Dzo kpo yi emenuwo dzi

Dzo kpo yi emenuawo dzi

Tito 3:1-15

EMENYAWO ƑE TOTOƉEME

  • Ðokuibɔbɔ nyuitɔ (1-3)

  • Dzadzraɖo hena dɔ nyuiwo wɔwɔ (4-8)

  • Gbe nu le bometsinyawo ʋiʋli kple kɔmamawo gbɔ (9-11)

  • Paulo ƒe mɔfiamewo kple gbedonamewo (12-15)

3  Yi edzi nànɔ ŋku ɖom edzi na wo be woabɔbɔ wo ɖokuiwo na dziɖuɖuwo kple ŋusẽtɔwo,+ eye woaɖo to wo,* eye woanɔ dzadzraɖoɖi na dɔ nyui sia dɔ nyui wɔwɔ,  be woagagblɔ nya vɔ̃ ɖe ame aɖeke ŋu o, woaganye dzrewɔlawo o, ke boŋ woanye nugɔmeselawo,+ woafa tu na amewo katã.+  Elabena tsã la, míawo hã míenye movitɔwo, tosẽlawo, ame siwo tra mɔ, nudzodzro kple vivisese vovovowo ƒe kluviwo, míenɔ nu vɔ̃ɖi wɔwɔ kple ŋubiabiã dzi, eye míenye ame nyɔŋuwo kple ame siwo léa fu wo nɔewo.  Ke esi Mawu,+ mía Xɔla la ɖe eƒe dɔmenyonyo kple ale si wòlɔ̃ ameƒomea ɖe go la,  eɖe mí (menye le dzɔdzɔenyenyedɔ si míawo míewɔ la ta o,+ ke boŋ le eƒe nublanuikpɔkpɔ ta),+ to tsilename si na agbe mí+ kple mía wɔwɔ yeyee to gbɔgbɔ kɔkɔe me la me.+  Ekɔ gbɔgbɔ sia ɖe mía dzi fũu to Yesu Kristo, mía Ðela la dzi,+  ale be esi wobu mí ame dzɔdzɔewoe to eƒe amenuveve me vɔ la,+ míazu domenyilawo+ le agbe mavɔ ƒe mɔkpɔkpɔ la nu.+  Kakaɖedzi le nya siawo ŋu, eye medi be nàte gbe ɖe nya siawo dzi ɣesiaɣi ale be ame siwo xɔ Mawu dzi se la ƒe susu nanɔ dɔ nyuiwo wɔwɔ ŋu. Nu siawo nyo, eye viɖe le wo ŋu na ame.  Ke mègade nu bometsinyawo ʋiʋli kple dzidzimewo xexlẽ fia kple nyahehewo kpakple dzrewɔwɔ me le Se la ŋu o, elabena womeɖea vi aɖeke o, eye wonye nu dzodzrowo.+ 10  Ne èxlɔ̃ nu*+ ame si doa kɔmama*+ ɖe ŋgɔ zi gbãtɔ kple zi evelia vɔ la, nàgbe nu le egbɔ,+ 11  nyae be ame sia tra mɔ, eye wòle nu vɔ̃ wɔm hebu fɔ eɖokui. 12  Ne medɔ Artemas alo Tikiko+ ɖe gbɔwò la, dze agbagba ɖe sia ɖe nàva gbɔnye le Nikopoli, elabena afi mae meɖo be manɔ le vuvɔŋɔli la. 13  Wɔ nu sia nu si nàte ŋui adi nu siwo katã Zena, ame si nya Se la nyuie, kple Apolo hiã la na wo ale be naneke nagahiã wo le woƒe mɔzɔzɔa me o.+ 14  Ke na míaƒe amewo hã nasrɔ̃ ale si woanɔ dɔ nyuiwo wɔwɔ dzi, ale be woate ŋu akpɔ woƒe nuhiahiã veviwo gbɔ,+ ne woagazu ame matsekuwo o.+ 15  Ame siwo katã le gbɔnye la do gbe na wò. Do gbe na ame siwo katã lɔ̃ mí le xɔse la me nam. Mawu ƒe amenuveve nanɔ kpli mi katã.

Etenuŋɔŋlɔ

Egɔmeɖeɖe tẽe, “woaɖo to wo abe dziɖulawo ene.”
Alo, “Ne ègbe nya na.”
Alo, “nufiafia bubu.”