Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Ezekiel 8:1-18

EMENYAWO ƑE TOTOƉEME

  • Wokplɔ Ezekiel yi Yerusalem le ŋutega me (1-4)

  • Wokpɔ nu makɔmakɔwo le gbedoxɔa me (5-18)

    • Nyɔnuwo le avi fam na Tamuz (14)

    • Ŋutsuwo le ta dem agu na ɣe (16)

8  Le ƒe adelia ƒe ɣleti adelia ƒe ŋkeke atɔ̃lia dzi, esime mebɔbɔ nɔ aƒenye me, eye Yuda-metsitsiwo bɔbɔ nɔ ŋkunyeme la, Aƒetɔ Dziɖulagã Yehowa ƒe asi va dzinye le afi ma.  Meɖo ŋku anyi, eye mekpɔ nane si le abe dzo ene; eƒe afi si dze abe ali ene la ƒe anyime nye dzo, eye tso eƒe afi si dze abe ali ene+ yi dzi la le keklẽm abe sika kple klosalo si wotsaka ƒe keklẽ ene.+  Eye wòdo nane si le abe asi ene ɖa helé nye taɖa, eye gbɔgbɔ aɖe kɔm ɖe anyigba kple dziƒo domee le Mawu ƒe ŋutega me yi Yerusalem le agbo emetɔ+ si dze ŋgɔ dziehe la nu, afi si ŋuʋaʋã ƒe legba si nana Mawu ʋãa ŋu la le.+  Eye kpɔ ɖa, Israel ƒe Mawu la ƒe ŋutikɔkɔe le afi ma,+ abe nɔnɔme si mekpɔ le bali la me ene.+  Eye wògblɔ nam be: “Amegbetɔvi, meɖe kuku fɔ kɔ dzi nàkpɔ dziehe gome.” Ale mefɔ kɔ dzi kpɔ dziehe gome, eye kpɔ ɖa, ŋuʋaʋã ƒe legba sia le vɔsamlekpui la ƒe agbo nu le dziehe gome.  Eye wògblɔ nam be: “Amegbetɔvi, èle ŋunyɔnu dziŋɔ siwo wɔm Israel ƒe aƒe la le le afi sia,+ nu siwo na meɖe ɖokuinye ɖe aga ʋĩi tso nye kɔkɔeƒea gbɔ la, kpɔmaa?+ Ke ègale nu siwo nyɔ ŋu sãa wu la kpɔ ge.”  Eye wòkplɔm yi xɔxɔnu la ƒe mɔnu, esi meɖo ŋku anyi la, mekpɔ do aɖe le glia me.  Eye wògblɔ nam be: “Amegbetɔvi, meɖe kuku, ŋɔ glia.” Eya ta meŋɔ glia, eye mekpɔ ʋɔtru aɖe.  Eye wògblɔ nam be: “Ge ɖe eme, ne nàkpɔ ŋunyɔnu vɔ̃ɖi siwo wɔm wole le afi sia la ɖa.” 10  Ale mege ɖe eme, eye kpɔ ɖa, mekpɔ nu gbagbe siwo tana kple lã nyɔŋuwo+ katã kpakple Israel ƒe aƒe la ƒe legba nyɔŋuwo*+ katã ƒe nɔnɔmetatawo; wota wo ɖe glia ŋu godoo va kpe. 11  Eye Israel ƒe aƒe la ƒe ametsitsiwo dometɔ blaadre, siwo dome Safan+ vi Yaazaniya le la, tɔ ɖe wo ŋgɔ. Wo dometɔ ɖe sia ɖe lé eƒe dzudzɔdosonu ɖe asi, eye dzudzɔ ʋeʋĩ de dzi kɔtɔɔ.+ 12  Eye wògblɔ nam be: “Amegbetɔvi, èkpɔ nu si wɔm Israel ƒe aƒe la ƒe ametsitsiwo dometɔ ɖe sia ɖe le le viviti me, le eƒe xɔ emetɔ si me wòɖo eƒe legbawo ɖo la mea?* Elabena wole gbɔgblɔm be, ‘Yehowa mele mía kpɔm o. Yehowa gblẽ anyigba la ɖi.’”+ 13  Eye wògagblɔ nam be: “Ègale ŋunyɔnu siwo wɔm wole siwo dzi ŋɔ sãa wu la gɔ̃ hã kpɔ ge.” 14  Ale wòkplɔm va Yehowa ƒe aƒe la ƒe dziehegbo la nu, eye mekpɔ nyɔnuwo bɔbɔ nɔ afi ma le avi fam na mawu Tamuz. 15  Eye wògagblɔ nam be: “Amegbetɔvi, èkpɔea? Ègale ŋunyɔnu dziŋɔ siwo vɔ̃ɖi sãa wu esiawo la kpɔ ge.”+ 16  Ale wòkplɔm va Yehowa ƒe aƒe la ƒe xɔxɔnu emetɔ la me.+ Ŋutsu siwo ade blaeve vɔ atɔ̃ la le afi ma, le Yehowa ƒe gbedoxɔ la ƒe mɔnu le akpata la kple vɔsamlekpui la dome, wotrɔ megbe de Yehowa ƒe gbedoxɔ la, eye wotrɔ mo ɖo ɖe ɣedzeƒe gome hele ta dem agu na ɣe ɖo ɖe ɣedzeƒe gome.+ 17  Eye wògagblɔ nam be: “Amegbetɔvi, èkpɔea? Nu tsɛ wònye be Yuda ƒe aƒe la wɔ ŋunyɔnu siawo hetsɔ ŋutasesẽ yɔ anyigba la dzi fũu+ hele dziku dom nam ɖe edzia? Azɔ wotsɔ atilɔ* hã le dodom ɖe nye ŋɔti nu. 18  Eya ta mawɔ nu le dziku me. Nye ŋku makpɔ nublanui o, eye nye dɔme hã matrɔ ɖe wo ŋu o.+ Woado ɣli sesĩe ɖe to me nam, ke nyemasee na wo o.”+

Etenuŋɔŋlɔ

Ðewohĩ Hebrigbe me nya si wozã le afi sia la do ƒome kple nya si wozãna na “mĩ” eye wozãnɛ na nu si nyɔa ŋu.
Alo, “xɔ emetɔ siwo me eƒe nu kpakpɛ veviwo le la?”
Edze ƒãa be enye atilɔ si wozãna le trɔ̃subɔsubɔ me.