Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Rut 1:1-22

EMENYAWO ƑE TOTOƉEME

  • Elimelek ƒomea ʋu yi Moab (1, 2)

  • Naomi, Orpa kple Rut zu ahosiwo (3-6)

  • Rut wɔ nuteƒe na Naomi kple Naomi ƒe Mawu (7-17)

  • Naomi kple Rut trɔ yi Betlehem (18-22)

1  Le ʋɔnudrɔ̃lawo+ ƒe ŋkekeawo me la,* dɔ to le anyigba la dzi; eye ŋutsu aɖe kple srɔ̃a kpakple viaŋutsu eve ʋu le Betlehem+ le Yuda be yewoayi aɖanɔ Moab-nyigba+ dzi.*  Ŋutsua ŋkɔe nye Elimelek,* eye srɔ̃a ŋkɔe nye Naomi,* viaŋutsu eveawo ŋkɔwoe nye Mahlon* kple Kilion.* Wonye Efratatɔwo tso Betlehem le Yuda. Eye wova ɖo Moab-nyigba dzi, eye wonɔ afi ma.  Le ɣeyiɣi aɖe megbe la, Naomi srɔ̃ Elimelek ku, eye eya kple viaŋutsu eveawo koe susɔ.  Emegbe ŋutsuawo ɖe Moab-nyɔnuwo; ɖeka ŋkɔe nye Orpa, eye evelia ŋkɔe nye Rut.+ Wonɔ afi ma anɔ ƒe ewo.  Ke viaŋutsu eveawo, Mahlon kple Kilion, hã va ku, ale be Naomi koe kpɔtɔ, srɔ̃a kple via eveawo ku hegblẽe ɖi.  Eya ta eya kple lɔ̃xoyɔviawo gbugbɔ tso Moab-nyigba dzi, elabena ese le Moab-nyigba dzi be Yehowa trɔ susu ɖe eƒe amewo ŋu hena nuɖuɖu* wo.  Ale wòʋu tso afi si eya kple lɔ̃xoyɔvi eveawo nɔ la. Esi wole mɔ dzi yina Yuda-nyigba dzi la,  Naomi gblɔ na lɔ̃xoyɔvi eveawo be: “Mitrɔ, eye mia dometɔ ɖe sia ɖe neyi dadaa ƒe me. Yehowa neve mia nu,+ abe ale si mieve mia srɔ̃ siwo ku kple nye hã nunye ene.  Yehowa nena mia dometɔ ɖe sia ɖe nakpɔ dzidzeme* le srɔ̃a ƒe me.”+ Eye wògbugbɔ nu na wo, eye wolé avi me. 10  Eye wonɔ gbɔgblɔm nɛ be: “Ao, ke boŋ míatrɔ kpli wò ayi wò dukɔ gbɔ.” 11  Ke Naomi gblɔ be: “Vinyewo, migbugbɔ! Nu ka tae miayi kplim? Ðe magate ŋu adzi ŋutsuvi siwo ava ɖe mia?+ 12  Vinyewo, migbugbɔ. Miyi elabena metsi akpa be maɖe srɔ̃. Nenye be mɔkpɔkpɔ li be maɖe srɔ̃ zã sia me, eye madzi viŋutsuviwo hã la, 13  ɖe mianɔ anyi anɔ lalam va se ɖe esime woatsia? Woawo tae mianɔ anyi srɔ̃maɖemaɖeea? Kpao, vinyewo, elabena mia tɔ koe le veyem ŋutɔ, be Yehowa do eƒe asi ɖe gbɔnye.”+ 14  Eye wogafa avi sesĩe ɖe edzi, emegbe Orpa gbugbɔ nu na lɔ̃xoa hetrɔ dzo. Ke Rut ya ku ɖe eŋu. 15  Eya ta Naomi gblɔ be: “Kpɔ ɖa! Srɔ̃wòɖia srɔ̃ ahosia trɔ yi eƒe dukɔ kple eƒe mawuwo gbɔ. Trɔ nàdze srɔ̃wòɖia srɔ̃ la yome.” 16  Ke Rut gblɔ nɛ be: “Mègaƒoe ɖe nunye be magblẽ wò ɖi agbugbɔ le yowòme o; elabena afi si nàyi la, afi mae mayi, eye afi si nàtsi adɔ la, afi mae matsi adɔ. Wò dukɔ anye nye dukɔ, eye wò Mawu anye nye Mawu.+ 17  Afi si nàku ɖo la, afi mae maku ɖo, eye afi mae woaɖim ɖo. Yehowa nefiam, ne wòagafiam ɖe edzi, ne menye ku koe aklã nye kpli wò dome o fĩi!” 18  Esi Naomi kpɔ be Rut ɖoe kplikpaa be yeayi kpli ye la, edzudzɔ eƒoƒo ɖe enu. 19  Eye wo ame evea woyi woƒe mɔzɔzɔa dzi va se ɖe esime woɖo Betlehem.+ Esi wova ɖo Betlehem teti ko la, du blibo la ƒo zi ɖe wo ŋu, eye nyɔnuawo nɔ biabiam be: “Naomi ye nye esia?” 20  Ke egblɔna na nyɔnuawo be: “Migayɔm be Naomi* o. Miyɔm be Mara,* elabena Ŋusẽkatãtɔ la na nye agbenɔnɔ zu veve sɔŋ.+ 21  Nu nɔ asinye fũu hafi meyi, ke asi ƒuƒlue Yehowa na metrɔ gbɔe. Nu ka tae miayɔm be Naomi, evɔ Yehowa tso ɖe ŋunye, eye Ŋusẽkatãtɔ la na vɔ̃ dzɔ ɖe dzinye?”+ 22  Aleae Naomi trɔ gbɔ kple lɔ̃xoyɔvia Rut, Moab-nyɔnu la, tso Moab-nyigba+ dzi. Eye wova ɖo Betlehem le ƒoŋeɣi ƒe gɔmedzedze.+

Etenuŋɔŋlɔ

Egɔmeɖeɖe tẽe, “ƒe ʋɔnudrɔ̃ɣi la.”
Alo, “nuto me.”
Egɔmee nye, “Nye Mawu Nye Fia.”
Egɔmee nye, “Nye Ŋudzedzekpɔkpɔ.”
Ðewohĩ Hebrigbe me nya si gɔmee nye “gbɔdzɔ; dze dɔ” la mee woɖee tsoe.
Egɔmee nye, “Ame Si Le Kpo Dom Nu; Ame Si Ƒe Nuwuwu Le Ðoɖom.”
Egɔmeɖeɖe tẽe, “abolo.”
Egɔmeɖeɖe tẽe, “gbɔɖemeƒe.”
Egɔmee nye, “Nye Ŋudzedzekpɔkpɔ.”
Egɔmee nye, “Veve.”