Dzo kpo yi emenuwo dzi

Dzo kpo yi emenuawo dzi

Yesaya 23:1-18

EMENYAWO ƑE TOTOƉEME

  • Nya ɖe Tiro ŋu (1-18)

23  Nya ɖe Tiro ŋu:+ Mi Tarsis+ tɔdziʋuwo, miƒu asi nu! Elabena wotsrɔ̃ tɔdziʋudzeƒe la, afi ma yiyi megali o. Wosee le Kitim-nyigba+ dzi ke.   Mi ƒutatɔwo, mizi ɖoɖoe. Sidon-sitsala+ siwo toa atsiaƒu dzi la yɔ mewò taŋ.   Wotsɔ Sihor*+ ƒe agblemenukuwoKple Nil ƒe nuŋeŋewo, siwo nye adzɔnuwo, to tsi geɖewo dzi,Wohe dukɔwo ƒe viɖewo vɛ.+   Oo Sidon, ŋu nekpe wò, wò atsiaƒu ƒe mɔ́ sesẽ,Elabena atsiaƒu la gblɔ be: “Nyemelé ku o, nyemedzi vi o,Nyemenyi ɖekakpuiwo alo ɖetugbuiwo* wotsi o.”+   Amewo ase veve vevie le nya si woase tso Tiro+ ŋu,Abe ale si wònɔ esi wose nu si dzɔ ɖe Egipte+ dzi ene.   Mitso ƒu yi Tarsis! Mi ƒutatɔwo, mifa konyi vevie!   Miaƒe du si tsoa aseye tso gbe aɖe gbe ke, tso blema ke, lae nye esia? Eƒe afɔwo kplɔnɛ dea keke didiƒe ʋĩi ke tsã wòɖanɔa afi ma.   Ame kae ɖo nu sia ɖe Tiro ŋu,Eya, si ɖɔa fiakuku na ame,Si ƒe asitsalawo nye amegãwo,Si ƒe nudzralawo nye bubumewo le anyigba dzi katã?+   Aʋakɔwo ƒe Yehowa ŋutɔe ɖoeBe yeaɖi gbɔ eƒe dada kple atsyɔ̃ɖoɖowo katãNe yeado vlo ame siwo katã ŋu wodea bubui le anyigba bliboa dzi.+ 10  Oo, Tarsis vinyɔnu, gbagba ɖe wò anyigba dzi abe Nil-tɔsisi ene. Tɔdziʋudzeƒe aɖeke megali o.+ 11  Edo eƒe asi ɖe atsiaƒu dzi;Eʋuʋu fiaɖuƒewo. Yehowa ɖe gbe be woatsrɔ̃ Foinike ƒe mɔ́ sesẽwo keŋkeŋ.+ 12  Eye wògblɔ be: “Mègatso aseye azɔ o,+Wò Sidon ɖetugbui leaƒe si wote ɖe anyi, Tso, nàtso ƒu ayi Kitim.+ Màkpɔ gbɔdzɔe le afi ma hã o.” 13  Kpɔ Kaldeatɔwo+ ƒe anyigba la ɖa! Esiae nye dukɔ la—ke menye Asiria+ ye o—Woawoe wɔe wòzu gbemelãwo nɔƒe. Wotu dudzidzelawo ƒe xɔ tsralawo,Eye wogbã woƒe mɔ́ sesẽwo+ ƒu anyi,Ale wòzu glikpo. 14  Mi Tarsis tɔdziʋuwo, mifa avi sesĩe,Elabena wogbã miaƒe mɔ́ sesẽ la.+ 15  Ɣemaɣi la, woaŋlɔ Tiro be ƒe blaadre sɔŋ,+ si nye fia ƒe agbenɔƒe.* Le ƒe blaadre la ƒe nuwuwu la, ava eme na Tiro, abe gbolo si ŋu wole ha dzim ɖo ene be: 16  “Oo, gbolo si woŋlɔ be, tsɔ kasaŋku ɖe asi nàtsa le dua me godoo. Ƒo kasaŋku la aɖaŋutɔe;Dzi ha geɖe,Ale be woaɖo ŋku dziwò.” 17  Le ƒe blaadre la ƒe nuwuwu la, Yehowa atrɔ ɖe Tiro ŋu, eye Tiro agadze eƒe gbolohoxɔxɔ gɔme, eye wòawɔ gbolo kple xexea me fiaɖuƒe siwo katã le anyigba dzi. 18  Ke eƒe viɖe kple eƒe gboloho la azu nu kɔkɔe na Yehowa. Womadzrae ɖo o, eye womali kɔe ɖi o, elabena eƒe gboloho la azu ame siwo le Yehowa ŋkume la tɔ, ne woaɖu nu aɖi ƒo, eye woado awu nyuiwo.+

Etenuŋɔŋlɔ

Efia, Nil ƒe alɔdze.
Egɔmeɖeɖe tẽe, “ɖetugbui leaƒewo.”
Egɔmeɖeɖe tẽe, “ŋkekewo.”