Dzo kpo yi emenuwo dzi

Dzo kpo yi emenuawo dzi

Ezekiel 46:1-24

EMENYAWO ƑE TOTOƉEME

  • Vɔsawo le ŋkekenyui kple azãɖuɣi aɖewo (1-15)

  • Amegã la ƒe nunɔamesiwo dome nyinyi (16-18)

  • Teƒe siwo woaɖa vɔsalãwo le (19-24)

46  “Ale Aƒetɔ Dziɖulagã Yehowa gblɔe nye esi: ‘Xɔxɔnu emetɔ ƒe ɣedzeƒegbo+ la nanɔ tutu+ le dɔwɔŋkeke adeawo dzi,+ ke ne eɖo Sabat kple dzinu yeye dzi la, woaʋui.  Amegã la nato agbo la ƒe akpata nu le gota age ɖe eme,+ eye wòava tɔ ɖe agbo la ƒe ʋɔtruti gbɔ. Nunɔlawo nasa eƒe numevɔ blibo kple eƒe ŋutifafavɔwo nɛ, eye wòade ta agu le agbo la ƒe kpui nu, emegbe wòado go. Ke womatu agbo la o va se ɖe fiẽ.  Dukɔ la me tɔwo hã nade ta agu le agbo ma nu le Sabatwo dzi kple dzinu yeyewo dzi, le Yehowa ŋkume.+  “‘Numevɔsa si amegã la atsɔ vɛ na Yehowa le Sabat ŋkeke dzi la nanye alẽtsui ade siwo sɔ blibo, kple agbo ɖeka si sɔ blibo.+  Atsɔ nuɖuvɔsa efa* ɖeka akpe ɖe agbo la ŋu, eye wòatsɔ nuɖuvɔsa si wòate ŋu ana la akpe ɖe alẽtsuiawo ŋu, eye ami hin* ɖeka nakpe ɖe efa ɖe sia ɖe ŋu.+  Le dzinu yeye dzi la, atsɔ nyitsui ɖeka si sɔ blibo kple alẽtsui ade kpakple agbo ɖeka siwo sɔ blibo asa vɔe.+  Atsɔ nuɖuvɔsa efa ɖeka akpe ɖe nyitsui la ŋu kple efa ɖeka akpe ɖe agbo la ŋu, eye wòatsɔ nu si wòate ŋu ana la akpe ɖe alẽtsuiawo ŋu; eye ami hin ɖeka nakpe ɖe efa ɖe sia ɖe ŋu.  “‘Ne amegã la be yeage ɖe eme la, neto agbo la ƒe akpata nu age ɖe eme, eye wòato mɔ ma ke ado.+  Eye ne dukɔ la me tɔwo va Yehowa ŋkume le azãɖuɣiwo la,+ ame si to dziehegbo+ la nu ge ɖe eme be yeade ta agu la nato anyiehegbo+ la nu ado, eye ame si to anyiehegbo la nu ge ɖe eme la nato dziehegbo la nu ado. Ame aɖeke megato agbo si nu wòto ge ɖe eme la ke ado o, elabena ŋgɔ tẽe wòle be wòato ado. 10  Amegã si le wo dome la nage ɖe eme ne ameawo ge ɖe eme, eye wòado ne wodo. 11  Le ŋkekenyuiwo ɖuɣi kple azãɖuɣiwo la, nuɖuvɔsa la nanye efa ɖeka akpe ɖe nyitsui la ŋu, kple efa ɖeka akpe ɖe agbo la ŋu, eye wòatsɔ nu si wòate ŋu ana la akpe ɖe alẽtsuiawo ŋu; eye ami hin ɖeka nakpe ɖe efa ɖe sia ɖe ŋu.+ 12  “‘Ne amegã la tsɔ numevɔ blibo+ alo ŋutifafavɔ vɛ be wòanye lɔlɔ̃nu faa nunana na Yehowa la, ekema woaʋu agbo si dze ŋgɔ ɣedzeƒe la nɛ, eye wòatsɔ eƒe numevɔsa blibo la kple eƒe ŋutifafavɔsawo ana, abe ale si wòwɔnɛ le Sabat ŋkeke la dzi ene.+ Ne edo go ko la, woatu agboa.+ 13  “‘Tsɔ alẽtsui si xɔ ƒe ɖeka na gbe sia gbe be woatsɔ asa numevɔ blibo na Yehowa.+ Miwɔ esia ŋdi sia ŋdi. 14  Nàtsɔ nuɖuvɔsa efa me mama ɖe ade ƒe akpa ɖeka akpe ɖe eŋu ana ŋdi sia ŋdi, eye nàna ami hin me mama ɖe etɔ̃ ƒe akpa ɖeka ne woatsɔ adzaba wɔ memee la, be wòanye nuɖuvɔsa na Yehowa ɖaa. Esia anye ɖoɖo si anɔ anyi ɖaa. 15  Woatsɔ alẽtsui la, nuɖuvɔsa la kple ami la ana ŋdi sia ŋdi be wòanye gbe sia gbe numevɔsa blibo.’ 16  “Ale Aƒetɔ Dziɖulagã Yehowa gblɔe nye esi: ‘Ne amegã la na domenyinu viawo dometɔ ɖe sia ɖe la, ekema nunanaa zu viawo tɔ ɖaa. Ezu woƒe nunɔamesi si dome wonyi. 17  Gake ne eƒe subɔviwo dometɔ aɖee wòtsɔ eƒe domenyinu aɖe na la, ekema anye etɔ va se ɖe ablɔɖeƒe la dzi;+ emegbe wòagayi amegã la si me. Negbe eƒe domenyinu si wòtsɔ na viawo koe azu wo tɔ ɖaa. 18  Amegã la nagaxɔ amewo ƒe domenyinu aɖeke le wo si ahanya wo ɖa le woƒe domenyinu gbɔ o. Eya ŋutɔ ƒe nunɔamesi ƒe ɖee wòatsɔ ana viawo be wòazu woƒe domenyinu, ne woaganya nye dukɔ la me tɔ aɖeke ɖa le eƒe nunɔamesi gbɔ o.’” 19  Eyome ekplɔm to mɔnu+ si le agbo la xa, si nye mɔnu si yi nunɔlawo ƒe nuɖuxɔ* kɔkɔe siwo dze ŋgɔ dziehe gome la me,+ eye mekpɔ teƒe aɖe le axa dzi ɖaa le ɣetoɖoƒe gome. 20  Eye wògblɔ nam be: “Teƒe siae nunɔlawo aɖa fɔɖivɔsalã kple nuvɔ̃vɔsalã le, eye afi siae woamè nuɖuvɔsa la le,+ ne woagatsɔ naneke ado go ayi xɔxɔnu gotatɔ, ne dukɔ la ŋu nakɔ o.”+ 21  Ekplɔm do go yi xɔxɔnu gotatɔ, eye wòkplɔm to xɔxɔnu la ƒe dzogoe eneawo dzi, eye mekpɔ be xɔxɔnu suewo le xɔxɔnu la ƒe dzogoe ɖe sia ɖe dzi. 22  Xɔxɔnu suesue siwo le xɔxɔnu la ƒe dzogoe eneawo dzi la didi abɔklugui* blaene, eye wokeke abɔklugui blaetɔ̃. Wo ame eneawo katã ƒe lolome sɔ. 23  Woɖo gli ƒo xlã xɔxɔnu eneawo katã, eye wowɔ teƒe si woaɖa vɔsalãwo le la ɖe gliawo ŋu godoo va kpe. 24  Eye wògblɔ nam be: “Esiawoe nye dzodoƒewo, afi si ame siwo subɔna le gbedoxɔa me la ɖaa dukɔa ƒe vɔsalã le.”+

Etenuŋɔŋlɔ

Alo, “xɔ.”
Esiae nye “abɔklugui legbeetɔ.” Kpɔ Megbenyawo B14.