Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Yeremiya 32:1-44

EMENYAWO ƑE TOTOƉEME

  • Yeremiya ƒle agble (1-15)

  • Yeremiya ƒe gbedodoɖa (16-25)

  • Yehowa ƒe ŋuɖoɖo (26-44)

32  Esiae nye Yehowa ƒe gbe si va na Yeremiya le Yuda-fia Zedekiya ƒe ƒe ewolia, si nye Nebukadnezar*+ ƒe ƒe wuienyilia me.  Ɣemaɣi la, Babilon-fia ƒe aʋakɔwo ɖe to ɖe Yerusalem; eye wode nyagblɔɖila Yeremiya gaxɔ me ɖe Dzɔlawo ƒe Xɔxɔnu,+ si le Yuda-fia ƒe me.*  Elabena Yuda-fia Zedekiya dee gaxɔ me+ gblɔ be: “Nu ka tae nèle nya gblɔm ɖi alea be, ‘Ale Yehowa gblɔe nye esi, “Matsɔ du sia ade asi na Babilon-fia, eye wòaxɔe,+  Yuda-fia Zedekiya ŋutɔ hã mado le Kaldeatɔwo si me o, elabena woatsɔe ade asi na Babilon-fia godoo, aƒo nu kplii, eye woakpɔ wo nɔewo ŋkume kple ŋkume”;+  Yehowa be: “Akplɔ Zedekiya ayi Babilon, eye wòanɔ afi ma va se ɖe esime matrɔ susu ɖe eŋu; togbɔ be miele aʋa wɔm kple Kaldeatɔwo hã la, miaɖu dzi o.’”+  Yeremiya gblɔ be: “Yehowa ƒe gbe va nam be,  ‘Kpɔ ɖa, fofowò nɔvi Salum viŋutsu Hanamel gbɔna gbɔwò agblɔ na wò be: “Ƒle nye agble si le Anatot,+ elabena wòe nye ame gbãtɔ si kpɔ mɔ agbugbɔe aƒle.”’”+  Ale fofonye nɔvi viŋutsu Hanamel va gbɔnye le Dzɔlawo ƒe Xɔxɔnu la, abe ale si Yehowa gblɔe ene, eye wògblɔ nam be: “Meɖe kuku, ƒle nye agble si le Anatot le Benyamin-nyigba dzi, elabena wòe dze be nànyi edome, eye wòe dze agbugbɔe aƒle. Ƒlee na ɖokuiwò.” Ale mede dzesii be Yehowa ƒe nyae wònye.  Ale meƒle agble si le Anatot la le fofonye nɔvi viŋutsu Hanamel si. Eye meda ga la+ tsɔ nɛ: sekel* adre kple klosalo ewo. 10  Eye meŋlɔe ɖe agbalẽ me,+ tre enu, eye meɖe ɖasefowo+ heda ga la le nudanu me. 11  Metsɔ anyigbaƒlegbalẽ si nu wotre kple esi nu wometre o, abe ale si se la kple ɖoɖoawo bia ene, 12  eye metsɔ anyigbaƒlegbalẽ la na Baruk,+ Neriya vi,+ Mahseya vi, le fofonye nɔvi viŋutsu Hanamel kple ɖasefo siwo de asi anyigbaƒlegbalẽa te kple Yudatɔ siwo katã bɔbɔ nɔ Dzɔlawo Ƒe Xɔxɔnu+ la ŋkume. 13  Eye mede se na Baruk le wo ŋkume be: 14  “Ale aʋakɔwo ƒe Yehowa, Israel ƒe Mawu la, gblɔe nye esi: ‘Tsɔ agbalẽ siawo, anyigbaƒlegbalẽ sia si nu wotre kple agbalẽ kemɛa si nu wometre o la, eye nàtsɔ wo ade ze me, ne woanɔ anyi eteƒe nadidi.’ 15  Elabena ale aʋakɔwo ƒe Yehowa, Israel ƒe Mawu la, gblɔe nye esi: ‘Woagaƒle aƒewo, agblewo kple waingblewo le anyigba sia dzi.’”+ 16  Esi metsɔ anyigbaƒlegbalẽ la na Neriya vi Baruk megbe la, medo gbe ɖa na Yehowa be: 17  “Ao Aƒetɔ Dziɖulagã Yehowa! Wòe tsɔ wò ŋusẽ gã kple wò alɔ si nèdo ɖa la wɔ dziƒowo kple anyigba.+ Naneke mekpe na wò akpa o, 18  Wò, Ame si vea ame akpewo nu, eye nèɖoa fofowo ƒe vodada teƒe na wo megbeviwo,*+ Mawu vavã la, Mawu gã, Ŋusẽtɔ, si ŋkɔe nye aʋakɔwo ƒe Yehowa. 19  Ame si ƒe adaŋudede* kpe, eye eƒe nuwɔnawo sɔ gbɔ,+ wò, ame si ƒe ŋkuwo kpɔa amegbetɔwo ƒe mɔwo katã,+ ne nàwɔ na ame sia ame ɖe eƒe zɔzɔme kple eƒe nuwɔnawo nu.+ 20  Wò, ame si wɔ dzesiwo kple nukunuwo le Egipte-nyigba dzi eye wogale nyanya va se ɖe egbe sia eye nèwɔ ŋkɔ na ɖokuiwò le Israel kple amegbetɔwo dome,+ abe ale si wòle egbe sia ene. 21  Eye nètsɔ dzesiwo, nukunuwo, asi sesẽ, alɔ si nèdo ɖa kple ŋɔdzi gã kplɔ wò dukɔ Israel tso Egipte-nyigba dzi.+ 22  “Emegbe nètsɔ anyigba sia si ŋu nèka atam be yeatsɔ ana wo tɔgbuiwo,+ anyigba si dzi notsi kple anyitsi le sisim le la na wo.+ 23  Eye wova xɔe wòzu wo tɔ, gake wogbe toɖoɖo wò gbe, eye womezɔ le wò se la nu o. Womewɔ nu siwo ƒe se nède na wo la dometɔ aɖeke o; eya ta nèna vɔ̃ siawo katã dzɔ ɖe wo dzi.+ 24  Kpɔ ɖa, amewo va ƒu kpo ɖe dua ŋu be yewoaxɔe,+ eye woatsɔ du sia ade asi na Kaldeatɔ siwo le aʋa wɔm kplii la, le yi,+ dɔwuame kple dɔvɔ̃*+ ta; nya siwo katã nègblɔ la va eme, abe ale si nèle ekpɔm ene. 25  Gake Oo Aƒetɔ Dziɖulagã Yehowa, ègblɔ nam be, ‘Tsɔ ga nàƒle agble, eye nàɖe ɖasefowo,’ evɔ wole dua tsɔ ge ade asi na Kaldeatɔwo.” 26  Eye Yehowa ƒe gbe va na Yeremiya be: 27  “Kpɔ ɖa, nyee nye Yehowa, amegbetɔwo* katã ƒe Mawu. Ðe nane sesẽ nam akpa? 28  Eya ta ale Yehowa gblɔe nye esi, ‘Kpɔ ɖa, matsɔ du sia ade asi na Kaldeatɔwo kple Babilon-fia Nebukadnezar,* eye wòaxɔe.+ 29  Kaldeatɔ siwo le aʋa wɔm kple du sia la ava tɔ dzo du sia wòafiã,+ hekpe ɖe xɔ siwo tame wodoa dzudzɔ ɖo na Baal, eye woƒoa aha ɖi na mawu bubuwo, be woatsɔ ado dziku nam la ŋu.’+ 30  “‘Elabena Israel-viwo kple Yudatɔwo le nu vɔ̃ɖi wɔwɔ dzi le ŋkunyeme tso woƒe ɖevime ke;+ Israel-viwo tsɔ woƒe asinudɔwɔwɔ le dziku dom nam,’ Yehowa ye gblɔe. 31  ‘Maɖee ɖa le nye ŋkuta+ elabena dziku kple dɔmedzoe dodo dzi koe du sia le nam tso gbe si gbe wotsoe va se ɖe egbe sia,+ 32  le Israel-viwo kple Yudatɔwo, woawo ŋutɔwo, woƒe fiawo,+ woƒe amegãwo,+ woƒe nunɔlawo kple woƒe nyagblɔɖilawo,+ Yudatɔwo kple Yerusalem nɔlawo, ƒe nu vɔ̃ɖi siwo katã wowɔ be woatsɔ ado dziku nam la ta. 33  Wotrɔa megbe deam, eye menye ŋkume o;+ togbɔ be mefiaa nu wo enuenu* hã la, wo dometɔ aɖeke meɖoa to ne wòaxɔ amehehe o.+ 34  Wotsɔ woƒe ŋunyɔnuwo ɖo aƒe si ŋu woyɔa nye ŋkɔ ɖo la me, ne woagblẽ kɔ ɖo nɛ.+ 35  Wotu nuxeƒewo hã na Baal ɖe Hinom Vi Ƒe Bali*+ la me, ne woatɔ dzo wo viŋutsuwo kple wo vinyɔnuwo na Molek,+ nu si nyemeɖo na wo o+ eye meva dzi me* nam hã kpɔ be woawɔ ŋunyɔnu sia atsɔ able Yuda ade nu vɔ̃ me o.’ 36  “Eya ta ale Yehowa, Israel ƒe Mawu la, gblɔ ɖe du sia si ŋu miawo miele gbɔgblɔm le be woatsɔe ade asi na Babilon-fia to yi, dɔwuame kple dɔvɔ̃ dzi la ŋue nye esi, 37  ‘Kpɔ ɖa, maƒo wo nu ƒu tso anyigba siwo katã dzi meka wo hlẽ ɖo le nye dziku, nye dɔmedzoe kple nye nyanyra me la dzi;+ makplɔ wo agbɔe ava teƒe sia, eye mana woanɔ anyi dedie.+ 38  Woanye nye dukɔ, eye manye woƒe Mawu.+ 39  Mana dzi ɖeka+ kple mɔ ɖeka wo, ne woavɔ̃m ɣeawokatãɣi, ne eme nanyo na woawo ŋutɔwo kple wo megbeviwo.+ 40  Mabla nu mavɔ kpli wo,+ ale be nyemadzudzɔ nyuiwɔwɔ na wo o;+ madee woƒe dzi me be woavɔ̃m, ne woagate ɖa le ŋunye o.+ 41  Makpɔ dzidzɔ le nyuiwɔwɔ na wo ŋu,+ eye mali ke wo ɖe anyigba sia dzi,+ tso nye dzi blibo kple nye luʋɔ* blibo me.’” 42  “Elabena ale Yehowa gblɔe nye esi, ‘Ale si ko mehe vɔ̃ gã siawo katã va dukɔ sia dzii la, nenemae mawɔ nyui siwo katã ƒe ŋugbe dom mele la hã na wo.+ 43  Woaƒle agblewo le anyigba sia dzi,+ anyigba si ŋu miele gbɔgblɔm le be: “Ezu gbegbe, eye amegbetɔ kple lãwo megale edzi o. Wotsɔe de asi na Kaldeatɔwo.”’ 44  “‘Woatsɔ ga aƒle agblewo, eye woawɔ agbalẽ ɖe wo dzi, woatre wo nu, eye woaɖe ɖasefowo le Benyamin-nyigba dzi,+ le Yerusalem nutowo me,+ le Yuda duwo me, le tonuto la ƒe duwo me, le balimeduwo me+ kple anyieheduwo me, elabena makplɔ woƒe aboyomewo agbɔe,’+ Yehowa ye gblɔe.”

Etenuŋɔŋlɔ

Egɔmeɖeɖe tẽe, “Nebukadrezar,” esia nye ŋkɔ Nebukadnezar ŋɔŋlɔ bubui.
Alo, “fiasã me.”
Sekel ɖeka le gram 11.4. Kpɔ Megbenyawo B14.
Egɔmeɖeɖe tẽe, “megbeviwo ɖe woƒe akɔnu.”
Alo, “tameɖoɖo.”
Alo, “dɔléle.”
Egɔmeɖeɖe tẽe, “ŋutilãwo.”
Egɔmeɖeɖe tẽe, “Nebukadrezar,” esia nye ŋkɔ Nebukadnezar ŋɔŋlɔ bubui.
Egɔmeɖeɖe tẽe, “mefɔna ŋdi kanya hefiaa nu wo.”
Kpɔ Nya Tɔxɛwo Gɔmeɖeƒea, “Gehena.”
Alo, “susu me.”