Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Yeremiya 28:1-17

EMENYAWO ƑE TOTOƉEME

  • Yeremiya kple aʋatsonyagblɔɖila Hananiya (1-17)

28  Le ƒe ma me, le Yuda-fia Zedekiya+ ƒe fiaɖuɖu ƒe gɔmedzedze, le ƒe enelia ƒe ɣleti atɔ̃lia me la, nyagblɔɖila Hananiya, Azur vi si tso Gibeon,+ gblɔ nam le Yehowa ƒe aƒe la me le nunɔlawo kple dukɔ blibo la ŋkume be:  “Ale aʋakɔwo ƒe Yehowa, Israel ƒe Mawu la, gblɔe nye esi, ‘Maŋe Babilon-fia ƒe kɔkuti la.+  Le ƒe eve* me la, magbugbɔ Yehowa ƒe aƒe la me nu siwo katã Babilon-fia Nebukadnezar lɔ tso teƒe sia yi Babilon la agbɔ va teƒe sia.’”+  “‘Makplɔ Yuda-fia Yekoniya,+ Yehoyakim+ vi kple Yuda ƒe aboyome siwo katã yi Babilon+ la agbɔ va teƒe sia, elabena maŋe Babilon-fia ƒe kɔkuti la,’ Yehowa ye gblɔe.”  Eye nyagblɔɖila Yeremiya ɖo eŋu na nyagblɔɖila Hananiya le nunɔlawo kple dukɔ blibo la, ame siwo tsi tsitre ɖe Yehowa ƒe aƒea me la ŋkume.  Nyagblɔɖila Yeremiya gblɔ be: “Amen!* Yehowa newɔe alea! Yehowa nena nya siwo nègblɔ ɖi la nava eme, ne wòahe Yehowa ƒe aƒe la me nuwo kple aboyomeawo katã tso Babilon agbɔ va teƒe sia!  Gake meɖe kuku, se nya sia si gblɔ ge mala ɖe wò to me kple dukɔ blibo la ƒe to me.  Tso gbe aɖe gbe ke la, nyagblɔɖila siwo do ŋgɔ na nye kpli wò la gblɔ aʋawɔwɔ, gbegblẽ kple dɔvɔ̃* ŋu nya ɖi ɖe dukɔ geɖewo kple fiaɖuƒe gãwo ŋu.  Ne nyagblɔɖila aɖe gblɔ ŋutifafanya ɖi, eye nyagblɔɖila la ƒe nya la va eme la, ekema woadze sii be Yehowae dɔ nyagblɔɖila la vavã.” 10  Eye nyagblɔɖila Hananiya ɖe kɔkuti la le kɔ na nyagblɔɖila Yeremiya heŋee.+ 11  Eye Hananiya gblɔ le dukɔ blibo la ŋkume be: “Ale Yehowa gblɔe nye esi, ‘Alea tututue maŋe Babilon-fia Nebukadnezar ƒe kɔkuti le kɔ na dukɔwo katã le ƒe eve me.’”+ Eye nyagblɔɖila Yeremiya lé eƒe mɔ dzo. 12  Esime nyagblɔɖila Hananiya ŋe kɔkuti la le kɔ na nyagblɔɖila Yeremiya megbe la, Yehowa ƒe nya sia va na Yeremiya be: 13  “Heyi ɖagblɔ na Hananiya be, ‘Ale Yehowa gblɔe nye esi: “Atikɔkutie nèŋe,+ ke gakɔkutie nàwɔ ɖe eteƒe.” 14  Elabena ale aʋakɔwo ƒe Yehowa, Israel ƒe Mawu la, gblɔe nye esi: “Made gakɔkuti kɔ na dukɔ siawo katã, ne woasubɔ Babilon-fia Nebukadnezar; woasubɔe godoo.+ Matsɔ gbemelãwo gɔ̃ hã ade asi nɛ.”’”+ 15  Eye nyagblɔɖila Yeremiya gblɔ na nyagblɔɖila Hananiya+ be: “Oo Hananiya, meɖe kuku, see! Menye Yehowa ye dɔ wò o, gake nèna dukɔ sia le dzi ɖom ɖe alakpanyawo ŋu.+ 16  Eya ta ale Yehowa gblɔe nye esi, ‘Kpɔ ɖa! Maɖe wò ɖa le anyigba la dzi. Àku le ƒe sia me, elabena ède aglãdzedze ɖe Yehowa ŋu ƒe dzi ƒo.’”+ 17  Ale nyagblɔɖila Hananiya ku le ƒe ma me le ɣleti adrelia me.

Etenuŋɔŋlɔ

Egɔmeɖeɖe tẽe, “Le ŋkekewo ƒe ƒe eve.”
Alo, “Neva eme!”
Alo, “dɔléle.”