Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Ezekiel 47:1-23

EMENYAWO ƑE TOTOƉEME

  • Tsi le dzidzim tso gbedoxɔa me (1-12)

    • Tsia le goglom vivivi (2-5)

    • Eda gbe le ƒukukua me tsiwo ŋu (8-10)

    • Womada gbe le teƒe siwo nye tɔbawo kple tawo ya ŋu o (11)

    • Atiwo hena nuɖuɖu kple dɔyɔyɔ (12)

  • Anyigba la ƒe liƒowo (13-23)

47  Azɔ egakplɔm va gbedoxɔ la ƒe mɔnu,+ eye mekpɔ tsi le dzidzim tso gbedoxɔ la ƒe kpui te le sisim ɖo ta ɣedzeƒe gome,+ elabena gbedoxɔ la dze ŋgɔ ɣedzeƒe. Tsi la le sisim tso gbedoxɔa gɔme, le ɖusikpa dzi, eye wòto vɔsamlekpui la ƒe anyigbe gome.  Eyome ekplɔm to dziehegbo la nu,+ eye wòna metrɔ va agbo gotatɔ si dze ŋgɔ ɣedzeƒe gome la nu,+ eye mekpɔ be tsi la le sisim le ɖusikpa dzi.  Ŋutsu la do go heɖo ta ɣedzeƒe gome, eye wòlé dzidzeka ɖe asi;+ edzidze abɔklugui* akpe ɖeka, eye wòna metso tsi la; tsi la se afɔkɔe.  Egadzidze akpe ɖeka, eye wòna metso tsi la, eye tsi la va se klo nu. Egadzidze akpe ɖeka, eye wòna metsoe, eye tsi la va se ɖe ali.  Esi wògadzidze akpe ɖeka la, ezu tɔsisi si nyemete ŋu tso o, elabena tsi la goglo ale gbegbe be ɖeko wòle be woaƒui; ezu tɔsisi si womate ŋu atso kple afɔ o.  Eye wòbiam be: “Amegbetɔvi, èkpɔ nu sia?” Eye wòna metrɔ va tɔsisia ƒe go dzi.  Esi metrɔ la, mekpɔ be ati geɖewo le tɔsisi la to le go eveawo dzi taŋtaŋ.+  Eye wògblɔ nam be: “Tsi sia ɖo ta ɣedzeƒenuto me, eye wòato Araba,*+ ava de nu atsiaƒu la me. Ne ede nu atsiaƒua me la,+ ada gbe le eme tsiwo ŋu.  Afi sia afi si tsi siawo* de la, nu gbagbe* geɖewo anɔ eme. Tɔmelãwo asɔ gbɔ fũu, elabena tsi sia ade afi ma. Ada gbe le atsiaƒua ŋu eye nu sia nu agbɔ agbe le afi sia afi si tɔ la de. 10  “Tɔƒodelawo anɔ eto tso En-Gedi+ va ɖo En-Eglaim, afi si anye ɖɔsiaƒe. Tɔmelã vovovowo anɔ wo me kpaŋkpaŋ, abe Ƒu Gã la* me lãwo ene.+ 11  “Ke eƒe teƒe siwo nye tɔbawo kple tawo ya atsi anyi, womada gbe le wo ŋu o. Woagblẽ wo ɖi na dze.+ 12  “Ati tseku vovovowo amie ɖe tɔsisi la ƒe go eveawo dzi. Woƒe aŋgbawo mayrɔ o, eye woƒe tsetsewo nu matso o. Woatse ku yeyewo ɣleti sia ɣleti, elabena kɔkɔeƒe+ lae woƒe tsi dzɔ tso. Woƒe tsetse anye nuɖuɖu, eye woƒe aŋgbawo anye dɔyɔgbe.”+ 13  Ale Aƒetɔ Dziɖulagã Yehowa gblɔe nye esi: “Esiae nye anyigba si miama na Israel-to wuieveawo wòazu wo tɔ, eye Yosef naxɔ gome eve.+ 14  Mianyi anyigba sia dome, eye ame sia ame axɔ eƒe gome.* Meka atam be matsɔ anyigba sia ana mia tɔgbuiwo,+ eye azɔ woamae na mi wòazu miaƒe domenyinu. 15  “Anyigba la ƒe liƒo le dziehe gomee nye esi: Tso Ƒu Gã la nu to Hetlon+ mɔ yi Zedad,+ 16  Hamat,+ Berota,+ kple Sibraim, si le Damasko ƒe liƒo kple Hamat ƒe liƒo dome; yi Hazer-Hatikon, si le Hauran ƒe liƒo gbɔ lɔƒo.+ 17  Ale liƒo la atso atsiaƒua nu ayi Hazar-Enon,+ le Damasko ƒe liƒo dzi le dziehe gome, eye wòayi Hamat ƒe liƒo dzi.+ Esiae nye dzieheliƒo la. 18  “Ɣedzeƒeliƒo la dze egɔme tso Hauran kple Damasko dome, eye wòato Yordan ŋu le Gilead+ kple Israel-nyigba dome; eye miadzidzee tso liƒo la ŋu va se ɖe ɣedzeƒeƒu* la nu. Esiae nye ɣedzeƒeliƒo la. 19  “Anyieheliƒo la tso Tamar va se ɖe Meribat-Kades+ tsiwo gbɔ, eye wòato tɔʋu* la ŋu va se ɖe Ƒu Gã+ la nu. Esiae nye anyieheliƒo la. 20  “Ƒu Gã la le ɣetoɖoƒe gome, etso liƒo ma dzi va se ɖe Lebo-Hamat*+ kasa. Esiae nye ɣetoɖoƒeliƒo la.” 21  “Mima anyigba sia ɖe mia nɔewo dome ɖe Israel-to wuieveawo nu. 22  Mimae wòanye domenyinu na mia kple amedzrovi siwo tsi mia dome hedzi viwo ɖe mia dome la, eye woanɔ abe Israel vidzidziwo ene na mi. Woaxɔ domenyinu kpe ɖe mia ŋu ɖe Israel-toawo dome. 23  Eye to si me amedzrovia le la, eya mee miana domenyinui ɖo,” Aƒetɔ Dziɖulagã Yehowa ye gblɔe.

Etenuŋɔŋlɔ

Esiae nye “abɔklugui legbeetɔ.” Kpɔ Megbenyawo B14.
Alo, “tagba.”
Alo, “tɔsisi si keke ɖe edzi zi gbɔ zi eve.”
Alo, “luʋɔ.”
Efia, Domeƒu.
Egɔmeɖeɖe tẽe, “ame sia ame tɔ asɔ kple nɔvia tɔ.”
Efia, Ƒukukua.
Efia, Egipte-tɔʋu.
Alo, “Hamat ƒe dodonu.”