Dzo kpo yi emenuwo dzi

Dzo kpo yi emenuawo dzi

Filemon 1:1-25

EMENYAWO ƑE TOTOƉEME

  • Gbedonamewo (1-3)

  • Filemon ƒe lɔlɔ̃ kple xɔse (4-7)

  • Paulo ɖe kuku ɖe Onesimo ta (8-22)

  • Gbedoname mamlɛawo (23-25)

 Paulo, ame si le ga me+ le Kristo Yesu ta, kple mía nɔvi Timoteo+ le esia ŋlɔm na Filemon, míaƒe hadɔwɔla lɔlɔ̃a,  kple mía nɔvinyɔnu Apia kple mía hatisrafo Arkipo+ kpakple hame si le aƒewò me:+  Amenuveve kple ŋutifafa si tso Mawu mía Fofo kple Aƒetɔ Yesu Kristo gbɔ la, nanɔ kpli mi.  Medaa akpe na nye Mawu ɣesiaɣi si meyɔ ŋkɔwò le nye gbedodoɖawo me,+  esi meyi edzi le wò xɔse kple lɔlɔ̃ si le asiwò ɖe Aƒetɔ Yesu kple ame kɔkɔewo katã ŋu la ŋuti nya sem ta.  Mele gbe dom ɖa be wò xɔse si me nèlé ɖe asi naʋã wò nàlɔ̃ ɖe nu nyui sia nu nyui si su mía si to Kristo dzi la dzi.  Elabena nɔviŋutsu, mekpɔ dzidzɔ kple akɔfafa geɖe esi mese wò lɔlɔ̃ ŋu nya, elabena èna ame kɔkɔewo ƒe dzi dze eme.  Le susu sia tututu ta, togbɔ be mekpɔ mɔ le Kristo me agblɔe na wò kã be nàwɔ nu si sɔ hã la,  le lɔlɔ̃ ta, medi be maɖe kuku na wò boŋ. Esi nye Paulo, menye ame tsitsi, eye mele ga me fifia le Kristo Yesu ta la, 10  mele kuku ɖem na wò ɖe vinye Onesimo+ ta, ame si meva zu fofo na+ esi mele gaxɔ me. 11  Enye ame si ŋu viɖe aɖeke mele na wò tsã o, ke azɔ viɖe le eŋu na nye kpli wò siaa. 12  Megbugbɔ le eɖom ɖe wò, ɛ̃, eya, ame si nye nye ŋutɔ nye dzi.* 13  Madi be mana wòanɔ gbɔnye, ale be wòayi edzi anɔ subɔyem ɖe tewòƒe le nye gaxɔmenɔnɔ me le nya nyui la ta hafi.+ 14  Ke nyemedi be mawɔ naneke ne mèda asi ɖe edzi hafi o, ale be nu nyui si nàwɔ la naganye le dzizizi ta o, ke boŋ wòanye esi wò ŋutɔ nèlɔ̃ faa be yeawɔ.+ 15  Ðewohĩ esia tututu tae wòdzo le gbɔwò ɣeyiɣi vi aɖe* ɖo, ale be wòagbugbɔ ava nɔ gbɔwò tegbee, 16  meganye kluvi ko o,+ ke boŋ ede ŋgɔ wu kluvi, ezu nɔvi lɔlɔ̃tɔ, vevietɔ na nye ŋutɔ,+ ke ezu esia na wò ya geɖe wu le ŋutilã me kple Aƒetɔ la me siaa. 17  Eya ta ne èbum xɔ̃wòe* la, ekema kɔ dɔme nàxɔe faa abe ale si nàxɔm ene. 18  Eye ne eda vo aɖe ɖe ŋuwò alo nyi nane ƒe fe le ŋuwò la, bui nam. 19  Nye Paulo ŋutɔe tsɔ nye asiwo le nya siawo ŋlɔm be: maɖo eteƒe—nyemedi be magblɔ be ènyi wò ŋutɔ ɖokuiwò hã ƒe fe le ŋunye o. 20  Ɛ̃, nɔviŋutsu, wɔ esia nam le Aƒetɔ la ta; na nye dzi nadze eme le Kristo me. 21  Meka ɖe dziwò be àwɔ esia, eya ta mele agbalẽ sia ŋlɔm na wò, eye menyae be àwɔ geɖe wu esiwo megblɔ gɔ̃ hã. 22  Hekpe ɖe ema ŋu la, dzra dzeƒe ɖo ɖi nam, elabena mele mɔ kpɔm be to miaƒe gbedodoɖawo me la, woaɖe asi le ŋunye na mi.+ 23  Epafra,+ si le gaxɔ me kplim le Kristo Yesu me, do gbe na wò. 24  Marko, Aristarko,+ Dema+ kple Luka,+ siwo nye nye hadɔwɔlawo, hã do gbe na wò. 25  Aƒetɔ Yesu Kristo ƒe amenuveve nanɔ anyi kple gbɔgbɔ si mieɖena fiana la.

Etenuŋɔŋlɔ

Alo, “ame si ŋu nye dzi ku ɖo.”
Egɔmeɖeɖe tẽe, “gaƒoƒo ɖeka.”
Egɔmeɖeɖe tẽe, “gomekpɔlae.”