Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Yesaya 6:1-13

EMENYAWO ƑE TOTOƉEME

  • Wokpɔ Yehowa le eƒe gbedoxɔ me le ŋutega me (1-4)

    • “Kɔkɔe, kɔkɔe, kɔkɔe nye Yehowa” (3)

  • Wokɔ Yesaya ƒe nuyiwo ŋu (5-7)

  • Wodɔ Yesaya (8-10)

    • “Nyee nye esi! Dɔm!” (8)

  • “Oo Yehowa, va se ɖe ɣekaɣi?” (11-13)

6  Le ƒe si me Fia Uziya ku la,+ mekpɔ Yehowa wòbɔbɔ nɔ fiazikpui gã aɖe si le dzi boo la dzi,+ eye eƒe awu togawo yɔ gbedoxɔ la taŋ.  Serafiwo le etame; wo dometɔ ɖe sia ɖe to aʋala ade. Wotsɔ eve tsyɔ mo, wotsɔ eve tsyɔ afɔ, eye wotsɔ eve dzona.   Eye wodo ɣli ɖo ɖe wo nɔewo gblɔ be: “Kɔkɔe, kɔkɔe, kɔkɔe nye aʋakɔwo ƒe Yehowa.+ Eƒe ŋutikɔkɔe yɔ anyigba blibo la katã dzi.”  Eye woƒe gbe ƒe ɖiɖi* na kpuiawo ƒe agunuwo ʋuʋu, eye dzudzɔ yɔ xɔ la taŋ.+   Eye megblɔ be: “Aléle! Meku,* Elabena nuyi makɔmakɔtɔe menye,Eye dukɔ si ƒe nuyi mekɔ o domee mele;+Elabena nye ŋkuwo kpɔ Fia la, aʋakɔwo ƒe Yehowa ŋutɔ!”  Ke serafiawo dometɔ ɖeka dzo va gbɔnye, eye wòlé dzoka xɔxɔ,+ si wòtsɔ abè ɖe le vɔsamlekpuia me+ la, ɖe asi.  Eye wòtsɔe ka nu nam hegblɔ be: “Kpɔ ɖa! Esia ka wò nuyiwo ŋu,Woɖe wò fɔɖiɖi ɖa,Eye wolé avu ɖe wò nu vɔ̃ ta.”  Eye mese Yehowa ƒe gbe wògblɔ be: “Ame kae madɔ, eye ame kae ayi na mí?”+ Ale megblɔ be: “Nyee nye esi! Dɔm!”+   Eye wògblɔ nam be, “Heyi ɖagblɔ na dukɔ sia be: ‘Miase nu agasee ake,Ke miase egɔme o;Miakpɔ nu agakpɔe ake,Ke miadze si nu o.’+ 10  Na dukɔ sia ƒe dzi naku atri,+Tu woƒe towo,+Eye nàtre woƒe ŋkuwo,Ne woagakpɔ nu kple woƒe ŋkuwo,Ase nu kple woƒe towo,Eye woase nu gɔme kple woƒe dzi,Ne woatrɔ be woada gbe le wo ŋu o.” 11  Eye megblɔ be: “Oo Yehowa, va se ɖe ɣekaɣi?” Eye wòɖo eŋu be: “Va se ɖe esime duwo nagbã azu aƒedo, eye ame aɖeke maganɔ wo me o,Va se ɖe esime aƒewo katã naɖi gbɔlo,Eye anyigba la nazu gbegbe;+ 12  Va se ɖe esime Yehowa nanya amegbetɔwo ɖo ɖe didiƒe ʋĩi,+Eye anyigba la nazu gbegbe sɔŋ. 13  “Togbɔ be amewo me mama ɖe ewo ƒe akpa ɖeka asusɔ ɖe edzi hã la, woagatɔ dzoe, eye wòanɔ abe ati gã alo logoti si ne wolãe la, takpoea tsia anyi ene; dzidzime kɔkɔe aɖee anye takpoea.”

Etenuŋɔŋlɔ

Egɔmeɖeɖe tẽe, “ɣlidola la ƒe gbe.”
Egɔmeɖeɖe tẽe, “Evɔ nam azɔ.”