Dzo kpo yi emenuwo dzi

Dzo kpo yi emenuawo dzi

Ezekiel 41:1-26

EMENYAWO ƑE TOTOƉEME

  • Gbedoxɔa ƒe kɔkɔeƒe la (1-4)

  • Gli la kple xɔŋuxɔeawo (5-11)

  • Xɔ si le ɣetoɖoƒe gome (12)

  • Wodzidze xɔawo (13-15a)

  • Kɔkɔeƒewo ƒe kɔkɔeƒe la (15b-26)

41  Ekplɔm yi kɔkɔeƒe la,* eye wòdzidze domegliawo; woƒe titrime le abɔklugui* ade le akpa si, eye abɔklugui ade le akpa kemɛ.  Mɔa nu keke abɔklugui ewo, eye mɔa nu ƒe axadzigliwo keke abɔklugui atɔ̃ le akpa si kple abɔklugui atɔ̃ le akpa kemɛ. Edzidze gbedoxɔa ƒe kɔkɔeƒe la ƒe didime wòle abɔklugui blaene, eye eƒe kekeme le abɔklugui blaeve.  Eye wòge ɖe ememe* hedzidze domegli si le mɔa nu ƒe titrime wòle abɔklugui eve; edzidze mɔa nu ƒe kekeme wòle abɔklugui ade. Gli si le mɔa nu ƒe axa eveawo dzi la keke abɔklugui adre.  Eyome edzidze xɔ si dze ŋgɔ kɔkɔeƒea ƒe didime wòle abɔklugui blaeve, eye eƒe kekeme le abɔklugui blaeve.+ Eye wògblɔ nam be: “Esiae nye Kɔkɔeƒewo ƒe Kɔkɔeƒe la.”+  Eye wòdzidze gbedoxɔ la ƒe glia ƒe titrime wòle abɔklugui ade. Xɔŋuxɔe siwo le gbedoxɔa ŋu godoo la dometɔ ɖe sia ɖe keke abɔklugui ene.+  Xɔŋuxɔeawo nye dzisasrã etɔ̃; xɔŋuxɔe blaetɔ̃ ye le dzisasrã ɖe sia ɖe dzi. Kpuiwo le gbedoxɔa ƒe gli ŋu keŋ be wòalé xɔŋuxɔeawo ɖe te, ale be woƒe dzisasrãawo meɖo gbedoxɔ la ŋutɔ ƒe gli me o.+  Atrakpui gɔdɔ̃gɔdɔ̃* si nɔ kekem ɖe edzi ɖo ta dzi la le gbedoxɔa ƒe axa eveawo.+ Xɔŋuxɔe dzisasrã etametɔwo keke wu etetɔwo, eye etetɔ mee wotona yia titinatɔ kple etametɔ me.  Mekpɔ be kpoƒuƒu le gbedoxɔ la ŋu godoo va kpe, eye xɔŋuxɔeawo ƒe gɔmeɖoanyia kɔkɔ dzidzeti blibo ɖeka, si nye abɔklugui ade va se ɖe eƒe dzogoe dzi.  Xɔŋuxɔeawo ƒe gli egodotɔ ƒe titrime le abɔklugui atɔ̃. Woɖe teƒe aɖe ɖi* le xɔŋuxɔe siwo wotu ɖe gbedoxɔa ŋu la ŋu. 10  Teƒe si le gbedoxɔa kple nuɖuxɔawo*+ domee la keke abɔklugui blaeve le akpa eveawo siaa. 11  Mɔnu le xɔŋuxɔeawo kple teƒe si wotso ɖi la dome, mɔnu ɖeka le dziehe gome, eye mɔnu ɖeka hã le anyiehe gome. Teƒe si wotso ɖi la keke abɔklugui atɔ̃ le goawo katã me. 12  Xɔ si le ɣetoɖoƒe gome si dze ŋgɔ gbadzaƒe la keke abɔklugui blaadre eye wòdidi abɔklugui blaasieke. Xɔ la ƒe gli ƒe titrime nye abɔklugui atɔ̃ godoo va kpe. 13  Azɔ edzidze gbedoxɔ la wòdidi abɔklugui alafa ɖeka. Gbadzaƒe si wotso ɖi la kple xɔ la* kpakple eƒe gliwo ƒe didime katã le abɔklugui alafa ɖeka. 14  Gbedoxɔ la ƒe ŋgɔdze si le ɣedzeƒe gome kple gbadzaƒe si wotso ɖi la ƒe kekeme le abɔklugui alafa ɖeka. 15  Edzidze xɔ si dze ŋgɔ gbadzaƒe si wotso ɖi le gbedoxɔa megbe la ƒe didime kple eƒe xɔdomemɔ siwo le akpa evea wòle abɔklugui alafa ɖeka. Azɔ hã, edzidze gbedoxɔa ƒe kɔkɔeƒe la, kɔkɔeƒewo ƒe kɔkɔeƒe+ la, kple akpata siwo le xɔxɔnu la, 16  kpakple kpuiawo, fesre siwo ƒe nu keke le gota hemia ɖo ɖe eme,+ kple xɔdomemɔ siwo le teƒe etɔ̃awo. Wofa ʋuƒo+ ɖe gliawo ŋu le kpuia ŋgɔ tso anyigba va se ɖe fesreawo nu; eye wotsɔ nu xe fesreawo nu. 17  Edzidze teƒe si le ʋɔtrua tame kple gbedoxɔ ememetɔ me kpakple egodo siaa ƒe gli blibo la godoo va kpe. 18  Wowɔ kerubiwo+ kple detiwo ƒe nɔnɔme+ ɖe wo ŋu, eye deti ɖeka le kerubi eve dome, eye mo eve li na kerubi ɖe sia ɖe. 19  Amegbetɔ ƒe mo trɔ ɖe deti ɖeka ŋu le akpa si, eye dzata ƒe mo trɔ ɖe deti ɖeka ŋu le akpa kemɛ.+ Aleae wowɔ woƒe nɔnɔme ɖe gbedoxɔ bliboa ŋu godoo va kpe. 20  Wowɔ kerubiwo kple detiwo ƒe nɔnɔme ɖe gbedoxɔa ƒe gli ŋu le eme tso anyigba va se ɖe ʋɔtrua tame. 21  Gbedoxɔ la ƒe ʋɔtrutiwo* le dzogoe ene me.+ Le kɔkɔeƒe la* ŋgɔ la, nane le afi ma 22  abe ativɔsamlekpui+ ene; ekɔkɔ abɔklugui etɔ̃ eye wòdidi abɔklugui eve. Dzogoewo li nɛ, eye atie wotsɔ wɔ egɔme* kple eƒe axawoe. Eye wògblɔ nam be: “Esiae nye kplɔ̃ si le Yehowa ŋkume.”+ 23  Ʋɔtru agavee ye le kɔkɔeƒe la kple kɔkɔeƒewo ƒe kɔkɔeƒe la nu.+ 24  Ʋɔtru eveawo siaa dze eve, aga evee li na ʋɔtru ɖe sia ɖe. 25  Wowɔ kerubiwo kple detiwo ƒe nɔnɔme ɖe gbedoxɔ la ƒe ʋɔtruwo ŋu, abe esiwo wowɔ ɖe gliawo ŋu ene.+ Eye wotsɔ ʋuƒo wɔ agbali ɖe akpata la nu le gota. 26  Fesre siwo ƒe nu keke le gota hemia ɖo ɖe eme+ kpakple detiwo ƒe nɔnɔme le akpata la ƒe axa eveawo dzi kple gbedoxɔ la ƒe xɔŋuxɔeawo ŋu kpakple agbaliawo ŋu.

Etenuŋɔŋlɔ

Egɔmeɖeɖe tẽe, “gbedoxɔ la.” Le agbalẽ sia ƒe ta 41 kple 42 me la, míezã “kɔkɔeƒe la” alo kɔkɔeƒe blibo la (si nye gbedoxɔa ƒe Kɔkɔeƒe la kple Kɔkɔeƒewo Ƒe Kɔkɔeƒe siaa) ɖe “gbedoxɔ” teƒe.
Esiae nye “abɔklugui legbeetɔ.” Kpɔ Megbenyawo B14.
Efia, Kɔkɔeƒewo Ƒe Kɔkɔeƒe la.
Edze ċa be enye atrakpui si le kotoo.
Anɔ eme be esia nye toƒe sue aɖe si wotso ɖi, si woate ŋu ato aƒo xlã gbedoxɔ la.
Alo, “xɔviawo.”
Efia, xɔ si le gbedoxɔa ƒe ɣetoɖoƒe gome.
Anye ʋɔtru si le Kɔkɔeƒea ƒe mɔnue wowɔnɛ.
Anye Kɔkɔeƒewo Ƒe Kɔkɔeƒe lae wowɔnɛ.
Egɔmeɖeɖe tẽe, “eƒe didime.”