Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Yesaya 40:1-31

EMENYAWO ƑE TOTOƉEME

  • Akɔfafa na Mawu ƒe amewo (1-11)

    • Gbe aɖe le ɖiɖim le gbedzi (3-5)

  • Mawu ƒe gãnyenye (12-31)

    • Dukɔwo le abe tsigege toŋtoŋ le tɔkpo ŋu ene (15)

    • Mawu le “anyigba nogoo” la tame (22)

    • Eyɔa ɣletiviwo katã ŋkɔ (26)

    • Ðeɖi metea Mawu ŋu o (28)

    • Mɔkpɔkpɔ na Yehowa naa ŋusẽ yeye (29-31)

40  Mia Mawu la be: “Mifa akɔ, mifa akɔ na nye dukɔ.+   Miƒo nu wòade dzi gbɔ* na Yerusalem,Eye migblɔ nɛ be eƒe dzizizidɔ la wu enu;Exe eƒe fɔɖiɖi ŋuti fe la vɔ.+ Elabena exɔ eƒe nu vɔ̃wo ŋuti fetu blibo* la tso Yehowa gbɔ.”+   Ame aɖe le ɣli dom le gbedzi be: “Midzra Yehowa ƒe mɔ dzi ɖo!+ Mita mɔ gã+ dzɔdzɔe ɖe gbegbe na mía Mawu+ la.   Woana baliwo katã nakɔ kpo,Eye woana to sia to kple togbɛ sia togbɛ nabɔbɔ ɖe anyi. Kpoteƒe azu zɔzrɔ̃eƒe,Eye teƒe glidzaglidza azu sɔsɔeƒe.+   Yehowa ƒe ŋutikɔkɔe adze,+Eye ŋutilãwo* katã akpɔe le ɣeyiɣi ɖeka me,+Elabena Yehowa ƒe nue gblɔe.”   Se ɖa! Ame aɖe le gbɔgblɔm be: “Do ɣli!” Eye ame bubu bia be: “Mado nu ka ƒe ɣli?” “Ŋutilãwo* katã le abe gbe mumu ene, Eye woƒe nuteƒewɔwɔ katã le abe seƒoƒo le gbe me ene.+   Gbe mumu ƒuna,Seƒoƒo yrɔna,+Elabena Yehowa ƒe gbɔgbɔ gbɔ ɖe wo dzi.+ Nyateƒee, gbe mumue dukɔ la nye.   Gbe mumu ƒuna,Seƒoƒo yrɔna,Ke mía Mawu ƒe nya ya nɔa anyi tegbee.”+   Lia to kɔkɔ,Wò, nyɔnu si tsɔ nya nyui gbɔna na Zion.+ Kɔ gbe dzi sesĩe,Wò, nyɔnu si tsɔ nya nyui gbɔna na Yerusalem, Kɔ gbe dzi, mègavɔ̃ o. Ðe gbeƒã na Yuda duwo be: “Mia Mawue nye esi.”+ 10  Kpɔ ɖa! Aƒetɔ Dziɖulagã Yehowa gbɔna kple ŋusẽ,Eye eƒe alɔ aɖu fia nɛ.+ Kpɔ ɖa! Egbɔna kple teƒeɖoɖo,Eye fetu si wòxena la le eŋgɔ.+ 11  Akplɔ eƒe lãhawo abe alẽkplɔla ene.+ Aƒo alẽviawo nu ƒu ɖe eƒe abɔwo dome,Eye wòakɔ wo ɖe akɔnu. Akplɔ esiwo le no nam la ɖɔɖɔɖɔ.+ 12  Ame kae dzidze tsiwo ɖe eƒe asiʋlo me+Eye wòtsɔ asi ɖeka* dzidze dziƒowo, Eye wòlɔ anyigbadzikewo ɖe nudonu me+Alo tsɔ nudanu da towoHeda togbɛwo le nudagbɛ me? 13  Ame kae dzidze Yehowa ƒe gbɔgbɔ,Eye ame kae anye eƒe aɖaŋuɖola ne wòafia nui?+ 14  Ame kae wòde adaŋu kplii, ne wòase nu gɔme,Alo ame kae fiaa nui le dzɔdzɔenyenye ƒe mɔ ŋu,Alo fiaa sidzedzee,Alo fiaa gɔmesese vavãtɔ ƒe mɔe?+ 15  Kpɔ ɖa! Dukɔwo le abe tsigege toŋtoŋ le tɔkpo ŋu ene,Eye wobu wo abe ʋuʋudedi si le nudanu ŋu ene.+ Kpɔ ɖa! Ekɔa ƒukpowo ɖe dzi abe ʋuʋudedi ko ene. 16  Lebanon ƒe atiwo gɔ̃ hã mesɔ gbɔ hena dzododo o,*Eye eƒe gbemelãwo mesɔ gbɔ woatsɔ asa numevɔe o. 17  Dukɔwo katã le abe ɖe womeli o ene le eŋkume,+Ebua wo abe nu maɖinu kple tofloko ene.+ 18  Ame kae miate ŋu atsɔ Mawu asɔ kplii?+ Eye nɔnɔme kae miate ŋu atsɔ asɔ kplii?+ 19  Aɖaŋudɔwɔla kɔ̀* legba,Nutula fa sika ɖe eŋu,+Eye wòwɔ klosalokɔsɔkɔsɔwo. 20  Etia ati,+Ati si manyunyɔ o. Edi aɖaŋudɔwɔla bibi aɖeBe wòatsɔe akpa nu kpakpɛ si maʋã o la nɛ.+ 21  Ðe mienyae oa? Ðe miesee oa? Ðe womegblɔe na mi tso gɔmedzedzea me ke oa? Ðe miese egɔme tso esime woɖo anyigba gɔme anyi oa?+ 22  Ame aɖe le anyigba nogoo la tame,+Eye edzinɔlawo le abe ʋetsuviwo ene. Ehea dziƒowo me abe avɔ falɛfalɛ ene,Eye wòkekea wo abe agbadɔ si me wòanɔ ene.+ 23  Eɖia gbɔ amegãwo,Eye wòna anyigba la dzi ʋɔnudrɔ̃lawo* ke hã zu tofloko. 24  Womekpɔ do wo haɖe o,Womekpɔ ƒã wo haɖe o,Woƒe ati mekpɔ to ke ɖe anyigba me haɖe o.Eye ne woɖo ƒuƒu wo ko la, woƒuna,Eye ya lɔa wo ɖe nu abe ahɔ̃liti ene.+ 25  Kɔkɔetɔ la be: “Ame kae miatsɔm asɔ kpli, ne nye kplii míasɔ?” 26  “Mifɔ mo dzi ne miakpɔ dziƒo. Ame kae wɔ nu siawo?+ Eyae nye ame si kplɔa woƒe aʋakɔ la doa goe le woƒe xexlẽme nu;Eyɔa wo dometɔ ɖe sia ɖe ŋkɔ.+ Wo dometɔ aɖeke mesusɔna oLe eƒe ŋusẽ geɖe kple eƒe alɔkame sesẽ la ta.+ 27  “Oo Yakob, nu ka tae nèle nu ƒom, Oo Israel, nu ka tae nèle gbɔgblɔm be:‘Nye mɔwo le ɣaɣla ɖe Yehowa,Eye Mawu metsoa afia dzɔdzɔe nam o?+ 28  Mènyae oa? Mèsee oa? Yehowa, Ame si wɔ anyigba ƒe mlɔenuwo la, Mawu mavɔtɔ wònye.+ Ðeɖi metea eŋu o, eye nu metia kɔ nɛ o.+ Eƒe nunya me dzodzro meli o.*+ 29  Edoa ŋusẽ ame si ŋu ɖeɖi teEye wònaa ŋusẽ geɖe ame beliwo.+ 30  Nu ati kɔ na sɔhɛwo, ɖeɖi ate wo ŋu,Eye ɖekakpuiwo akli nu adze anyi, 31  Gake ŋusẽ yeye aɖo ame siwo kpɔa mɔ na Yehowa ya ŋu. Woadzo ayi dzi abe hɔ̃ ene.+ Woaƒu du gake ɖeɖi mate wo ŋu o;Woazɔ azɔli gake nu mati kɔ na wo o.”+

Etenuŋɔŋlɔ

Alo, “Mifa akɔ.”
Alo, “teƒe eve.”
Alo, “amegbetɔwo.”
Alo, “Amewo.”
Didime si tso degblefetsu nu va se ɖe asibide suetɔ nu ne woke asi me.
Alo, “mate ŋu ana nake agbɔsɔsɔ si hiã la o.”
Egɔmeɖeɖe tẽe, “lólo ga kɔ̀.”
Alo, “anyigbadziɖulawo.”
Alo, “me goglo wu gbɔgblɔ.”