Dzo kpo yi emenuwo dzi

Dzo kpo yi emenuawo dzi

Yesaya 49:1-26

EMENYAWO ƑE TOTOƉEME

  • Yehowa subɔla ƒe dɔdeasi (1-12)

    • Dukɔwo ƒe kekeli (6)

  • Akɔfafa na Israel (13-26)

49  Mi ƒukpowo, miɖo tom,Eye mi dukɔ siwo le didiƒe ʋĩi, milé to ɖe ŋunye.+ Yehowa yɔm hafi wodzim.*+ Eyɔ nye ŋkɔ tso esime menɔ danye ƒe dɔ me ke.   Ewɔ nye nu abe yi ɖaɖɛ ene;Eɣlam ɖe eƒe asi ƒe vɔvɔli te.+ Etsɔm wɔ aŋutrɔ ɖaɖɛ;Eɣlam ɖe eƒe daku me.   Egblɔ nam be: “Oo Israel, nye subɔla nènye,+Wò ame si dzi mato aɖe nye atsyɔ̃ afia.”+   Ke megblɔ be: “Meku kutri dzodzro. Megblẽ nye ŋusẽ ɖe yame dzodzro. Ke hã vavãe, Yehowa si mee nye nyawo le,*Eye nye fetu le nye Mawu gbɔ.”+   Azɔ Yehowa, Ame si mèm tso dɔ me menye eƒe subɔla laGblɔ nam be makplɔ Yakob agbɔe na ye,Ne Israel naƒo ƒu ɖe ye gbɔ.+ Bubu anɔ ŋunye le Yehowa ŋkume,Eye nye Mawu azu nye ŋusẽ.   Eye wògblɔ be: “Menye nu tsɛ wònye be nànye nye subɔla,Afɔ Yakob ƒe toawo ɖe tsitrenu,Eye nàkplɔ Israel ƒe ame siwo ta wokpɔ la agbɔe o. Metsɔ wò na be nànye dukɔwo ƒe kekeli hã,+Ale be nye xɔname nade anyigba ƒe mlɔenu ke.”+  Ale Yehowa, Ame si gbugbɔ Israel ƒle, eƒe Kɔkɔetɔ+ la, gblɔ na ame si* wodo vloe,+ ame si dukɔ la nyɔŋui, ame si nye dziɖulawo ƒe subɔvie nye esi: “Fiawo akpɔe, eye woatso ɖe tsitrenu,Amegãwo abɔbɔLe Yehowa, Ame si nye nuteƒewɔla,+Israel Ƒe Kɔkɔetɔ si tia wò la ta.”+   Ale Yehowa gblɔe nye esi: “Metɔ na wò le amenuveɣi,+Eye mekpe ɖe ŋuwò le xɔxɔgbe;+Mekpɔ tawò, ne matsɔ wò ana nànye nubabla na dukɔ la,+Ne nàgaɖo anyigba la te,Ne nàna domenyinu siwo zu gbegbe la nagasu wo si,+   Ne nàgblɔ na gamenɔlawo be, ‘Mido go!’+ Eye na ame siwo le viviti me be,+ ‘Miva gota!’ Woaɖu gbe le mɔ to,Eye woƒe gbeɖuƒe anɔ toƒewo* katã. 10  Dɔ kple tsikɔ mawu wo o,+Eye dzoxɔxɔ alo ɣe maɖu wo o.+ Elabena ame si kpɔ nublanui na wo la akplɔ wo,+Eye wòakplɔ wo ato tsidzɔƒewo.+ 11  Mana nye towo katã nazu mɔ,Eye nye mɔ gãwo akɔ dzi.+ 12  Kpɔ ɖa, ame siawo atso didiƒe ava,+Eye ɖewo atso dziehe kple ɣetoɖoƒe ava,Eye bubuwo hã atso Sinim-nyigba dzi.”+ 13  Mi dziƒowo, migli kple dzidzɔ, anyigba, tso aseye.+ Towo netso aseye ahagli kple dzidzɔ.+ Elabena Yehowa fa akɔ na eƒe dukɔ la,+Eye wòkpɔ nublanui na eƒe ame siwo le fu kpem.+ 14  Ke Zion le gbɔgblɔm be: “Yehowa gblẽm ɖi,+ eye Yehowa ŋlɔm be.”+ 15  Ðe nyɔnu aŋlɔ eƒe vidzĩ be,Alo wòagbe nublanuikpɔkpɔ na eƒe dɔmevia? Ne nyɔnu siawo aŋlɔ be hã la, nye ya nyemaŋlɔ wò be gbeɖe o.+ 16  Kpɔ ɖa! Meŋlɔ wò ɖe nye asi me. Wò gliwo le ŋkunyeme ɖaa. 17  Viwòwo ɖe abla va. Ame siwo gbã wò hegblẽ dowòme la adzo le gbɔwò. 18  Fɔ mo dzi nàtsa ŋku godoo eye nàkpɔ nu. Wo katã wole ƒu ƒom ɖekae.+ Wogbɔna gbɔwò. Yehowa be: “Zi ale si mele agbe la,Àdo wo katã abe atsyɔ̃ɖonu ene,Eye àdo wo abe ale si ŋugbetɔ doa nui ene. 19  Togbɔ be nɔwòƒewo zu aƒedo kple gbegbe, eye wò anyigba gblẽ hã la,+Azɔ la, anɔ sue akpa na ame siwo le afi ma,+Eye miwòlawo+ anɔ adzɔge ʋĩi.+ 20  Vi siwo wodzi le viwòwo ƒe ku megbe la agblɔ nàse be:‘Teƒe sia xaxa nam akpa. Di teƒe nam manɔ.’+ 21  Eye àgblɔ le wò dzi me be:‘Esi wònye nyɔnu si ƒe viwo ku menye, eye metsi ko,Woɖe aboyom, eye mezu gamenɔla ɖe,Ke ame kae dzi vi siawo nam? Ame kae nyi ame siawo?+ Kpɔ ɖa! Nye ɖeka ko wogblẽ ɖi,+Ke afi kae ame siawo tso?’”+ 22  Ale Aƒetɔ Dziɖulagã Yehowa gblɔe nye esi: “Kpɔ ɖa! Mado nye asi ɖe dzi na dukɔwo,Eye mado nye dzesiti ɖe dzi na dukɔwo.+ Woakɔ viwòŋutsuwo ɖe abɔ dome* avɛ,Eye woakɔ viwònyɔnuwo ɖe abɔta avɛ.+ 23  Fiawo anye viwòwo dzi kpɔlawo,+Eye woƒe fianyɔnuwo ana no wo na wò. Woabɔbɔ atsyɔ mo anyi ɖe ŋkuwòme,+Eye woaɖuɖɔ ke le wò afɔ ŋu,+Ne nàdze sii be, nyee nye Yehowa,Eye be nyemana ŋu nakpe ame siwo le mɔ kpɔm nam la o.”+ 24  Ðe woate ŋu axɔ ame siwo wolé la le kalẽtɔ sia,Alo ɖe woate ŋu axɔ na ame siwo ŋutasẽla ɖe aboyoe laa? 25  Gake ale Yehowa gblɔe nye esi: “Woakplɔ ame siwo kalẽtɔ ɖe aboyoe la adzoe,+Eye woaxɔ na ame siwo ŋutasẽla lé la.+ Mawɔ avu kple ame si le avu wɔm kpli wò,+Eye maxɔ na viwòwo. 26  Mana ame siwo sẽa ŋuta le ŋuwò la naɖu woawo ŋutɔwo ƒe lã,Eye woano woawo ŋutɔwo ƒe ʋu amu abe wain yeye ene. Eye amewo* katã anyae be, nyee nye Yehowa,+Wò Xɔnametɔ,+ kple Ame si gbugbɔ wò ƒle,+Yakob Ƒe Ŋusẽtɔ la.”+

Etenuŋɔŋlɔ

Egɔmeɖeɖe tẽe, “tso vidzidɔ me ke.”
Alo, “Yehowa atso afia dzɔdzɔe nam.”
Alo, “ame si ƒe luʋɔ.”
Agate ŋu afia, “anɔ togbɛ ƒeƒlewo tame.”
Alo, “akɔnu.”
Egɔmeɖeɖe tẽe, “ŋutilãwo.”