Dzo kpo yi emenuwo dzi

Dzo kpo yi emenuawo dzi

Yesaya 30:1-33

EMENYAWO ƑE TOTOƉEME

  • Egipte ƒe kpekpeɖeŋu mele ɖeke me o (1-7)

  • Amewo gbe nyagblɔɖigbedeasia (8-14)

  • Miakpɔ ŋusẽ ne mieɖo ŋu ɖe Yehowa ŋu (15-17)

  • Yehowa ve eƒe amewo nu (18-26)

    • Yehowa Nufiala Gãtɔ (20)

    • “Mɔ lae nye esi” (21)

  • Yehowa adrɔ̃ ʋɔnu Asiria (27-33)

30  Yehowa be: “Baba na vi sẽtowo,+Ame siwo wɔa ɖoɖo siwo menye tɔnye o dzi,+Ame siwo wɔa nubablawo* nye gbɔgbɔ manɔmee,Ne woadzi nu vɔ̃ ɖe nu vɔ̃ dzi.   Ame siwo mebia gbem*+ hafi dze mɔ yina Egipte,+Be yewoabe ɖe Farao ƒe ametakpɔkpɔ* te,Eye yewoabe ɖe Egipte ƒe vɔvɔli te o!   Gake Farao ƒe ametakpɔkpɔ la azu ŋukpe na mi,Eye bebe ɖe Egipte ƒe vɔvɔli te ahe vlododo vɛ na mi.+   Elabena eƒe amegãwo le Zoan,+Eye eƒe ame dɔdɔwo ɖo Hanes.   Ŋukpe alé wo katã,To dukɔ si mate ŋu aɖe vi aɖeke na wo o la dzi,Dukɔ si mana kpekpeɖeŋu aɖeke, alo ahe viɖe aɖeke vɛ oKe boŋ ŋukpe kple vlododo ko.”+  Nya ɖe anyiehelãwo ŋu: To hiãkame kple xaxa ƒe anyigba dzi,Afi si dzata, dzata si ɖea gbe la le,Dakpui kple da vɔ̃ɖi si lũa ʋɔ la le,Wotsɔa woƒe kesinɔnuwo ɖoa tedziwo dzi,Eye wotsɔa woƒe nuwo ɖoa kposɔwo ƒe kpo dzi. Gake nu siawo maɖe vi aɖeke na dukɔ la o.   Elabena Egipte ƒe kpekpeɖeŋu nye tofloko.+ Eya ta meyɔ wo be: “Rahab,+ ame si nɔa anyi ɖi naneke mawɔmawɔe.”   “Azɔ yi nàŋlɔe ɖe nuŋlɔkpe dzi le wo ŋkume,Eye nàŋlɔe ɖe agbalẽ me,+Ne wòanye ɖaseɖiɖi tegbee+Le ŋkeke si gbɔna me.   Elabena dukɔ dzeaglã,+ vi maɖianukwarewo,+Vi siwo gbe Yehowa ƒe se* la sese wonye.+ 10  Wogblɔ na nukpɔlawo be: ‘Migakpɔ nu o,’ Eye na ŋutegakpɔlawo be, ‘Migagblɔ ŋutega siwo le eteƒe la na mí o.+ Mivivi nu me* na mí; mikpɔ alakpaŋutegawo.+ 11  Mite ɖa le mɔ la dzi; midze le toƒe la ŋu. Migagblɔ Israel Ƒe Kɔkɔetɔ la ŋu nya le mía ŋkume azɔ o.’”+ 12  Eya ta ale Israel Ƒe Kɔkɔetɔ la gblɔe nye esi: “Esi miegbe nya sia,+Eye mieɖo ŋu ɖe ametafatafa kple amefuflu ŋuHeziɔ ɖe wo ŋu la,+ 13  Eya ta vodada sia anɔ na mi abe gli gbagbã ene,Abe gli kɔkɔ fefe si tre azã be yeamu la ene, Amu zi ɖeka kpoyi. 14  Woagbãe abe ale si wogbãa zemela ƒe ze ene,Woagbãe gudugudu ale gbegbe be ze kakɛ aɖeke manɔ eƒe gbagbã la meWoatsɔ aɖe dzo le mlekpui meAlo atsɔ akpa tsi le tsiteƒe* o.” 15  Elabena ale Aƒetɔ Dziɖulagã Yehowa, Israel Ƒe Kɔkɔetɔ la, gblɔe nye esi: “Ne mietrɔ va gbɔnye henɔ anyi kpoo la, woaxɔ na mi;Eye miakpɔ ŋusẽ ne mieɖe dzi ɖi heɖo ŋu ɖe ŋunye.”+ Ke mielɔ̃ o.+ 16  Ke miegblɔ be: “Kpao, míanɔ sɔwo dzi asi!” Eya ta miasi vavã. “Míado sɔ ɖeablɛwo!”+ Esia tae ame siwo ati mia yome la aƒu du sesĩe wu mi.+ 17  Ame akpe ɖeka adzo nyanyanya le ame ɖeka pɛ ƒe vɔvɔ̃doname ta;+Eye miasi le ame atɔ̃ ƒe vɔvɔ̃doname nu,Va se ɖe esime miasusɔ abe ati si wotu ɖe to tame,Kple dzesiti le togbɛ dzi ene.+ 18  Gake Yehowa anɔ lalam dzigbɔɖitɔe* be yeave mia nu,+Eye wòatso be yeakpɔ nublanui na mi.+ Elabena Yehowa nye Mawu si drɔ̃a ʋɔnu dzɔdzɔe.+ Dzidzɔtɔwoe nye ame siwo katã kpɔa esinu.*+ 19  Ne amewo va le Zion, Yerusalem+ la, miagafa avi azɔ o.+ Ave mia nu godoo ne ese miaƒe ɣlidodo la; ne esee ko la, atɔ na mi.+ 20  Togbɔ be Yehowa ana miaɖu xaxa abe abolo ene eye miano teteɖeanyi abe tsi ene hã la,+ miaƒe Nufiala Gãtɔ la magaɣla eɖokui azɔ o, eye miaƒe ŋkuwo akpɔ miaƒe Nufiala Gãtɔ+ la. 21  Eye ne mietra mɔ yi ɖusime alo miame la,+ miaƒe to ase nya sia le mia megbe be, “Mɔ lae nye esi.+ Mito edzi.” 22  Miagblẽ kɔ ɖo na klosalo si wofa ɖe miaƒe legbawo ŋu, kple sika si wofa ɖe miaƒe galegbawo* ŋu.+ Miatsɔ wo aƒu gbe abe gbelégodoe ene ahagblɔ ɖe wo ŋu be, “Mite ɖa!”*+ 23  Ana tsi nadza ɖe nuku si nèƒã ɖe anyigba dzi la dzi,+ eye wòana nuɖuɖu si anyigbaa awɔ la nasɔ gbɔ, eye wòanyo.*+ Gbe ma gbe la, wò lãhawo aɖu gbe le gbeɖuƒe siwo keke.+ 24  Eye nyi kple tedzi siwo ŋlɔa agble la aɖu gbe si wotsɔ amagbe tsaka hetsɔ sofi kple gaflo dzoboe. 25  Le amewugbe gã si xɔ tsralawo amu la, tɔsisiwo kple tɔʋuwo anɔ to kɔkɔwo katã kple togbɛ kɔkɔwo katã dzi.+ 26  Gbe si gbe Yehowa abla eƒe dukɔ ƒe gbagbãƒe,+ eye wòawu abi si wòde wo ŋu la,+ ɣleti si sɔ tegblẽe la ƒe keklẽ anɔ abe ɣe ƒe keklẽ ene; eye ɣe ƒe keklẽ adzi ɖe edzi zi gbɔ zi adre,+ eye wòanɔ abe ŋkeke adre ƒe keklẽ ene. 27  Kpɔ ɖa! Yehowa ƒe ŋkɔ tso didiƒe gbɔna,Eye eƒe dɔmedzoe le bibim kple dzudzɔ babla kɔtɔɔ. Dɔmedzoe yɔ nu me nɛ fũu,Eye eƒe aɖe le abe dzo flafla ene.+ 28  Eƒe gbɔgbɔ le abe tɔʋu si ɖɔ va se ɖe ve ke ene,Ne wòaʋuʋu dukɔwo le tsɔtsrɔ̃ ƒe sranui me;*Eye wòade numega dukɔwo ƒe nu me,+ ne wòakplɔ wo atrae. 29  Gake miadzi ha abe esi wodzina le zã si meMiele dzadzram ɖo* na ŋkekenyuiɖuɖu ene,+Eye miaƒe dzi akpɔ dzidzɔAbe ame si le dze kum yina*Yehowa ƒe to la, Israel ƒe Agakpe la gbɔ ene.+ 30  Yehowa ana woase eƒe gãnyenye ƒe gbe,+Eye wòana eƒe alɔ+ naɖiɖi ɖe anyi woakpɔ le dziku helĩhelĩ,+Dzobibi flaflafla,+Tsidzadza gãwo,+ ahom kple tsikpewo me.+ 31  Elabena Yehowa ƒe gbe ana ŋɔdzi nalé Asiria;+Atsɔ ati aƒoe.+ 32  Zi ale si Yehowa tsɔ eƒe ameƒoti,Le to hem na Asiria la,Zi nenemae axatsɛwo kple saŋkuwo aɖi,+Eye wòanɔ alɔ nyèm atsɔ awɔ avu kpli wo.+ 33  Elabena wodzra eƒe Tofet*+ la ɖo xoxo;Wodzrae ɖo na fia la.+ Afi si wòli kɔ eƒe nakewo ɖo la goglo hekeke,Dzo kple nake li kpaŋkpaŋ. Yehowa ƒe gbɔgbɔ, si le abe dzokpeta ene la,Atɔ dzoe.

Etenuŋɔŋlɔ

Egɔmeɖeɖe tẽe, “ƒoa tsi ɖi,” edze ƒãa be efia lɔlɔ̃ ɖe nu ɖeka dzi.
Alo, “mebia nye numegbe.”
Egɔmeɖeɖe tẽe, “mɔ́ sesẽ.”
Alo, “mɔfiame.”
Egɔmeɖeɖe tẽe, “Migblɔ nya ŋɔnɔewo.”
Agate ŋu afia, “tsido me.”
Alo, “le mɔ kpɔm.”
Alo, “kpɔa mɔ nɛ vevie.”
Alo, “legba siwo wolólo ga kɔ̀.”
Agate ŋu afia, “ahayɔ wo be, ɖinu.”
Egɔmeɖeɖe tẽe, “ada ami.”
Egɔmeɖeɖe tẽe, “le sranui si mele ɖeke me o me.”
Alo, “Miele mia ɖokui ŋu kɔm.”
Alo, “le zɔzɔm ɖe dzekuku nu yina.”
Wozã “Tofet” le kpɔɖeŋunyagbɔgblɔ nu le afi sia be enye teƒe si dzo le bibim le, wòtsi tre ɖi na tsɔtsrɔ̃.