Yona 1:1-17

  • Yona di be yeasi le Yehowa nu (1-3)

  • Yehowa na ahom tu le atsiaƒu la dzi (4-6)

  • Yona gbɔe wòtso be atsiaƒua dze agbo (7-13)

  • Wotsɔ Yona ƒu gbe ɖe atsiaƒu dzeagbo la me (14-16)

  • Tɔmelã gã aɖe mi Yona (17)

1  Yehowa ƒe gbe va na Yona,*+ Amitai vi be:  “Tso nàyi Niniwe+ du gã la me, eye nàgblɔ nye ʋɔnudrɔ̃gbedeasi nɛ elabena eƒe nu vɔ̃ɖi wɔwɔ va ɖo ŋkunyeme.”  Ke Yona tso be yeasi le Yehowa nu ayi Tarsis; eye wòva Yopa hekpɔ tɔdziʋu aɖe si yina Tarsis. Ale wòxe fe heɖo ʋua be yeasi le Yehowa nu ayi Tarsis kpli wo.  Eye Yehowa lɔ ya sesẽ aɖe trɔ ɖe atsiaƒu la dzi, eye ahom gã aɖe tu le atsiaƒu la dzi ale be tɔdziʋua di be yeagbã.  Tɔdziʋumedɔwɔlawo vɔ̃, eye wo dometɔ ɖe sia ɖe de asi eƒe mawu yɔyɔ me be wòaxɔ na ye. Eye wonɔ tɔdziʋua me nuwo fɔm nɔ gbe ƒum ɖe atsiaƒua me be wòanɔ wodzoe.+ Gake Yona ya yi tɔdziʋua gɔme hemlɔ anyi dɔ alɔ̃ yi eme ʋĩi.  Eye ʋumefia la te ɖe eŋu gblɔ nɛ be: “Nu ka ƒe alɔ̃ dɔm wò ya nèle? Fɔ nàyɔ wò mawu! Ðewohĩ Mawu vavã la akpɔ nublanui na mí, be míagatsrɔ̃ o.”+  Eye wogblɔ na wo nɔewo be: “Miva, mina míadzidze nu,+ ne míanya ame si ta vɔ̃ sia le dzɔdzɔm ɖe mía dzi ɖo.” Ale wodzidze nu, eye nudzidze la dze Yona dzi.+  Eye wobiae be: “Míeɖe kuku, gblɔe na mí, ame ka tae vɔ̃ sia le dzɔdzɔm ɖe mía dzi ɖo? Dɔ ka wɔlae nènye, eye afi kae nètso? Dukɔ ka mee nètso, eye afi ka tɔe nènye?”  Eɖo eŋu na wo be: “Hebritɔ menye, eye mevɔ̃a* Yehowa, dziƒo ƒe Mawu, Ame si wɔ atsiaƒu kple anyigba ƒuƒui la.” 10  Ale vɔvɔ̃ gaɖo ŋutsuawo ɖe edzi, eye wobiae be: “Nu kae nèwɔ?” (Ŋutsuawo va nyae be Yehowa nue wòle sisim le, elabena egblɔe na wo.) 11  Eye wobiae be: “Nu kae míawɔ wò, be atsiaƒua nadze akɔ anyi na mí?” Elabena ƒu la ƒe nyanyra nu le sesẽm ɖe edzi. 12  Egblɔ na wo be: “Mikɔm ƒu gbe ɖe atsiaƒua me, ekema atsiaƒua adze akɔ anyi na mi; elabena menyae be tanyee ahom sesẽ sia va mia dzi ɖo.” 13  Ke ŋutsuawo ku ʋua kple ŋusẽ be yewoaɖi go; gake womete ŋui o, elabena ƒu la nɔ nyanyram ɖe edzi eye yaƒoƒo la nɔ wo kpem. 14  Eye wodo ɣli yɔ Yehowa gblɔ be: “Ao, Yehowa, Oo, míeɖe kuku, mègana míatsrɔ̃ le ŋutsu sia ta o!* Eye mègabu fɔ mí ɖe ʋu maɖifɔ ta o, elabena Yehowa, wò ŋutɔe wɔ nu si dze ŋuwò!” 15  Ale wokɔ Yona ƒu gbe ɖe atsiaƒua me; eye atsiaƒua dze akɔ anyi. 16  Eye ŋutsuawo vɔ̃ Yehowa ŋutɔ,+ eya ta wosa vɔ na Yehowa heɖe adzɔgbe nɛ. 17  Azɔ Yehowa dɔ tɔmelã gã aɖe wòmi Yona, ale Yona nɔ tɔmelã la ƒe dɔme ŋkeke etɔ̃ kple zã etɔ̃.+

Etenuŋɔŋlɔ

Egɔmee nye, “Ahɔnɛ.”
Alo, “mesubɔa.”
Alo, “le ŋutsu sia ƒe luʋɔ ta o!”