Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Tito 2:1-15

EMENYAWO ƑE TOTOƉEME

  • Nufiafia nyui na ame tsitsiwo kple ɖeviwo siaa (1-15)

    • Tsri mawumavɔmavɔ̃ (12)

    • Veviedodonu le dɔ nyuiwo wɔwɔ me (14)

2  Ke wò la, yi edzi nànɔ nya siwo sɔ ɖe nufiafia si le blibo* nu la gblɔm.+  Ŋutsu tsitsiwo nada asɔ le nuwɔna me, woalé fɔ ɖe nu ŋu, woaɖɔ ŋu ɖo, woasẽ ŋu le xɔse me, le lɔlɔ̃ me, le dzidodo me.  Nenema kee nyɔnu tsitsiwo hã nawɔ nu le mawuvɔvɔ̃ me, woaganye ameŋugblẽlawo o, eye woaganye aha geɖe nolawo hã o, woanye nu nyui fialawo,  ne woaxlɔ̃ nu* ɖetugbuiwo be woalɔ̃ wo srɔ̃wo, woalɔ̃ wo viwo,  woanye ame ɖɔŋuɖowo, agbe dzadzɛ nɔlawo, aƒemedɔwɔlawo,* nyuiwɔlawo, ame siwo bɔbɔa wo ɖokuiwo na woawo ŋutɔwo srɔ̃wo,+ ale be woagagblɔ nya vlo ɖe Mawu ƒe nya la ŋu o.  Nenema kee yi edzi nànɔ nu xlɔ̃m ɖekakpuiwo be woaɖɔ ŋu ɖo;+  nàɖo kpɔɖeŋu nyui le dɔ nyuiwo wɔwɔ me le nu sia nu me. Fia nu si dza la moveviɖoɖotɔe,+  na wò nuƒoƒo nanyo, ale be woagakpɔ nya aɖeke le eŋu agblɔ o;+ ale be ŋu nakpe tsitretsiɖeŋulawo le esi womekpɔ nya gbegblẽ aɖeke agblɔ le mía ŋu o ta.+  Kluviwo nabɔbɔ wo ɖokuiwo na woƒe aƒetɔwo le nu sia nu me,+ woadze agbagba adze woƒe aƒetɔwo ŋu, eye woaganɔ nya hem kpli wo o, 10  woaganɔ wo fim o,+ ke boŋ woanye ame siwo dzi woate ŋu aka ɖo bliboe, ale be woaɖo atsyɔ̃ na Mawu, mía Xɔla, ƒe nufiafia la le nu sia nu me.+ 11  Elabena Mawu ɖe eƒe amenuveve fia, eye esia hea ɖeɖekpɔkpɔ vɛ na ame ƒomeviwo katã.+ 12  Esia fia mí be míatsri mawumavɔmavɔ̃ kple xexea me nudzodzrowo,+ eye be míanɔ agbe le ŋuɖɔɖo kple dzɔdzɔenyenye kpakple ɖokuitsɔtsɔ na Mawu me le fifi nuɖoanyi* sia me,+ 13  esime míele dzidzɔmɔkpɔkpɔ+ kple Mawu gã la kpakple mía Ðela Yesu Kristo ƒe ŋutikɔkɔe ƒe ɖeɖefia la lalam, 14  ame si tsɔ eɖokui na ɖe mía ta,+ be wòaɖe mí*+ tso sedzimawɔmawɔ ɖe sia ɖe me, eye wòakɔ dukɔ si nye eya ŋutɔ tɔ, si le tɔxɛ nɛ, si doa vevie nu le dɔ nyuiwo wɔwɔ me, la ŋu na eɖokui.+ 15  Yi edzi nànɔ nya siawo gblɔm, eye nàxlɔ̃ nu ahaka mo le ŋusẽ blibo si wona wò la nu.+ Mègana ame aɖeke nado vlo wò o.

Etenuŋɔŋlɔ

Alo, “nufiafia nyuitɔ.”
Alo, “woaɖo ŋku edzi na; woana hehe.”
Alo, “ame siwo léa be na woƒe aƒewo.”
Egɔmeɖeɖe tẽe, “be wòaxe mía tafe.”