nyawo ta ƒoƒo (16-23)

11  Esi Hazor-fia Yabin nya see ko la, eɖo du ɖe Madon-fia Yobab,+ Simron-fia kple Aksaf-fia,+  fia siwo le tonutowo me le dziehe, esiwo le tagba* le Kineret ƒe anyiehe, Sefela* kple Dor togbɛwo+ dzi le ɣetoɖoƒe,  kpakple Kanaantɔ+ siwo le ɣedzeƒe kple ɣetoɖoƒe, Amoritɔwo,+ Hititɔwo, Perizitɔwo, Yebusitɔ siwo le tonutoa me, kple Hivitɔ+ siwo le Hermon To+ la ƒe bali me le Mizpa-nyigba dzi.  Eya ta woho va kple woƒe aʋakɔwo katã, wosɔ gbɔ abe ƒutake ene; wova kple sɔwo kple aʋatasiaɖam gbogbo aɖewo.  Fia siawo katã ɖo gbe ɖi, eye wova ƒu asaɖa anyi ɖe Merom-tɔʋu la nu be yewoakpe aʋa kple Israel.  Yehowa gblɔ na Yosua be: “Mègavɔ̃ wo o,+ elabena etsɔ ɣealewoɣi la, mawu wo katã na Israel. Nàtso agbeka na woƒe sɔwo,+ eye nàtɔ dzo woƒe tasiaɖamwo.”  Yosua kple aʋawɔlaawo katã va ƒo ɖe wo dzi le vo me le Merom-tɔʋu la nu.  Yehowa tsɔ wo de asi na Israel,+ eye woɖu wo dzi, eye wonya wo ɖe nu va se ɖe keke Sidon Gã+ kple Misrefot-Mayim+ kpakple gbadzaƒe si le Mizpe Bali si le ɣedzeƒe la me ke, wonɔ wo wum va se ɖe esime ame aɖeke metsi agbe o.+  Emegbe Yosua wɔ wo abe ale si tututu Yehowa gblɔ nɛ ene; etso agbeka na woƒe sɔwo, eye wòtɔ dzo woƒe tasiaɖamwo.+ 10  Gawu la, Yosua trɔ va xɔ Hazor, eye wòwu eƒe fia kple yi,+ elabena Hazor ye nye fiaɖuƒe siawo katã ƒe ta tsã. 11  Wowu emenɔlawo* katã kple yi hetsrɔ̃ wo gbidigbidi.+ Womegblẽ ame aɖeke ɖi o.+ Eye wòtɔ dzo Hazor. 12  Yosua xɔ fia siawo ƒe duwo katã, eye wòwu woƒe fiawo katã kple yi.+ Etsrɔ̃ wo gbidii,+ abe ale si tututu Yehowa ƒe subɔla Mose de se ene. 13  Ke Israel metɔ dzo du siwo le woƒe togbɛwo dzi la dometɔ aɖeke o, negbe Hazor koe Yosua tɔ dzoe. 14  Israel-viwo ha du siawo ƒe aboyonuwo katã kple lãwo na wo ɖokuiwo.+ Gake wowu ame sia ame kple yi va se ɖe esime wotsrɔ̃ wo dometɔ ɖe sia ɖe.+ Womena ame aɖeke tsi agbe o.+ 15  Ale si tututu Yehowa de se na eƒe subɔla Mose la, nenemae Mose de se na Yosua,+ eye nenema tututue Yosua wɔ. Ewɔ nu siwo katã ƒe se Yehowa de na Mose la pɛpɛpɛ, meɖe ɖeke le eme o.+ 16  Yosua xɔ anyigba siawo katã, tonuto la, Negeb+ blibo la, Gosen-nyigba blibo la, Sefela,+ Araba,+ Israel tonuto la kple eƒe Sefela,* 17  tso Halak To si ɖo ta Seir la gbɔ va se ɖe keke Baal-Gad+ si le Lebanon Bali me le Hermon Toa+ te ke, eye wòɖu woƒe fiawo katã dzi hewu wo. 18  Yosua wɔ aʋa kple fia siawo ɣeyiɣi didi aɖe. 19  Du aɖeke mewɔ ŋutifafa kple Israel-viwo o, negbe Hivitɔwo, ame siwo le Gibeon la ko.+ Ke wowɔ aʋa xɔ du bubuawo katã.+ 20  Elabena Yehowa ye ɖe mɔ woƒe dzi me sẽ,+ be woaho aʋa ɖe Israel ŋu, ale be wòatsrɔ̃ wo nublanuimakpɔmakpɔe.+ Ele be woatsrɔ̃ wo gbidigbidi, abe ale si tututu Yehowa de se na Mose ene.+ 21  Ɣemaɣi la, Yosua yi ɖatsrɔ̃ Anakitɔwo+ ɖa le tonuto la me, le Hebron, le Debir, le Anab, le Yuda tonuto bliboa me kple Israel tonuto bliboa katã me. Yosua tsrɔ̃ wo kple woƒe duwo gbidii.+ 22  Anakitɔ aɖeke mekpɔtɔ ɖe Israel-viwo ƒe anyigba dzi o. Negbe+ Gaza,+ Gat+ kple Asdod+ ko. 23  Ale Yosua xɔ anyigba blibo la katã, abe ale si Yehowa do ŋugbe na Mose+ ene, eye Yosua tsɔ anyigba la na Israel-viwo wotɔwotɔe wòzu woƒe domenyinu be woamae le woƒe toawo me.+ Eye anyigba la kpɔ gbɔdzɔe tso aʋawɔwɔ me.+

Etenuŋɔŋlɔ

Alo, “Araba.”
Alo, “bali me.”
Alo, “luʋɔwo.”
Alo, “balimewo.”