Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Ezra 3:1-13

EMENYAWO ƑE TOTOƉEME

  • Wogbugbɔ ɖi vɔsamlekpui la eye wosa vɔwo (1-7)

  • Wodze gbedoxɔa gbugbɔgatu gɔme (8, 9)

  • Woɖo gbedoxɔa gɔme anyi (10-13)

3  Le ɣleti adrelia me,+ esi Israel-viwo le woƒe duwo me keŋ la, wova kpe ta ɖe Yerusalem kple tame ɖeka.  Eye Yesua,+ Yehozadak vi, kple nɔvia siwo nye nunɔlawo kpakple Zerubabel,+ Sealtiel+ vi, kple nɔviawo tso, eye woɖi Israel ƒe Mawu la ƒe vɔsamlekpui, ne woasa numevɔwo le edzi, abe ale si woŋlɔe ɖe Mawu vavã la ƒe ame Mose ƒe Sea me ene.+  Ale woɖi vɔsamlekpui la ɖe afi si wònɔ tsã, togbɔ be wonɔ vɔvɔ̃m na dukɔ siwo ƒo xlã wo hã,+ eye wode asi ŋdi kple fiẽ numevɔwo sasa me le edzi na Yehowa.+  Emegbe woɖu Agbadɔŋkekenyui la abe ale si woŋlɔe ɖii ene,+ eye wosa numevɔ gbe sia gbe ɖe xexlẽme la nu, abe ale si woɖo na ŋkeke ɖe sia ɖe ene.+  Emegbe wosa numevɔ si wosana ɖaa,+ kple dzinu yeyewo+ ƒe vɔsawo, kple Yehowa ƒe azãɖuɣi kɔkɔewo+ katã ƒe vɔsawo kpakple ame sia ame si lɔ̃ faa va na nu+ Yehowa la ƒe numevɔwo.  Wodze numevɔwo sasa na Yehowa gɔme tso ɣleti adrelia+ ƒe ŋkeke gbãtɔ dzi, togbɔ be womeɖo Yehowa ƒe gbedoxɔa gɔme anyi haɖe o hã.  Wotsɔ ga na kpekpalawo+ kple aɖaŋudɔwɔlawo,+ eye wotsɔ nuɖuɖu, nunono kple ami na Sidontɔwo kple Tirotɔwo, ne woatsɔ sedertiwo tso Lebanon ava Yopa+ le ƒu la nu, abe ale si Persia-fia Kores+ ɖe mɔ na woe ene.  Esi wogbɔ va Mawu vavã ƒe aƒe la gbɔ le Yerusalem ƒe ƒe evelia ƒe ɣleti evelia me la, Zerubabel, Sealtiel vi, kple Yesua, Yehozadak vi, kpakple wo nɔvi susɔeawo, nunɔlawo kple Lewi viwo, kpakple ame siwo katã gbɔ tso aboyo me va Yerusalem+ la dze dɔ gɔme; eye woɖo Lewi vi siwo xɔ ƒe blaeve kple edzivɔ la be woakpɔ Yehowa ƒe aƒe la ƒe dɔ la dzi.  Eya ta Yesua, viawo kple nɔviawo, Kadmiel kple viawo, Yuda viwo, wɔ ɖeka be yewoanye dzikpɔlawo anɔ Mawu vavã la ƒe aƒe la me dɔwɔlawo nu, hekpe ɖe Henada+ viwo, wo viwo kple wo nɔvi siwo hã nye Lewi viwo ŋu. 10  Esi xɔtulawo ɖo Yehowa ƒe gbedoxɔ la gɔme anyi la,+ nunɔla siwo le nunɔlawu me, eye kpẽwo+ le wo si, kple Lewi vi siwo nye Asaf viwo, eye gakogoewo le wo si la tso be woakafu Yehowa abe ale si Israel-fia David ɖoe ene.+ 11  Eye wodzi ha+ kafu Yehowa heda akpe nɛ, “elabena eya amea nyo; eƒe lɔlɔ̃ si nu metsina o la li na Israel tegbee.”+ Eye dukɔ blibo la katã do ɣli sesĩe kafu Yehowa le esi woɖo Yehowa ƒe xɔ la gɔme anyi ta. 12  Eye nunɔlawo dometɔ geɖe kple Lewi viwo kpakple tatɔ siwo le wo fofowo ƒe aƒekɔawo nu, siwo nye ame tsitsi siwo kpɔ xɔ tsãtɔ la,+ fa avi hehehe esi woɖo xɔ sia gɔme anyi wokpɔ, esime ame bubu geɖewo ya le aseye tsom hoo.+ 13  Ale dukɔ la mete ŋu de vovo dzidzɔɣli la kple ameawo ƒe avifafa la dome o, elabena dukɔ la le ɣli dom sesĩe, eye woƒe gbe de didiƒe ke.

Etenuŋɔŋlɔ