Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Yeremiya 26:1-24

EMENYAWO ƑE TOTOƉEME

  • Wotsɔ ku do ŋɔdzi na Yeremiya (1-15)

  • Woɖe asi le Yeremiya ŋu (16-19)

    • Woyɔ nya tso Mika ƒe nyagblɔɖia me (18)

  • Nyagblɔɖila Uriya (20-24)

26  Le Yuda-fia Yehoyakim,+ Yosiya vi, ƒe fiaɖuɖu ƒe gɔmedzedzea me la, gbe sia tso Yehowa gbɔ va be:  “Ale Yehowa gblɔe nye esi, ‘Yi ɖatɔ ɖe Yehowa ƒe aƒe ƒe xɔxɔnu, eye nàgblɔ nya siawo ɖe Yuda duwo me nɔla siwo katã vana be yewoade ta agu le Yehowa ƒe aƒe me la ŋu. Gblɔ nya siwo katã ƒe se mede na wò la; mègaɖe nya aɖeke le eme o.  Ðewohĩ woasee, eye ame sia ame atrɔ tso eƒe mɔ vɔ̃ dzi, ekema matrɔ susu,* eye nyemagahe vɔ̃ si meɖo ɖe wo ŋu le woƒe nuwɔna vɔ̃ɖiwo ta la ava wo dzi o.+  Gblɔ na wo be: “Ale Yehowa gblɔe nye esi, ‘Ne mieɖo tom hezɔ ɖe nye se* si mede na mi la nu o,  eye mieɖo to nye subɔla nyagblɔɖila siwo medɔna ɖe mi enuenu* ƒe nyawo o, ke miegbe toɖoɖo wo la,+  ekema mawɔ aƒe sia abe Silo+ ene, eye mana du sia nazu ɖiŋudonu na anyigbadzidukɔwo katã.’”’”+  Eye nunɔlawo kple nyagblɔɖilawo kpakple dukɔ blibo la see Yeremiya le nya siawo gblɔm le Yehowa ƒe aƒe la me.+  Eya ta esi Yeremiya gblɔ nya siwo katã Yehowa de esi be wòagblɔ na dukɔ blibo la vɔ la, nunɔlawo kple nyagblɔɖilawo kpakple dukɔ blibo la lée hegblɔ be: “Àku kokoko.  Nu ka tae nègblɔ nya ɖi le Yehowa ƒe ŋkɔ me be, ‘Aƒe sia anɔ abe Silo ene, woagbã du sia, eye ame aɖeke maganɔ eme o’?” Eye dukɔ blibo la ƒo zi ɖe Yeremiya ŋu le Yehowa ƒe aƒe la me. 10  Esi Yuda-megãwo se nya siawo la, wodo tso fia ƒe aƒe* la me va Yehowa ƒe me heva bɔbɔ nɔ Yehowa ƒe aƒe ƒe agbo yeye la nu.+ 11  Eye nunɔlawo kple nyagblɔɖilawo gblɔ na amegãwo kple dukɔ blibo la be: “Ŋutsu sia dze ku,+ elabena egblɔ nya ɖi ɖe du sia ŋu abe ale si miawo ŋutɔwo miesee kple miaƒe to ene.”+ 12  Eye Yeremiya gblɔ na amegãwo katã kple dukɔ blibo la be: “Yehowae dɔm be magblɔ nya siwo katã miese la ɖi ɖe aƒe sia kple du sia ŋu.+ 13  Eya ta miɖɔ miaƒe zɔzɔme kple miaƒe nuwɔnawo ɖo, eye miɖo to Yehowa mia Mawu ƒe gbe, ekema Yehowa atrɔ susu* eye mahe vɔ̃ si wògblɔ ɖi ɖe mia ŋu la ava mia dzi o.+ 14  Ke nye la, mele mia si me. Miwɔm ale si dze, eye wònyo mia ŋu. 15  Gake minyae be ne miewum la, ekema miehe ʋu maɖifɔ va mia ɖokuiwo kple du sia kpakple emenɔlawo dzi, elabena le nyateƒe me la, Yehowae dɔm ɖe mia gbɔ be magblɔ nya siawo katã ɖe miaƒe to me.” 16  Eye amegãwo kple dukɔ blibo la gblɔ na nunɔlawo kple nyagblɔɖilawo be: “Ŋutsu sia medze ku o, elabena Yehowa mía Mawu ƒe ŋkɔ mee wòƒo nu na mí le.” 17  Gawu la, anyigba la dzi ametsitsi aɖewo hã tso gblɔ na dukɔa ƒe ha blibo la be: 18  “Mika,+ si tso Moreset, gblɔ nya ɖi le Yuda-fia Hizkiya+ ŋɔli, eye wògblɔ na Yuda dukɔ blibo la be, ‘Ale aʋakɔwo ƒe Yehowa gblɔe nye esi: “Woaŋlɔ Zion abe agble ene,Yerusalem azu glikpo,+Eye Gbedoxɔ la ƒe to azu togbɛ toave.”’+ 19  “Ðe Yuda-fia Hizkiya kple Yuda blibo la wuia? Ðe mevɔ̃ Yehowa, eye wòɖe kuku na Yehowa be wòave yewo nu, ale be Yehowa trɔ susu,* eye mehe vɔ̃ si wògblɔ ɖe wo ŋu la va wo dzi oa?+ Eya ta vɔ̃ gã aɖee nye esia míedi be míahe ava mía ɖokuiwo* dzi. 20  “Ŋutsu aɖe hã nɔ nya gblɔm ɖi le Yehowa ƒe ŋkɔ me, si ŋkɔe nye Uriya, Semaya si tso Kiriat-Yearim+ la ƒe vi. Eye wògblɔ nya ɖi ɖe du sia kple anyigba sia ŋu wòsɔ kple Yeremiya ƒe nyawo. 21  Eye Fia Yehoyakim+ kple eƒe kalẽtɔwo katã kpakple amegãwo katã se eƒe nyawo, eye fia la di be yeawui.+ Esi Uriya see la, enumake vɔvɔ̃ ɖoe wòsi yi Egipte. 22  Ke Fia Yehoyakim dɔ ame ɖo ɖe Egipte; edɔ Elnatan,+ Akbor vi, kple ŋutsu bubu aɖewo ɖo ɖe Egipte. 23  Wokplɔ Uriya tso Egipte vɛ na Fia Yehoyakim, eye wòwui kple yi+ hetsɔ eƒe kukua ƒu gbe ɖe dukɔ la me viwo ƒe ameɖibɔ me.” 24  Ke Ahikam,+ Safan+ vi, kpe ɖe Yeremiya ŋu, ale be wometsɔe de asi na dukɔ la be woawu o.+

Etenuŋɔŋlɔ

Egɔmeɖeɖe tẽe, “avem.”
Alo, “mɔfiame.”
Egɔmeɖeɖe tẽe, “ame siwo mefɔna ŋdi kanya dɔna.”
Alo, “fiasã.”
Alo, “ave Yehowa.”
Alo, “eve Yehowa.”
Alo, “míaƒe luʋɔwo.”