Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Marko 11:1-33

EMENYAWO ƑE TOTOƉEME

  • Yesu yi Yerusalem abe fia ene (1-11)

  • Eƒo fi de gboti (12-14)

  • Yesu kɔ gbedoxɔa ŋu (15-18)

  • Nu si míesrɔ̃ tso gboti si yrɔ la ŋu (19-26)

  • Wotɔ gbe Yesu ƒe ŋusẽ (27-33)

11  Ke esi wogogo Yerusalem, eye wote ɖe Betfage kple Betania+ ŋu le Amitoa dzi la, edɔ eƒe nusrɔ̃lawo dometɔ eve+  gblɔ na wo be: “Miyi kɔƒe si kpɔm miele le mia ŋgɔ la me, eye ne miege ɖe eme teti la, miakpɔ tedzivi aɖe le ka me, si dzi ame aɖeke menɔ kpɔ o. Miɖe kae, eye mikplɔe vɛ.  Eye ne ame aɖe bia mi be, ‘Nu ka tae miele ka ɖemee?’ hã la, migblɔ be, ‘Aƒetɔ la le ehiãm, eye agatrɔe ɖo ɖa kpuie.’”  Ale woyi, eye wokpɔ tedzivi la le ka me le aƒe aɖe ƒe agbo nu le mɔ to, eye woɖe kae.+  Ke ame siwo le tsitre ɖe afi ma dometɔ aɖewo bia wo be: “Nu ka tae miele ka ɖem tedzivi la?”  Woɖo eŋu na wo abe ale si tututu Yesu gblɔ ene, eye woɖe mɔ na wo wodzo.  Wokplɔ tedzivi la vɛ+ na Yesu, eye wotsɔ woƒe awudziwuiwo ɖo ɖe edzi, eye wòbɔbɔ nɔ edzi.+  Ame geɖewo hã ɖo woƒe awudziwuiwo ɖe mɔa dzi, ke ame bubuwo ŋe atilɔwo tso gbe me ɖo ɖe mɔa dzi.+  Eye ame siwo le eŋgɔ kple ame siwo le eyome la le ɣli dom be: “Míeɖe kuku, xɔ nɛ!+ Woayra ame si gbɔna le Yehowa* ƒe ŋkɔ me!+ 10  Woayra mía fofo David ƒe Fiaɖuƒe si gbɔna la!+ Míeɖe kuku, xɔ nɛ, wò ame si le dziƒo ʋĩi!” 11  Eva ɖo Yerusalem heyi ɖe gbedoxɔa me, eye wòtsa ŋku godoo helé ŋku ɖe nu sia nu ŋu, esi fiẽsi ɖo vɔ ta la, eya kple Ame Wuieveawo dzo yi Betania.+ 12  Esi ŋu ke, eye wotrɔ tso Betania gbɔna la, dɔ wui.+ 13  Ekpɔ gboti aɖe si dzi aŋgbawo le la le adzɔge ɖaa, eye wòyi be yeakpɔ ɖa be tsetse aɖe le edzi hã. Gake esi wòte ɖe eŋu la, mekpɔ naneke le edzi o negbe aŋgbawo ko, elabena gbotseɣi meɖo haɖe o. 14  Eya ta egblɔ nɛ be: “Ame aɖeke magaɖu wò tsetse azɔ gbeɖegbeɖe o.”+ Eye eƒe nusrɔ̃lawo see. 15  Eye wova Yerusalem. Le afi ma la, ege ɖe gbedoxɔa me, eye wòde asi nudzrala kple nuƒlela siwo le gbedoxɔa me la nyanya me do goe, emu gaɖɔlilawo ƒe kplɔ̃wo kple ahɔnɛdzralawo ƒe zikpuiwo ƒu anyi,+ 16  eye meɖe mɔ na ame aɖeke be wòatsɔ naneke ato gbedoxɔa me ayi o. 17  Efia nu wo be: “Menye ɖe woŋlɔe ɖi be, ‘Woayɔ nye aƒe la be dukɔwo katã ƒe gbedoɖaƒe’+ oa? Ke miawo mietsɔe wɔ adzodalawo ƒe doe.”+ 18  Esi nunɔlawo ƒe tatɔwo kple agbalẽfialawo se nu si dzɔ la, wodi mɔnu be yewoawui;+ elabena wonɔ evɔ̃m, le esi eƒe nufiafia nana ameha blibo la ƒe nu kuna la ta.+ 19  Esi fiẽsi ɖo la, wodo go le dua me. 20  Ke esi wova yina ŋdi kanya la, wokpɔ be gboti la yrɔ xoxo tso eƒe kè me ke.+ 21  Esi Petro ɖo ŋku nu si dzɔ va yi dzi ta la, egblɔ nɛ be: “Rabi, kpɔ ɖa, gboti si nèƒo fi de la yrɔ!”+ 22  Yesu gblɔ na wo be: “Mixɔ Mawu dzi se. 23  Vavã mele egblɔm na mi be ame sia ame si agblɔ na to sia be, ‘Ho nàyi aɖadze atsiaƒu me,’ eye meke ɖi le eƒe dzi me o, ke boŋ wòxɔe se be nya si yegblɔ la ava eme la, ava eme nɛ nenema.+ 24  Esia tae mele egblɔm na mi be, nu siwo katã miedoa gbe ɖa biana la, mixɔe se be miexɔ wo xoxo, ekema woasu mia si.+ 25  Eye ne miele tsitre le gbe dom ɖa la, mitsɔ nya sia nya si le mia si ɖe ame aɖe ŋu la kee, ne mia Fofo si le dziƒowo hã natsɔ miaƒe vodadawo ake mi.”+ 26  * —— 27  Eye wogava Yerusalem. Esi Yesu le tsatsam le gbedoxɔa me la, nunɔlawo ƒe tatɔwo kple agbalẽfialawo kpakple dumegãwo va egbɔ, 28  eye wobiae be: “Ŋusẽ kae nètsɔ wɔa nu siawo? Alo ame kae na ŋusẽ sia wò nètsɔ wɔa nu siawoe?”+ 29  Yesu gblɔ na wo be: “Mabia nya ɖeka mi. Miɖo eŋu nam, ekema magblɔ ŋusẽ si metsɔ wɔa nu siawoe la na mi. 30  Dziƒoe Yohanes ƒe amenyɔnyrɔ ɖe tsi me+ la tso loo alo amegbetɔwo gbɔe wòtso? Miɖo eŋu nam.”+ 31  Ale wolé nyaa kpɔ le wo nɔewo dome eye wogblɔ be: “Ne míegblɔ be, ‘Dziƒoe wòtso’ la, abia be, ‘Ekema nu ka tae miexɔ edzi se o?’ 32  Evɔ atse meble mí míagblɔ be, ‘Amegbetɔwo gbɔe wòtso’ o.” Wole vɔvɔ̃m na ameha la, elabena wo katã wobua Yohanes be enye nyagblɔɖila ŋutɔŋutɔ.+ 33  Eya ta woɖo eŋu na Yesu be: “Míenya o.” Ale Yesu gblɔ na wo be: “Nye hã nyemagblɔ ŋusẽ si metsɔ wɔa nu siawoe la na mi o.”

Etenuŋɔŋlɔ